LUC 4

1Ndil-Kêmnda taa kêm Jésu pel-pel loo ke in-in’n tà ba ke dé ɓar’n Jourdain ree’n. Ndil-Kêmnda ɔr non’n aw se’n kêm dile’t. 2Sú ree nan kêm Jésu ase ndɔ kɔr-sɔ loo ke è ndii’n kêm dile’t nú nga. Loo ke ndɔ kɔr-sɔ nè nga dese ɓá ɓaa, ɓo ra Jésu tede nyankuse ke ndêin bè géa ɔde tà’n lêm lé. 3Ke loon’t nè kuwe sú ree ra Jésu’t ede’n ede nè: – Ke nè á i Ngonn le Nube kerɔte ɓaa, unn ndui ade kuberi mbal nè nga tel nyankuse ade use. 4Jésu tel ilé dè’t ede nè: – Gute-ndu Nube ke dé ndang kêm magtub’t kété nga tam ede nè: «Nyankuse kuwe go karé á doo à ndii’n kumgajer lé.» 5Taɓai njè sú dooge ree ɔr’n aw se’n dɔ mbeng ɓaa, ke loon’t nè kuwe, è tɔje’n ɓeekonge malang ke dè nang nè ede nè: 6– Tɔgmong se nyankingege malang le ɓeekonge nè nga ei kêm jim’t. M’ase kade nanan géa titeke kêm’m ndige. 7Ke nè á i ɗɔi’m ɓaa, m’a m’adi nyange nè malang ke nyan kingei i kuwe. 8Jésu tel ile sú de’t ede nè: – Magtub ke tò se ninn’n tam ndàt ede nè: «Kuwe-ɓee Nube lei nga, i a ɗɔi’n è a, è kuwe karé bere á i a ra kule kade’n a tɔ.» 9Go’t gugu njè sú dooge ɔr non Jésu aw se’n kêm ɓee-bò ke Jérusalem. Taɓai unn’n unde’n sêm kei’t le Nube ɓaa, è ede’n ede nè: – Ke nè á i Ngonn le Nube kerɔte ɓaa, inye jii dɔ oso nang ade j’an. 10Tede magtub ke tò se ninn’n tam ede nè: «Nube à unn ndu’n kade dooge le’n ke danrán an-in dèi sêw-sêw.» 11Taɓai: «Nube à kade dé lái dɔ d’uwei nal kade oso njanm unde njai dè her’t.» 12Jésu tel ile sú dè’t ede nè: – Magtub le Nube tam ede nè: «Kuwe-ɓee Nube lei nga, i a nan’n ndan lé.» 13Loo ke sú nan kêm Jésu se nyange gai-gai gir gang ɓá ɓaa, inye’n ɓanm ngine’n ndɔ ke rang. 14Loo ke Jésu à tel kêm ɓeekon ke Galilée ɓaa, tɔgmong le Ndil-Kêmnda taa ra’n pel-pel. Kɔbe tà le Jésu nga unn gir koso se loo mbit-mbit kêm ɓeekon ke Galilée bere mbak. 15Tà ke Jésu ndó dooge kêm kei kebe nange’t nga, nel de ngain ade dé malang d’ule ndubra dènn’t. 16Jésu in loon’t nè aw ɓee ke Nazareth. Nazareth nga, è ɓee ke ndɔ ke d’oto’n tutu d’ade tɔge. E aw se de kêm kei kebe nan’t se go ra ke è ra’n kété-kété se ndɔ taa kebe. E ɔse nang in dɔ le tute magtub le Nube kade de. 17Dé ree se magtub ke Esaie, njèribe-dè-tà ke tà Nube’t ndang d’ade’n. Loo ke Jésu teen kêm magtub inge tà nè nga ɓaa, è tute se ndu’n ke bòi ede nè: 18– «Ndil Kuwe-ɓee nain se’m. Kuwe-ɓee ɔr’m le kade m’ile mber Tà ke Maje m’ade njéndooge. E ule’m le kade m’ile mber m’ade njé ke tooi dangai’t titeke d’a d’inye de dɔ a, le kade m’ede njékumtɔge titeke d’a tel kan loo gugu a, è ule’m le kade m’ede njé ke dé ra de ndoo titeke Nube à taa de kinye de dɔ ɓai a, 19è ule’m le kade m’ile mber ɔje dè ɓal ke Kuwe-ɓee à uwe’n de ke rann’t a tɔ.» 20Loo ke Jésu tute magtub nè nga gir gang ɓá ɓaa, unde nan’t tel’n ade njè ngonm tà kei kebe nan ɓaa, è tel ndi nang ndó de nyan. Dooge malang ke kêm kei kebe nan’t nè nga d’an’n sikm. 21Taɓai Jésu unn gir kede de ede nè: – Nyange ke Magtub tam tà’n ade ooi se mbi si nga ɓila aw loon’t deĵ ɓá ta. 22Dooge malang d’ɔr go tà le Jésu maje. Tà ige de sêl dè tà kêmnoje le Nube ke tee tann’t ade d’oo. Dé tam tà d’ede nè: – Ké n’ee nga, n’ee ngonn le Joseph karè lé wa? 23Jésu ede de ede nè: – Kerɔte kuwe, sei a kundei se’m kuju-tam kedi nè: «Njèkuge-kaje i kuwe aje rai ɓita.» Taɓai sei a tami se’m kedi nè: «J’oo tà nyange malang ke i ra kêm ɓee-bò ke Capernaum. I ra nyange nè nga kêm ɓee koji’t ade j’an tɔ.» 24Go’t gugu, Jésu ede de ede nè: – Kerɔte kuwe, man m’ede sei ndàt, njèribe-dè-tà ke tà Nube’t karé bè ke d’oo tà tànn’t ɓee kojenn’t nga goto. 25Kerɔte kuwe, man m’ede sei ndàt, kété kêm ndɔn’t le Elie nga, ɓo-bò oso se loo malang kêm ɓeekon ke Israel tede ndi ede lé ase ɓal mute se nan mute-mute. Kêm ndɔ’n nè nga, njékei-kingege bule ndii kêm ɓeekon ke Israel. 