LUC 16

1Jésu unn gostà karé ede njékuwe-girnge ede nè: – Baw karé unn doo karé ade è njèkan-dè-nyange le’n. Ndɔ karé bè, dé ree d’ede baw nè nga d’ede nè: «Doo ke i unn’n unde’n ke njèkan-dè-nyange lei nga tuju nyange lei ngain.» 2Kuwe’n ɓar’n ade ree. E ede’n ede nè: «D’ɔr ser nyan raige ke majelé ngain d’ade m’oo. I tɔje’m go nyange le’m ke m’um jii’t ade m’an, tede i asekum k’ee njèkan-dè-nyange le’m gugu ndan lé ta.» 3Njèkan-dè-nyange le kuwe’n nè nga tam kêmn’t ede nè: «Ké ri á m’a ra ɗarinè ta wa, tede kuwe’m ɔr’m kêm kule’t kɔke. Man nga tɔg’m ase ra kule ndɔr lé a, kaw kɔr loo tà dooge’t le kɔ de nyan nga too’m rasɔl a tɔ. 4M’ger nyan ke kum ra ɗarinè ta. Titeke bè á loo ke kuwe’m à rɔ’m kule’t kɔke ɓaa, dooge à uwei man ke ra de’t.» 5E ɓar njékurege le kuwe’n ade reei ingei nin karé-karé malang. E deje njè ke ree desêin ede nè: «Ké kure le kuwe’m ke tò dèi’t nga è kandang wa?» 6Njèkure nè nga tel ile’n dè’t ede nè: «Kure le kuwei ke tò dèm’t nga, è ku wubu kage-olivier ke bòi-bòi aru karé.» Njèkan-dè-nyange le kuwe’n ede doo ke kure tò dènn’t nga ede nè: «I tel kalang i ndi nang, i ndang kêm magtub’t ede nè è ku wubu kage-olivier kɔr-mi.» 7Go’t gugu, è ɓar njèkure ke rang deje’n ede nè: «A i, ké kure le kuwe’m ke tò dèi’t è kandang tɔ wa?» Doo nè nga tel ilé de’t ede nè: «Kure le kuwei ke tò dèm’t nga è debe ko aru karé.» Njèkan-dè-nyange le kuwe’n ede doo nè nga ede nè: «I tel i ndi nang, i ndang kêm magtub’t ede nè è debe ko kɔr-sɔsɔ.» 8Kuwe njèkan-dè-nyange ke njègos nè nga ede nè: «I ger nyan ngain kuwe.» E ke nè á ke nyan ra dooge ke ei le nang nè ke rai se nan dum njé ke dé le lookar. 9Jésu tel ede de ede nè: – Man m’ede sei, nar ke get lé ke tò ji si’t nga uwei made nan se dooge. Titeke bè á loo ke gir nar nè à gang ɗás ji si’t ɓaa, Nube à uwe sei ke rann’t loo ndi ke à tò se non. 10Nanan ke tɔse kum’n dè nyan ke ndêin bè ke d’um jinn’t nga, à tɔse kum’n dè nyan ke bòi ke d’um jinn’t tɔ. Nè nanan ke tɔse kum’n dè nyan ke ndêin bè ke d’um jinn’t lé ɓaa, à tɔse kum’n dè nyan ke bòi ke d’um jinn’t nga lé tɔ. 11Nar ke get lé ke tò ji si’t nga, loo ke sei tɔsi kum si dè’t lé ɓaa, ké nan à ade sei ngarankum nyan le kade i ngonmi wa? 12Loo ke sei tɔsi kum si dè nyan le doo ke rang ke tò ji si’t lé ɓaa, Nube à ade sei nyan ke ɔje dè si lé. 13Ngonn njèndi karé asekum ra kule kade kuwenge joo kêm kurloo ke karé’t lé. E à ɔr è ke karé njêt, nè è à unde è ke karé dann kumn’t. E à ile koje dè è ke karé’t, nè à an njè ke karé ke rang ke nyan lé. Sei asikum ra ɓer le Nube se ra ɓer le nar kade nan’t joo mbak lé. 14Loo ke Jésu tam tàge nè nga titeke bè ɓaa, Pharisienge ke njé kunde nar dann kum de’t an-in tà le’n ke nyan lé. 15Jésu ede de ede nè: – Sei an-in ra si ke njéra nyan danné sêwge tàkum dooge’t nè Nube ger ngarankêm si mbak. Nyan ke è ngarankum nyan