LUC 12

1Kêm ndɔn’t nè nga, doobulege kebi nan ra Jésu’t se mate de-mate de asi aru dɔg loo bule. Dé njin nan rann’t njàng-njàng ade nain ngɔr kade dé tube nan nang mbajer-mbajer. Jésu unn gir kede njékuwe-girnge kuwe tà kété ede nè: – Kêm si dè ra si’t le kade sei njékede gos tite Pharisienge bè lé. 2Nyan karé bè ke tò loo ɓɔyɔn’t ɗarinè ke ndɔ ke rang d’a nal tee se gir’n nata goto. Nyan karé bè ke tò loo ngeinn’t ɗarinè ke ndɔ ke rang d’a nal kuje gir’n ke nata ndát-ndát goto. 3Gir’n ke nè á, nyange ke a i tami tà’n dann ndɔɔ nga, dooge à ooi tà’n dann kada ndái-ndái ɓai. Nyange malang ke a i kɔti tà’n mbi nan’t kêm kei karang nga, dooge à ilei mber ndá-looge’t beng-beng ɓai. 4Jésu ede de ede nè: – Sei ke sei mademge kerɔte nga, m’ede sei ndàt: Dooge ke asikum tɔli danra si nè go’t gugu asikum rai se si nyan ke rang lé nga, i ɓeli de lé. 5M’a m’ede sei è ke kade i ɓelii gar-gar. I ɓeli Nube ke aw se tɔgmong le kɔr kebe le si a, le gangtà dè si’t a, kile sei dann por’t a tɔ. 6Ké d’ige tuinge mi kum sisi joo lé wa? Nè né è bè géa, kêm Nube wei nal dè è ke karé bè dann de’t lé. 7Taɓai, kɔr yinge dè si géa Nube tute ger mbak. Ebi’t ɓel tede sei nga gate si è ngain dum tuinge ke bulei dik-dik. 8Man m’ede sei ndàt, nanan ke tam ndàt tàkum dooge’t ede nè n’ee le’m ɓaa, man ke m’ee Ngonn doo nga géa, m’a m’tam ndàt tàkum dooge ke danrán le Nube titeke doo nè nga è le’m man kuwe tɔ. 9Nè nanan ke naje se ra’n tàkum dooge’t ede nè n’ger’m lé ɓaa, man Ngonn doo nga, m’a m’tam ndàt tàkum dooge ke danrán’t le Nube titeke man géa, m’ger’n lé tɔ. 10Nanan ke tam tà le’m man Ngonn doo nga majelé ɓaa, Nube à ade kêm’n tin mbit dènn’t ɓai. Nè nanan ke taje Ndil-Kêmnda ɓaa, Nube à ade kêm’n à tin mbit dènn’t ndan lé. 11Loo ke d’ade kali sei kaw se si gangtà dè si’t kêm kei kebe nange’t éké non ngar ɓeege’t, éké non njékonɓeege’t géa, adi kêm si tò kekek dè gos ke a ɔri tà le taai dè si, éké dè tà ke kum tam’t nga lé a tɔ. 12Awi ɓaa Ndil-Kêmnda kuwe à ndó sei tà ke kade i tami kêm ndɔn’t nè gar-gar. 13Doo karé bè dann doobulege’t ede Jésu ede nè: – Njèndó dooge nyan, unn ndui ade ngokon’m ke tɔg le kade kai nyan-ndube ke le’m ade’m pa ɓita. 14Nè Jésu deje doo nè ede nè: – Hai dingem, ké nan unde’m ke njègangtà le si éké ke njè kai sei nyan danné wa? 15Taɓai Jésu ede doobulege ede nè: – Kêm si dè ra si’t nè a kadi ngur kebe nyanbawge ke rara dè nang nè ra sei pênn-pênn. Tede ndikumgajer le doo nga, tò ɔje dè nyanbawge le’n ke tò ndaj-ndaj nga lé. 16Go’t gugu Jésu tel unn gostà karé ede de ede nè: – Dingem karé bè è baw. E aw se loo ndɔrge ke inge’n ko ngain. 