26Nè né è bè géa, Nube ule Elie le kade ra se è ke karé bè dann de’t lé, nè è ule’n le kade ra se njèkei-kinge karé ke kêm ɓee ke Sarepta ɓeekon ke Sidon nú. 27Kété kêm ndɔn’t le Elie, njèribe-dè-tà ke tà Nube’t nga géa, njébanjege bulei ndii kêm ɓeekon ke Israel tɔ. Nè né è bè géa, doo karé bè dann de’t ke banje ɔr rann’t goto. Nè Naaman, doo ke ɓeekon ke Syrie nú nga kuwe karé á ndɔ ke banje ɔr rann’t ndát-ndát. 28Loo ke dooge malang ke ndii kêm kei kebe nan’t ooi tàge nè bè ɓaa, wong ra de ade kêm de aw biriri-biriri. 29Dooge ke ndii kêm kei kebe nan’t nè nga rai keige le de kàde mbal’t. Loo ke ooi tàge nè bè ɓaa, ɔsi nang in-in uwei Jésu ndɔrii ngander-ngander awi se’n gide ɓee’t nata sêm mbal’t. D’aw se’n titeke bè, tede le kaw sure’n kile’n nang barak. 30Nè è tee dann de’t njɔl aw. 31Jésu in loon’t nè aw kêm ɓee-bò ke Capernaum, ɓeekon ke Galilée. E ndó dooge nyan kêm kei kebe nan’t se ndɔ taa kebe karé bè. 32Ndil de tee an-in soin-soin dè gos nyange ke è ndó de’t, tede è ndó de nyange nè nga se tɔgmong. 33Dingem karé ke ndil ke majelé tò kêmn’t ndi kêm kei kebe nan’t nè nga tɔ. E tam tà se ndu’n ke bòi beng ede nè: 34– Hai, Jésu ke Nazareth! Ké usi ri ra jé’t wa? Ké i ree le tuju jè kɔke ta wa? Man m’geri mbak: i i njèkawkule le Nube ke è kuwe ɔri undei se ninn’n gai. 35Jésu in se ndil ke majelé nè ndáng’n ede nè: – Ebe rai tam tà, unde loo i tee kɔke kêm dingem’t nè. Ndil ke majelé unn dingem nè nga ile’n nang njanm dann dooge’t ɓaa, unde loo tee nyɔrong aw nal ra se’n nyan karé ke majelé. 36Dooge malang ke ndii tutu nga, tà ige de sêl ade ei deje nan tà edi nè: – Ké è tà ri á bè wa? Doo nè nga on ndilge ke majelé njanm-njanm ede nè: «Undei loo i teei» ɓaa, ke loon’t nè kuwe, undei loo teei an-in nan. 37Nyan ke Jésu ra nga, kɔbe’n oso se loo mbit-mbit kêm ɓeekon ke Galilée. 38Jésu unde loo kêm kei kebe nan’t tee aw kei le Simon. Wum Simon ke dinye oso se ratur ade ra’n taa por làm-làm. Dé deje Jésu le kade ra se’n. 39Jésu age ngɔr ke ra njèratur’t nè nga, ɗuge nang dènn’t, taɓai è ndáng ratur le kade unde loo tee ɓaa, ratur nè nga unde loo tee kuwe tɔ. Tajinan’t nè kuwe, wum Simon ke dinye nga ɔse nang in dɔ ɓaa, è unn gir kade de nyankuse d’use. 40Loo ke gir ndɔ taa kebe gang ade kàde ur ɓá ɓaa, dooge malang otoi njératurge ke raturge gai-gai ra de reei se de som-som ra Jésu’t. E ile’n ji’n dè de’t karé-karé malang, ɔr’n ratur ra de’t. 41Ndilge ke majelé géa undei loo teei kêm dooge’t bule se non tà de’t beng-beng edi nè: – I i Ngonn le Nube. Jésu on de njanm-njanm ɔge de tam tà, tede dé ger’n mbak titeke è Krist. 42Loo ke loo ar yerer ɓaa, Jésu unde loo tee kêm ɓee’t aw ngang loo’t nata. Dooge ngain unni gir sang’n par-par. Loo ke ingeii deĵ ɓá ɓaa, ei ndigi kɔgii nang edi nè: – Inye jè aw rang lé ta. 43Nè Jésu ede de ede nè: – Gar-gar, m’a m’ile mber Konɓee le Nube nga kade dooge ke kêm ɓeege ke rang tɔ. E tede è ke nè á Nube ule’m. 44E ile mber Tà ke Maje nè nga, kêm kei kebe nange’t ke ɓeekon ke Judée.

will be added

X\