LUC 5

1Ndɔ karé bè, Jésu nda tà ba ke Génésareth. Doobulege njin nan rann’t njàng-njàng tede le koo tà le Nube. 2E an ngann batoge joo ndai tà ba’t. Mbawge risi nang kêm batoge’t nè nga ndai togoi burege le de manné. 3Jésu al ndi kêm bato karé’t. Bato nè nga è le Simon. E ede Simon ede nè: – Ɔse bato nga age’n kété ndêin dann ba’t. Jésu ndó doobulege nyan kum’n ke kété-kété. 4Loo ke è ebe ra’n ndó de nyan ɓaa, è ede Simon ede nè: – Ɔse bato nga age’n kété dunge mann’t. Taɓai umi burege le si manné ɔsi kanjege. 5Simon tel ile Jésu dè’t ede nè: – Ngar, jè ra kule kɔse kanje ndɔ laa j’ɔr yàl-yàl nal kuwe ngonn kanje karé ke luk-luk. Nè se go tà tami nga ɓaa, m’a tel kule burege manné gugu kan. 6Loo ke dé ra titeke bè ɓaa, kanjege rusi kêm burege le de njin-njin ade tep̂ léa burege le de gang. 7Dé tuge ji de dé ɓar’n made dege ke nain-in kêm bato karé ke rang le kade reei orèi de. Loo ke ei nè reei ɓá ɓaa, dé malang d’uwe kanje rusu bato joo mbak ade nain ngɔr ɓaa, batoge nduii mann. 8Loo ke Simon ke dé ɓar’n Pierre an bè ɓaa, ɔse keje’n nanga non Jésu’t ede’n ede nè: – Kuwe-ɓee ute rai ram’t kɔke, tede man m’ee njè ra majelé. 9Ɓel unde Simon se njé ke se’n malang ndàt gang dè, tede kanje ke d’uwe d’ade al dè loo’n. 10Jacques se Jean ngann le Zébédée ke njémade-kulege le Simon nga géa, ɓel unde de ndàt gang de tɔ. Gir’n ke nè á, Jésu ede Simon ede nè: – Ebe’t ɓel, unn gir’n ɗarinè, à i njèndon kanjege lé ta, nè a i njèndon dooge. 11Loo ke Simon se njékɔse kanje madennge teli se batoge le de reei tɔi nang tà ba’t gugu ɓaa, turi gide de adi nyankingege le de malang, unni rebe go Jésu’t. 12Ndɔ karé ke rang, Jésu ndi ngonn ɓee ke kêm ɓeekon’t nè nga. Dingem karé ke banje mbanran nan rann’t ree tee pan. Loo ke è tête kum’n an Jésu ɓaa, è ɔse keje’n nanga nonn’t ede’n ede nè: – Kuwe-ɓee, ke nè á i ndige le kade banje ɔr ram’t ndát-ndát ɓaa, i aw se tɔgmong tede le ra bè kuwe. 13Jésu ule ji’n ɔde’n ra njèbanje nè nga ede nè: – Oiyo, m’ndige sei dè’t kuwe, maje kade rai tel tò karè ndát-ndát. Ke loon’t nè kuwe, banje ɔr ndát-ndát ra dingem’t nè nga tɔ. 14Go’t gugu, Jésu unn ndu’n ade dingem ke banje ɔr rann’t ndát-ndát nè nga ede nè: – I tam tà le rai ke tel tò karè nè nga ade doo karé géa oo lé. Nè aw i deje njèkuje nyan-mese le kade gon rai an ɓita i unn nyan kade noje ade titeke gute-ndu Moise tam’n. I ra bè le kade dooge malang geri titeke rai tel tò karè ndát-ndát ɓá ta. 15Gir’n ke nè á, kɔbe nyan ra Jésu oso’n se loo-loo. Dooge ngain kebi nan reei rann’t le koo tà le’n a, njé ke nange dann de’t ke ei njératurge dejii le kade ɔr raturge le de kɔke a tɔ. 16Nè Jésu ɔr ra’n dann de’t aw ngang loo’t ɔje tà se Nube titeke è ra’n dɔ-dɔ. 17Ndɔ karé bè Jésu ndi ndó dooge nyan. Pharisienge se njékɔrgir gute-ndu Nube ke Moise ndang reei ra Jésu’t. Dooge in-in se kêm ɓeege gai-gai ke ɓeekon ke Galilée, se ɓeekon le Juda a, se ɓee-bò ke Jérusalem géa reei rann’t a tɔ. Tɔgmong le Nube nain se Jésu ade aje’n njératurge. 