tàkum dooge’t nga, Nube an ke nyan ke tò yêr tàkumn’t. 16Gute-ndu Nube ke Moise ndang se magtubge ke njéribe-dè-tàge ke tà Nube’t ndangi a tɔ nga, dé ndó dooge sár d’ade Jean ke njèkule dooge manné njonm ree’n. Nè unn gir ndɔ ree le Jean sár tee ɓila nga, m’ile mber Tà ke Maje m’ade dooge. Gir’n ke nè á nanan géa uwe’n ra’n mong le kum nan’t bɔk se Nube. 17Danran se nang nè à gotoi se nel’n karè pa ɓita tàge ke ndêin-ndêin bè ke dé ndang kêm magtub gute-ndu’t à udi ɓai. 18Nanan ke mbate dinye le’n tel taa è ke rang ɓaa, tà kaiya uwe dè’n. Nanan ke taa dinye ke ngaw’n mbate’n ɓaa, tà kaiya uwe dè’n a tɔ. 19Kété mari doo karé bè ke è baw ndi tutu. E tule kubuge ke ker perm-perm ke maje rann’t. Doo nè nga use a, an-in a, ra ranel se ndɔge malang a tɔ. 20Doo karé bè ke njèndoo ri’n nè Lazare ndi tutu tɔ. Nyan tɔr’n se dò wɔkte-wɔkte. Dé ree d’ile’n nang pɔbel tà kei’t le baw. 21E ndinge ra’n le kade d’ade’n nyon-nyon mur ke toso dè table’t le doo ke è baw nè nga tede tête’n tà ɓo ke ra’n nga rɔk. Nè doo karé bè géa koto ade’n lé. Bisege á agi meen-meen ke rann’t tonni tà dòge le’n. 22Go’t gugu ɓaa, Lazare ke njèndoo nga wei. Njékulege le Nube ɔri non’n awi se’n danrán undeii kɔte Abraham’t. Doo ke è baw nè nga géa wei tɔ. Dooge unni ninn’n awi dubi. 23Baw nè nga teen kum’n dann njé ke koo’t dann nyantosowur’t. Loo ke è gang dè’n dɔ tchet ɓaa, è an Lazare ndi mbeng kɔte Abraham’t. 24Baw ule tà’n non’t ede nè: «Hai! bɔ’m Abraham an kumtondoo le’m. Kɔkrɔ karè, ede Lazare ade ule ngaw ji’n kum mann’t ree’n ade m’njibe kade ndon’m sɔl’n lom ndêin tede ndon por ra’m ndoo ngain.» 25Abraham tel ilé dè’t ede nè: «Ngonn’m, ade kêmi olé dè nyankingege’t lei ke ndɔ ke inge loo ke i ndii’n se dèi dɔ ɓai nga, nè Lazare ɓaa ndi dann nyantosowur’t. Ɗarinè d’ade ndi se kêmlom ta, nè i a i ndi dann nyantosowur’t tɔ ta. 26Taɓai, bolè ke son’n goto gang jè nan danné. Titeke bè á doo karé asekum kin ra jé jè’t kaw ra si sei’t lé a, doo asekum kin ra si sei’t ree ra jé jè’t lé a tɔ.» 27Baw tel tam ede nè: «Bɔ’m Abraham, tài tò nják, ede Lazare ade aw ra njé ke ndii kêm kei le bɔ’m. 28Ngakonmge ke ndêin mi ndii tutu ɓai. Ade aw ede de kade turi hal de nè bainléa à reei ndii dann loo nyantosowur’t titeke man m’ndii’n danné nè bè tɔ.» 29Abraham tel edé ede nè: «Magtub gute-ndu ke Moise ndang se magtubge le njéribe-dè-tàge ke tà Nube’t tooi tutu. Gar-gar è tà le kade d’ile koje dè tàge’t le de.» 30Nè baw nè nga tel ede Abraham ede nè: «Ḿ-m̀, bɔ’m Abraham, è ke nè ase lé ɓai. Ke nè á doo karé in ra njé ke koo’t aw ra de’t ɓaa, d’a tur hal de.» 31Abraham tel ilé de’t ede nè: «Ke nè á ngakoinge uri mbi de ooi tà ke Moise ndang kêm magtub gute-ndu’t se tà ke njéribe-dè-tàge ke tà Nube tami nga lé ɓaa, né doo karé unde loo tee dann njé ke koo’t aw inge de géa, d’ade tur hal de lé.»

will be added

X\