LUC 11

1Ndɔ karé bè, Jésu ndi ɔje tà se Nube kêl loo karé’t bè. Loo ke ɔje se’n tà gir gang ɓá ɓaa, njèkuwe-gir’n karé ede’n ede nè: – Kuwe-ɓee, i ndó jè rebe kɔje tà se Nube titeke Jean ndó’n pajage le’n bè. 2Jésu ede de ede nè: – Loo ke a ɔji tà se Nube ɓaa, i tami edi nè: «Bɔjé, Maje kade dooge malang geri titeke rii è ri ke tò se ninn’n gai; Maje kade on ɓee dè dooge’t. 3Ade jè nyankuse ke j’aw ndoo’n se ndɔ jé-ndɔ jé. 4Ade kêmi tin mbit dè kaiyage’t le jé, titeke jè kuwe géa j’ade kêm jé tin mbit dè dooge malang ke rai se jé majelé. Inye jè ade j’oso dann nyan su’t lé.» 5Jésu unn tà karé ke rang ede njékuwe-girnge ede nè: – Bainléa doo karé bè dann si’t aw se made’n ke è tár’n ngain, bainléa è ree ingei dann ndɔɔ bɔp deji ede nè: «Ade m’tunei wal-mur mute, 6tede made’m karé in mba’t ree tee dèm’t pan, ade m’an nyan karé bè ke le kade’n use lé.» 7Bainléa made’n ke tò kêm kei nga à kile’n dè’t kede nè: «I ndɔje’m lé tede jè se ngann’m j’utu tàbit kei dè jé’t a, jè tò nang ɓá, m’asekum kin dɔ kadi mur ke i deje’m lé.» 8Ma m’ede sei, doo nè à in dɔ tede kade’n nyan dum dè è ke aw ndoo’n. Gar-gar à in dɔ le kade’n nyan ke è deje’n tede k’ee ke ei made nange lé ta, nè tede ndɔje ke è ndɔje’n ke kété-kété. 9Nè man m’ede sei: I kɔi nyan ke awi ndoo’n ɓaa, d’a d’ade sei. I sangi nyan ke awi ndoo’n ɓaa, a ingei. Undei tàbit kei ɓaa, d’a d’ɔr kade sei a tɔ. 10Nanan ke kɔ nyan ke è aw ndoo’n ɓaa, d’a d’ade’n; nanan ke unde tàbit kei ɓaa, d’a teen kade’n a tɔ. 11Ké bɔ ngonn ke ra dann si’t á ngonn’n deje’n kanje le kuse ɓaa, è à kunn li jênênn tá kade’n taa’n gute kanje wa? 12Eké bɔ ngonn ke ra dann si’t á ngonn’n deje’n kaw-kunje le kuse ɓaa, à kunn kuju-nang tá kade’n taa’n gute kaw-kunje wa? 13Sei ke njékêmyêrge gé ɓai á i geri kade nyange ke maje ngannge nè a, ké bɔ jéi ke ndi danrán à asekum kade Ndil-Kêmnda njé ke dejii lé wa? 14Ndil ke majelé tò kêm dingem karé’t. Ndɔ karé bè, Jésu rɔ ndil ke majelé ke ɔge dingem nè tam tà nga kɔke. Loo ke ndil ke majelé nè unde loo tee nata ɓaa, dingem nè unn gir tam tà. Kosdoo-bulege ke ndai loon’t nga, ndil de tee an-in soin-soin. 15Nè njé ke nange dann de’t edi nè: – Jésu rɔ ndilge ke majelé se tɔgmong le ngar le de ke ri’n nè Béelzébul ade’n. 16Njé ke rang ulei kêm Jésu le kade ra nyankɔbe tɔje’n de titeke tɔgmong le’n nga in ra Nube’t danrán kuwe. 17Nè Jésu ger tàgirge le de mbak. E ede de ede nè: – Ke nè á dooge ke kêm ɓeekon ke karé in-in kayai nan loo joo ɓaa, ɓeekon nè à tel k’ee ndube. Keige ke kêm ɓeekon’t nè nga géa à jɔréi nang bɔrɔr- bɔrɔr a tɔ. 18Ke nè á njé ke Mweisekar’m lé on de in-in kayai nan danné loo joo rɔi nan ɓaa, ké