LUC 13

1Kêm ndɔ ke dooge d’ade ra nyankuje-mese nga, njèkonɓee Pilate ade dé tɔl dooge ke Galilée d’ade mese de pɔtinan se le nyankulge ke dé tɔl de. Dooge ke nange reei ra Jésu’t edii tà nè. 2Jésu tel deje de ede nè: – Dooge ke ɓeekon ke Galilée ke dé tɔl de nga, sei giri titeke ei njé ra majelé dum made dege ke rang malang wa? 3Ḿ-m̀, è bè lé. Nè sei géa, ke nè á sei turi hal si lé ɓaa, a tuji malang titeke dooge ke Galilée tujii bè tɔ. 4Eké dooge ke dɔg-gidé-sɔsɔ ke kêm ɓee ke Siloé ke kei ke ngal lêng-lêng tête unde de tɔl de nga, ké sei giri titeke ei nè á tà uwe dè de dum gute dooge ke rang malang ke ndii kêm ɓee-bò ke Jérusalem wa? 5Ḿ-m̀, è bè lé. Nè sei géa, ke nè á sei turi hal si lé ɓaa, a i tuji malang titeke bè tɔ. 6Taɓai Jésu ede de ede nè: – Dingem karé bè man kage koté kêm ndɔr nduu’t le’n. Ndɔ karé bè è aw le kuje kann’n ɓaa inge lé. 7E ede njè ngonm ndɔr nduu nè nga ede nè: «An! ase ɓal mute ɗarinè ke m’ree tede le kuje kann koté nè. Nè kann’n karé bè géa m’inge lé. I tuge’n i gang’n kɔke. Man m’an nyan karé ke kade nda baa’n loo ɓai-ɓai lé.» 8Njè ngonm ndɔr nduu nè nga ede kuwe’n ede nè: «Kuwe’m, inye’n ade nda ase ɓal karé kade m’um yede nyange tutu m’ade j’an ɓita. 9Bainléa kal ke rang à ann ɓai. Loo ke nè á n’ann lé njing ɓaa, inye’m ade m’tugé m’gangé ɓai.» 10Ndɔ karé bè, Jésu ndó dooge nyan kêm kei kebe nan’t. Ndɔ nè nga è ndɔ taa kebe. 11An! dinye karé bè ke ndil ke majelé tel’n ke njèdɔgemete ase ɓal dɔg-gidé-sɔsɔ ndi se de kêm kei kebe nan’t nè nga tɔ. Ndil ke majelé nè nga uwe’n ɗuge’n ngong ade asekum kute tà’n dɔ lé. 12Loo ke Jésu tête kum’n an’n ɓaa, è ɓar’n ede’n ede nè: – Dinye, m’ɔr ratur lei dèi’t ɓá ta. 13Jésu ile ji’n dè dinye’t nè nga ɓaa, ke loon’t nè kuwe è ute tà’n dɔ a, è unn gir kule ndubra dè Nube’t se ndɔ karé-karé malang a tɔ. 14Nè wong ra ngar dè kei kebe nan tede kaje ke Jésu aje dinye nè se ndɔ taa kebe. Ngar dè kei kebe nan nè nga ede dooge malang ke ndii tutu ede nè: – Gar-gar j’à ra kule ase ndɔ mute-mute. I reei kêm ndɔge’t nè nga adi d’ɔr ratur ra si’t m i nginei ndɔ taa kebe tá lé. 15Kuwe-ɓee tel ile de dè’t ede nè: – Sei njékede gosge, ndɔ taa kebe nga ké nan dann si’t tutu mang éké koro le’n dè bel’t aw se’n ade an-in mann lé wa? 16An! dinye nè nga è ngonnkà Abraham. Nè njèban ade ratur tɔ’n nang njanm-njanm ase ɓal dɔg-gidé-sɔsɔ ɗarinè. Gar-gar man tutu’n kinye’n dɔ. Ké tede k’ee ke è ndɔ taa kebe á kade m’aje’n lé wa? 17Loo ke Jésu tam tà nè nga ɓaa, njébange le’n malang ndii dann rasɔl’t. Nè gute kosdooge malang nga ra de nel de ngain dè nyankɔbege ke Jésu ra ade d’an. 18Jésu unn gostà ke rang ede nè: – Ké Konɓee le Nube nga tò tanan bain wa? Ké nyan ri á m’a kunn tɔje’n sei kade i geri maje wa? 19An! Konɓee le Nube nga tò asenan