LUC 14

1Doo karé dann njé ke bòge’t le Pharisienge ɓar Jésu kade aw kei le’n use se’n nyan se ndɔ taa kebe karé bè. Njékɔrgir gute-nduge se Pharisienge ke ndii loon’t nè nga, undei kum de lêrlêr an-in Jésu. 2Dingem karé bè ke ratur ile mann kêmn’t ndi nang kété non Jésu’t. 3Jésu unn tà karé deje njékɔrgir gute-nduge se Pharisienge ede nè: – Gute-ndu le jéi nga inye loo ade jéi éké ɔge jéi kaje doo se ndɔ taa kebe wa? 4Nè dé ndi d’an kum nan-nan anje kile’n dè’t. Loo ke Jésu an bè ɓaa, uwe ji njèratur nè nga aje’n taɓai tel ede’n ede nè: – In aw loo lei. 5Go’t gugu Jésu tel deje de ede nè: – Ké nan dann si’t ke nè á ngonn’n éké mang le’n oso bolé né è ndɔ taa kebe géa, ké à unn’n nata lé wa? 6Tà ke è deje de nga d’asekum kile’n dè’t lé. 7Loo ke Jésu an titeke dooge ke Pharisien nè ɓar de loo nyankuse’t nga nanri nan loo tede ndi non made dege’t kété ɓaa, è unn gostà karé ede de ede nè: 8– Loo ke doo karé ɓari loo dann-ɓee’t ɓaa, maje kade i nanr loo tede kaw ndi kété non dooge’t lé. 9Bainléa doo karé ke dum dèi ndi dann dooge’t nè le kade è ke ɓar sei ree edi ede nè: «Inye loo ke nè ade doo ke nè.» Ke loon’t nè kuwe à ɔse nang kin se rasɔl kaw ndi go de’t gugu. 10Nè loo ke dé ɓari loo nyankuse’t ɓaa, maje kade aw i ndi gugu go dooge’t. Loo ke è ke njè ɓari loo nyankuse’t à ree kaw kêm kei ɓaa, à edi kede nè: «Basa made’m, i ree ke kété nè.» Titeke bè á, dèi à in tchakm tàkum madige’t ke ndii sei tà nyankuse’t nè nga. 11Nanan ke unde dè’n dɔ ɓaa, d’a d’ade dè’n à è nang ɓai, nè nanan ke ule dè’n ɓaa, d’a d’unn’n kunde’n ɗáng dɔ ɓai. 12Go’t gugu Jésu ede doo ke njè ɓar’n se nyankuse nè nga ede’n nè: – Ndɔ ke rang loo ke ade d’ade ra mur tête tà ɓee ke kada éké ndɔɔ ɓaa, maje kade i ɓar madige, se ngakoinge, se njénojege lei, se njémade-tà-keige lei ke njényan kingege lé. Tede dé nè nga bainléa d’asekum tel ɓari se nyankuse gute made’t. Loo ke dé ra sei titeke bè ɓaa, bainléa è nar kunde njai kuwe á i inge nè ɓá ta. 13Nè loo ke ade d’ade ra mur tête tà ɓee ɓaa, maje kade i ɓar njéndooge a, njékumtɔge se njédɔgemetege se njé ke kêl ra de wei tonrin a tɔ. 14Ke nè á i ra titeke bè ɓaa, rai à neli tede dé nè nga d’asekum le tel ɓari se nyankuse gute made’t lé. Nè Nube kuwe à uge dè jii ndɔ ke njé ra majege à undei loo teei dann njé ke koo’t. 15Loo ke doo karé dann njé ke ndii tà nyankuse’t nè nga oo tàge nè nga bè ɓaa, ede Jésu ede nè: – Doo ke ndi tà nyankuse’t kêm Konɓee’t le Nube nga, ra’n à nel’n kuwe. 16Jésu tel ede doo nè ede nè: – Ndɔ karé bè doo karé ade dé ra mur tête tà ɓee ke bò ɓar’n dooge ngain. 