18An! dooge unni dingem karé ke kêl ra’n wei tonrin se tuwe too’n bere-mbak reei se’n ke ra Jésu’t. Dé sang rebe le kaw se’n kile’n nang non Jésu’t. 19Nè dooge ke njé koo tàge ubei kêm kei njàng. Gir’n ke ne á dingemge nè nga ingei loo kaw se njèratur nè ra Jésu’t lé. Titeke ei ingei rebe kaw se’n lé ɓaa, ei ali dɔ dè kei’t, ɔri kêl loo karé, taɓai ei ulei njèratur nè yêrêr undei nang ndeĵ dann dooge’t non Jésu’t. 20Loo ke Jésu an kunde ke dingemge nè undei kêm de dènn’t titeke bè ɓaa, è ede njèratur nè nga ede nè: – Man m’edi ndàt titeke kêm Nube tin mbit dè kaiyage’t lei ɓá. 21Loo ke njékɔrgir gute-ndu Nube se Pharisienge ooi tà ke Jésu tam nè nga bè ɓaa, wong in se de ade unni gir murin tà edi nè: – Ké doo nè nga è nan á ile rasɔl dè Nube’t bè wa? Ké Nube kuwe karé á asekum tam ndàt kede nè n’ade kêm’n tin mbit dè kaiya ra dooge’t lé wa? 22Jésu ger tàgir le de ke kêm de’t mbak. E deje de ede nè: – Ké bain á sei giri tàge ke titeke bè dè ɓengre si’t wa? 23Tam ndàt kede nè: «Kêm Nube tin mbit dè kaiyage’t lei» éké tam ndàt kede nè: «Ɔse nang in dɔ, i njiye» nga, ké è ke ra è nyan ke loo ra’n tur ngain dum made wa? 24M’ra nyan nè nga titeke bè le kade i geri titeke man ke m’ee Ngon doo nga, m’aw se tɔgmong dè nang nè le kade kêm’m tin mbit dè kaiyage’t. Go’t gugu Jésu ede doo ke kêl ra’n wei tonrin nga ede nè: – Man m’edi, ɔse nang in dɔ, unn tuwe lei aw ɓéee. 25Ke loon’t nè kuwe, dingem nè nga ɔse nang karkat in dɔ, è unn tuwe too’n ɔse dènn’t, pite Nube dɔ-dɔ ke ɓéee. Dooge malang an-in goo’n sikm. 26Dé malang tà ige de sêl ade d’ule’n ndubra dè Nube’t. Ɓel unde de ndàt gang de ade d’ede nè: – Ɓila j’an nyange ke dum kum. 27Go’t gugu Jésu unde loo tee. E an dingem karé ke njètaa tir ke dé ɓar’n Lévi ndi nanga loo taa tir’t. Jésu ede’n ede nè: – Unn rebe goom’t. 28Lévi inye go kule le’n malang, ɔse nang in unn rebe go Jésu’t. 29Go’t gugu, Lévi ade dé ra mur tête tà ɓee ke bò kêm kei le’n tede le Jésu. Njétaa tir madennge se dooge ke rang ngain on-in se de mur nan’t tɔ. 30Pharisienge se njékɔrgir gute-nduge le de murin tà a, deji njékuwe-gir-Jésuge edi nè: – Ké bain usei se an-in nyan nan’t se njétaa tirge a, se dooge ke njé ra majelége a tɔ wa? 31Loo ke Jésu oo tà deje le de bè ɓaa, è ile de dè’t ede nè: – Njé ke ra de mong maj-maj nga awi ndoo njèkuge-kaje lé, nè njératurge á awi ndoo’n. 32Nube ule’m kade m’ɓar njé ke d’an de ke njéra nyan danné sêwge á bè lé, nè è ule’m le kade m’ɓar njé ke d’an de ke njé ra majelége tede le kade turi hal de. 33Dooge reei edi Jésu edi nè: – Pajage le Jean se njé le Pharisienge ɔgi kêm de ɓo ɔji tà se Nube dɔ-dɔ. Nè njékuwe-girige ɓaa, kuse nyan a, kain nyan tá è nyan le de. 34Jésu ede de ede nè: – Njètaa dinye kige nga, loo ke madennge nain-in se’n ɓai nga, asi kɔgi kêm de ɓo lé. 35Nè ndɔ ke d’a d’uwe’n kɔr’n wont dann de’t ɓaa, ndɔ’n nè ɓita madennge à ɔgi kêm de ɓo ɓai. 36Jésu unn nyan-tɔje karé ke rang tɔje de ede nè: – Doo à gang tà kubu ke kige kile’n kum è ke ndise lé, tede tà kubu ke kige se è ke ndise nga, nduje de à um nan’t lé. 37Doo à kum mann nduu ke sɔl kêm sɔlge ke mari’t lé, tede mann nduu ke sɔl nga, loo ke à unn gir pà ɓaa, à unde sɔlge ke mari nga ndàt gang le kule nang gangang-gangang. Sɔlge nè nga géa, ei nyange ke tuju a tɔ. 38Nè mann nduu ke sɔl nga, umi kêm sɔlge ke kige’t gar-gar. 39Nanan ke an-in mann nduu ke ate ɓá nga aw ndoo kain è ke sɔl lé, tede à tam kede nè: «E ke ate tá m’ndige.»

will be added

X\