se kum kage karé ke kide nyeem-nyeem ke ri’n nè Mutarde ke doo dubu kêm ndɔr’t. Loo ke è ube ɓá ɓaa, tɔge yir-yir. Balkumnge tɔ pel-pel ade helge ke walé rai ndisge le de dè’t. 20Taɓai Jésu tel tam ede nè: – Ké nyan ri á m’a kunn tɔje’n sei kade i geri maje wa? 21Konɓee le Nube nga tò asenan se pululu ke dinye din tênn gur’n nduju ke ɔr kêm ngó mute. Titeke bè á mbɔr ɓaa, nduju nè nga in ti ngiring-ngiring. 22Jésu aw ndó dooge nyan se kêm ɓee-bòge se ngann ɓeege tuge’n gang’n ke Jérusalem bè aw’n. 23Doo karé bè deje’n ede nè: – Ngar, dooge ke ndai nè nga, njé ke d’inge kaje dé ngain lé. Ké è kum kerɔte kuwe wa? 24Jésu tel ile’n dè’t ede nè: – I sangi loo le kaw se tàbit kei ke njon tede man m’ede sei ndàt, dooge ngain dann si’t à sangi rebe le kaw kêm Konɓee’t le Nube. Nè asikum kilei nja de tutu ndan lé. 25Loo ke kuwe-kei à ɔse nang le kin dɔ kutu tà rebe ɓaa, ei ke nain-in nata à kunni gir kunde tà rebe kedi nè: « Kuwe-ɓee, tài tò nják, ɔr tà rebe ade jè.» E à tel kile sei dè’t kede nè: «Man m’ger sei lé.» 26Kêm ndɔ’n nè nga, sei a kunni gir tami kedi nè: «Jè nga ndɔ ke j’use sei a, j’an-in sei nan’t a, i ndó dooge nyan ndá-looge’t le jé a tɔ.» 27Kuwe-kei nè nga à tel kile sei dè’t kede nè: «Man m’ger sei lé, ɔti tàm’t kɔke sei malang ke njé ra nyan pás-pàsge.» 28Sei a noin jik-jik a, a usei tà si kakl-kakl a tɔ. Wong à ra sei ngain loo ke sei a kan-in kà si Abraham, se Isaac, se Jacob se njéribe-dè-tàge ke tà Nube’t malang kêm Konɓee’t le’n. Nè sei ɓaa, d’a kɔge sei loo kile nja si tutu. 29Dooge in-in se loo-loo dè nang nè, loo tee’t le kàde se loo kur’t le kàde, dèji gel se dèji kon a tɔ. D’a ndi tà nyankuse’t kêm Konɓee’t le Nube. 30An-in maje, njé ke gugu à teli k’ei ngawtà made dege a, njé ke ei ngawtà made dege à teli k’ei njé kutu go made dege a tɔ. 31Kêm ndɔn’t nè nga Pharisienge ke nange reei edi Jésu edi nè: – Unde loo kêm ɓeekon ke Galilée i tee kɔke aw rang tede ngar Hérode Antipas ndige le kade dé tɔli. 32Jésu tel ile de dè’t ede nè: – Awi edi njan nè nga: «Jésu rɔ ndilge ke majelé a, ɔr ratur ra dooge’t ɓila a, barè a tɔ. Ndɔ ke njèkon’t mute ɓaa, à tɔl gang kule le’n ta.» 33Gar-gar m’a m’aw kum’m ke kété ɓila a, barè a se ndɔ ke rang a tɔ. Tede njèribe-dè-tà ke tà Nube’t asekum kwei loo ke rang’t lé, nè Jérusalem kuwe karé bere. 34Sei dooge ke i ndii kêm ɓee-bò ke Jérusalem, sei njé tile njéribe-dè-tàge ke Nube ule de ra si’t se kuberi her tɔl de. Dɔ-dɔ m’ndige le kɔse nja si nan’t titeke kon kunje kebe’n ngannenge gir bagenn’t bè. Nè sei ndigi kinyei man kade m’ra titeke bè lé. 35An-in! ɗarinè Nube asekum kain ngang si lé ta. Loo naje’n goto: sei a kan-in man gugu ndan lé sár kade a tami kedi nè: «Maje kade ndutɔr nain se è ke Kuwe-ɓee Nube ule’n nga.»

will be added

X\