17Dingem nè nga girtà kêmn’t ede nè: «Ké m’a ra bain wa? Tede loo ke kade m’ɔse nja ko le’m tutu goto.» 18E tam kêmn’t ede nè: «An! m’ger nyan ke kum ra ta. Ɗarinè m’a m’janrin damge ke kété kɔke; m’a m’tel kojo ège ke bòi-bòi, m’a m’ɔse nja ko le’m se nyan-kingege le’m ke rang malang tutu. 19Go’t gugu, m’a tel kede ra’m kede nè: An! nyankingeige tooi ndaj-ndaj asikum rai sei ɓal bule. I tel i ndi jêke^ i taa kebe, use a, an-in a, i ndii’n dann ranel’t a tɔ.» 20Nè Nube ede dingem nè nga ede nè: «I njè kêm tɔ kuju tà lé. Ndɔɔ nè kuwe a wei. A ɓaa, nyan malang ke i uwe dè nja nga, ké à k’ee le nan ta wa?» 21Jésu tel ede de ɓai ede nè: – Doo ke kebe nyankingege ke dè nang nè ɔje’n dè ra’n è kuwe nal kade è baw tàkum Nube’t nga, le’n à è titeke bè tɔ. 22Go’t gugu Jésu ede njékuwe-girnge ede nè: – Gir’n ke nè á man m’ede sei ndàt: adi kêm si tò kekek dè ra si’t ɔje dè nyan ke a usei éké kubu ke a ulei ra si’t nga lé. 23Tede ndikumgajer le si nga dum nyan kuse a, danra si nga dum kubu ke kule ra si’t tɔ. 24Undei kum si an-in haberage: dé dubu ko lé a, d’uje ko lé a, loo ngonm nyan le de éké dam le de goto a tɔ. Nè Nube kuwe á ul de. Sei nga, gate si è ngain dum helge ke Nube ul de. 25Ké nan dann si’t asekum kile ndɔ karé dè ɓal ndikumgajer’t le’n se go kêm tò kekek le’n wa? 26Ke nè á sei asikum ra nyan ke ndêin bè titeke nè nga lé ɓaa, ké bain á adi kêm si tò kekek dè gute nyange ke rang’t wa? 27Undei kum si an-in putu ndujege. Dé ra kule d’ɔr yàl-yàl lé a, d’ojo kubu lé a tɔ. Nè man m’ede sei ndàt, kubu ngarge le Salomon maji ngain kuwe. Nè né è bè géa è ke karé bè ke maje tite putu ndujege nè nga goto. 28Sei ke kundekêm le si tin lé: mu ke walé ke barè d’a d’ile’n poro kade por ró’n rák-rák ɓai géa Nube ade in mande ɓila, nè à ké sei tá ase kade sei kubu ulei ra si’t lé wa? 29Nè sei ɓaa, nyan ke a usei éké nyan ke a an-in nga, adi kêm si tò kekek dè sang de’t se ndɔge malang lé. 30Nyange nè malang nga, è dooge ke dè nang nè ke geri Nube lé á ei njé sang de se ndɔge-ndɔge. Nè sei ɓaa, Bɔ jéi ger mbak titeke j’awi ndoo nyange nè nga. 31I sangi Konɓee le Nube kété ɓita Nube à ade sei gute nyange ke rang malang ke awi ndoo’n. 32– Sei ke i tooi asinan se nyankulge le’m ke tchɔp bè nga, ebi’t ɓel; tede Bɔ jéi ade sei Konɓee le’n. 33Igi nyankingege le si, inyei nar’n uwei noje se njéndooge. Uri mbu narge ke à ndis lé. I kebi nyanbawge ke à tò sár se non danrán. E loo ke njéɓog-ge à teei tutu lé a, gide à unde nyan tutu tuju’n lé a tɔ. 34Tede loo ke nyanbaw lei tò tutu nga, è loo’n nè kuwe á ɓengrei è dè’t tɔ. 35– I ndii se kubu ra kule ra si’t. Umi mine ɓede si’t a, adi lampe le si ndogó kotong a tɔ. 36I rai tite dooge ke nginei kuwe de ke à in loo dann ɓee’t le ree. Loo ke è à ree kunde tà kei ɓaa, ke loon’t nè kuwe d’a teen tà kei kade’n. 37Ngann njéndige nè nga, loo ke kuwe de tel à ree á inge de dè ɓi’t lé ɓaa, ra de à nel de. Kerɔte kuwe, man m’ede sei ndàt, kuwe de à ule kubu ra kule rann’t, à uwe ɓede’n se ndar le ɓar de kade de nyankuse kade d’use a tɔ. 38Ke nè á kuwe de ree dann ndɔ bɔp éké se non kunje ke desêin á inge de dè ɓi’t lé ɓaa, ra de à nel de. 39Ooi tà nè maje: ke nè á kuwe-kei ger kàde ke njèɓog à ree’n kété ɓaa, gar-gar à inye’n kade mbute kum bolè ɓoge’n nyange ke kêm kei le’n lé. 40Sei géa, i ndii dè nja si’t kekek tede man ke m’ee Ngonn doo nga, m’a m’tel ree dè kàde ke sei giri titeke m’a m’tel reenn’t lé. 41Pierre deje Jésu ede nè: – Kuwe-ɓee, gostà nè nga, i tam ɔje’n dè jé jè kuwe éké ɔje’n dè dooge malang wa? 42Kuwe-ɓee tel deje Pierre ede nè: – Bè ɓaa, ké nan è ngonn njèndi ke gang tchat ke maje kule wa? E è ke kuwe’n à ɔr’n kunde’n ke njèkan dè ngann njéndi madennge’t, kade nobo de nyankuse ke ɔje dè de-dè de se kàde’n a, se ndɔ karé-karé malang a tɔ. 43Ngonn njèndi nè ke ra kule ke kuwe’n um jinn’t se ngang’n lêrlêr ade ree inge’n dè’t nga, ra’n à nel’n kuwe. 44Kerɔte kuwe, man m’ede sei ndàt, ngonn njèndi ke ra titeke bè nga, kuwe’n à ɔr’n kunde’n ke njèkan dè nyange le’n malang. 45Ke nè á ngonn njèndi nè nga tam kêmn’t ede nè: «Kuwe’m à tel ree kalang lé ɓai.» Nè loo ke è unn gir kuse nyan se kain yibe ade al dè’n, è ur dè gute ngann njèndi madennge’t ke dingem se njé ke dinye tunde de, yal de karé-karé. 46Kuwe’n à tel tee dènn’t pan ndɔ karé se kàde ke è ger lé. Kuwe’n à ide’n nduju reend-reend a, à ra se’n nyan ke d’ade ra se njékaltàge tà Nube’t nga a tɔ. 47Ke nè á ngonn njèndi ger nyan ke kuwe’n ndige kade ra, nè è uwe dè nja nyan karé lé ɓaa, d’a d’unde’n gang ra’n dàp-dàp. 48Nè ngonn njèndi ke ger nyan ke kuwe’n ndige lé nga, ke nè á ra nyan ke kum kade d’unde’n ngain géa, d’a d’unde’n ase loon’t bè. Nanan ke d’ade’n nyan ngain ɓaa, d’a tel deje’n go ngain tɔ. Nanan ke d’um nyan jinn’t ngain ɓaa, d’a deje’n go ngain tɔ. 49Jésu ede de ede nè: – Man m’ree se por m’ile dè nang nè. Ke nè á por ke m’ree’n m’ile nga taa loo’t ɓaa, ké nyan ke m’aw ndoo’n è ri ɓai wa? 50Gar-gar nyankêmkon à pujur dè’m tite doo ke d’ule’n manné njonm bè. Nyan nè nga à nder dèm’t sár kade aw’n loon’t deĵ. 51Ké sei i giri kêm si’t edi nè: ree’m ke m’ree dè nang nè nga, m’ree le kade dooge ndii se kêmlom wa? Ḿ-m̀ è bè lé. Man m’ree se tà tin nan m’ile dann dooge ke dè nang nè. 52Unn gir ɗarinè, loo ke dooge mi ndii nan’t kêm kei karé ɓaa, njé ke mutege dann de’t d’ade tin se njé ke jooge a, njé ke jooge d’ade tin se njé ke mutege a tɔ. 53Bɔ ngonn à tin se ngonn’n ke dingem, ngonn ke dingem à tin se bɔ’n, kon ngonn à tin se ngonn’n ke dinye, ngonn ke dinye à tin se kon’n. Kon dingem à tin se wum’n ke dinye, dinye à tin se kon ngaw’n. 54Taɓai Jésu ede kosdoo-bulege ede nè: – Loo ke an-in ndi in ngiring-ngiring loo kur’t le kàde ɓaa, ke loon’t nè kuwe sei tami edi nè: «Nain ngɔr ɓaa ndi à ree» ɓaa, ndi ree kuwe tɔ. 55Dɔ-dɔ loo ke sei an-in nel ule ɔje dè jikon ɓaa, sei tami edi nè: «Loo à unn gir tunge ngain» ɓaa, loo tunge’n kuwe tɔ. 56Sei njékede gosge, sei geri loo ter nyan ke nange ke dè nang nè se ke danrán a tɔ. Nè ké bain á sei mbati teri nyange ke teei ɗarinè nga wa? 57Ké bain á sei kuwe in-in se kêm si ɔji nyan ke kum ra lé ɓai wa? 58Loo ke i se njè kaw sei se tà awi ke non njègangtà’t ɓaa, loo ke i nain-in rebe ɓai kuwe ute rai kalang le kum se’n nan’t. Ke nè á i ra titeke bè lé ɓaa, bainléa à oso sei non njègangtà’t kade d’uwei d’ilei dangai’t njing. 59Man m’ede sei ndàt, a i tee dangai’t lé sár kade uge kure nè nga ndát-ndát kade sisi karé géa à nain dèi’t lé.

will be added

X\