17Loo ke kàde nyankuse nain ngɔr ɓaa, doo nè nga ule ngonn njèndi le’n ede nè: «Aw ede dooge ke m’ɓar de nga ade reei ta tede m’uwe dè nja nyange malang ɓá ta.» 18Nè dooge nè nga nanan géa dann de’t unn gir ra gos. Njè ke desêin tam ede nè: «Aw ede kuwei ade ade kêm’n sɔl lom dèm’t tede m’ndogo loo ndɔr, m’a m’aw le kan.» 19E ke njèkon’t joo tam ede nè: «Aw ede kuwei ade kêm’n sɔl lom dèm’t tede m’ndogo mangege dɔg, m’a m’aw le nan de kan.» 20E ke njèkon’t mute tam ede nè: «Aw ede kuwei ede nè: m’asekum kaw lé tede jè se dinye le’m jè taa nan kige ɓai.» 21Ngonn njèndi nè nga tel ree ra kuwen’t ɔr go tàge nè malang ade’n. Loo ke kuwe’n oo tàge nè nga bè ɓaa, kêm’n aw biriri-biriri ade ede ngonn njèndi le’n nè nga ede nè: «I tel aw law-law ndá-looge’t i ree se njéndooge se njé ke kêl ra de wei tonrin a, njédɔgemetege a, njékumtɔge a tɔ.» 22Go’t gugu loo ke è tel ree ɓaa, ede kuwe’n ede nè: «Nyange ke i ede’m nga, m’ra ɓá nè gute loo nain karè ɓai.» 23Kuwe ngonn njèndi nè nga tel ede’n ede nè: «Unde loo i tee aw kêm ngann ɓeege’t a, se ngang galige a tɔ. Dooge malang ke inge de nga, i kate de kàt-kàt ade dé ree dé rusu kêm kei le’m neĵ. 24Ma m’ede sei ndàt: Dooge ke m’ɓar de desêin nga, doo karé bè géa à ɔde nyankuse nè tànn’t lêm lé.» 25Loo ke Jésu in le kaw ɓaa, kosdoo-bulege awi se’n. E tel mer de ɓaa ede de ede nè: 26– Doo ke inye go bɔ’n se kon’n, dinye le’n se ngann’n, ngakonnge se kon nannenge lé ɓaa, è asekum k’ee njèkuwe-gir’m lé. 27Ke nè á njèkuwe-gir’m uwe dè nja ra’n le kwei kàde kage-ke-dese’t titeke man m’ra’n bè lé ɓaa, è asekum kunn dè nja’m têr-têr lé. 28Loo ke doo karé dann si’t ndige le ra kei ke bòi ɓaa, à kuwe dè nja ra’n kété le kan ké nar ke tò jinn’t nga asekum ra’n kei nè nga tɔl mbas kuwe wa? 29Ke nè á è ra titeke bè lé ɓaa, gir kei ke è unde nga asekum ra tɔl mbas lé. Loo ke è ra tɔl mbas lé ɓaa, dooge malang ke an-in gir kei nè nga à ogoi dènn’t kedi nè: 30«An-in! doo nè nga unde gir kei ke bòi nè loo ra’n tɔl mbas dum’n bang.» 31Eké loo ke ngar karé ndige le kaw rɔ se ngar made’n ke rang ɓaa, è à kuwe dè nja ra’n kété le kan maje ké njérɔge le’n ke aru dɔg loo dɔg nè nga ase kade aw oso’n rɔ ra njèban’t le’n ke uwe dè nja ra’n kété se njérɔge le’n aru dɔg loo kɔr-joo nga kuwe wa? 32Ke nè á tɔg’n ase lé ɓaa, loo ke njèban le’n nain heb ɓai kuwe ɓaa, è à ɔr dooge kule de ra njèban’t le’n nè nga le kade dejii edi nè: «Ede’m nyange ke le ra kade tà goto’n dann jé jè sei’t.» 33Jésu tɔl ngang tà nè nga ede nè: – Sei géa è titeke bè tɔ. Ke nè á doo karé dann si’t inye go nyankingege le’n lé ɓaa, è asekum k’ee njèkunn dè nja’m têr-têr lé. 34Sei geri mbak titeke kate è nyan ke maje. Nè ke nè á kate tel bɔlɔs ɓaa, ké ri á j’à ra’n kade tel don gugu wa? 35Nyan karé ke rang ke le ra’n goto, nè à tel k’ee nyan le ɓirɓite. Nanan ke asekum koo tà nè nga ɓaa, maje kade ur mbi’n maje oo’n tà ke m’ede sei nè nga.

will be added

X\