tɔgmong le Mweisekar’m lé à tò kuwe wa? Tede sei i tami edi nè: «M’rɔ ndilge ke majelé se tɔgmong ke ngar le de Béelzébul ade’m.» 19Ke nè á m’rɔ ndilge ke majelé se tɔgmong le Béelzébul ɓaa, ké nan ade tɔgmong pajage le si á rɔi ndilge ke majelé nga ta wa? Dé pajage le si nè kuwe d’a d’in se si dè tà tam si’t nè ɓai. 20Nè ke nè á m’rɔ ndilge ke majelé kɔke se tɔgmong le Nube ɓaa, Nube on ɓee dann si’t nè ɓá ta. 21Ke nè á doo ke njètɔge ndi se nyankatege le’n jinn’t ngonm’n dè kei le’n ɓaa, nyankinge’n ke kêm kei à tò jêke^. 22Nè loo ke dingem made’n karé ke rang ke tɔg’n dum dè le’n tee pitring oso rɔ rann’t á tête’n rɔ ɓaa, à táa nyankatege le’n ke unde kêm’n dè’t nga jinn’t ndát-ndát. Nyange malang ke è táa jinn’t nga à nobo dooge kɔke. 23Nanan ke nain se’m lé ɓaa, è njèkɔse se’m tà. Nanan ke ra se’m dè kɔse nja batege nan’t lé ɓaa, è njè sanrin de kɔke. 24Ndil ke majelé unde loo tee kêm dingem karé’t aw ile gam-gam kêm dilege’t sang loo kule dè’n. Nè loo ke inge loo ke le taa’n kebe lé ɓaa, è tam kêmn’t ede nè: «M’a m’tel kaw gugu kêm kei le’m ke ndɔ ke m’unde loo m’tee tutu kɔke nga.» 25Loo ke è ɔse wan tel ree ɓaa, è an titeke kêm kei nè nga d’ɔi d’ade unju náng-náng. 26Loo ke è an kêm kei tò wei nal ndi tutu ɓaa, è ɔse wan tel aw ɓar ndilge ke majelé ngain dumi è ɓai, ji sejimute um de dènn’t ree ndii’n kêm kei nè nga gugu. Doo nè nga, loo tɔl tà’n ɓaa, kêm’n tel majelé ngain dum è ke kété ɓai. 27Loo ke Jésu ndi à tam tà nè nga bè-bè ɓai ɓaa, dinye karé in tam se’n se ndu’n ke bòi dann doobulege ede nè: – Dinye ke njèkoji kule mba tài’t nga, ra’n à nel’n kuwe. 28Nè Jésu ile’n dè’t ede nè: – Nè dooge ke ra de à nel de ke get-get nga, è njé ke ooi tà le Nube a, an-in dè sêw-sêw a tɔ. 29Doobulege njin nan ra Jésu’t njàng-njàng. E unn gir kede de tà ede nè: – Sei ke njé kêm majelége ke ɗarinè nga, i deji nyan-tɔje ke in ra Nube’t. Nè nyan-tɔje karé bè géa, Nube à ra kade an-in lé. Nyan-tɔje le Jonas ke ndɔ ke an-in kété ɓá non kuwe ase . 30Ndɔ ke Jonas, njèribe-dè-tà ke tà Nube’t è nyan-tɔje tede le dooge ke kêm ɓee-bò ke Ninive. Man ke m’ee Ngonn doo nga géa, m’a m’ee nyan-tɔje tede le si sei dooge ke ɗarinè titeke bè tɔ. 31Ndɔ ke dinye le ngar ke ndi se ke dè jikon nga in ngei nang’t nú ree oo tà kumkunju le ngar Salomon. Ndɔ gangtà’t ɓaa, è dinye nè nga kuwe à in le kile tà dè dooge ke ndii dè nang nè ɗarinè. An-in! doo karé ke bò dum ngar Salomon nda dann si’t laa. 32Dooge ke kêm ɓee-bò ke Ninive nga, loo ke ndɔ ke Jonas njèribe-dè-tà ke tà Nube’t ile mber ade de ɓaa, dé tur hal de. Ndɔ gangtà’t ɓaa, dé nè kuwe d’a d’in kile tà dè dooge ke ei dèkasnange ke ndii dè nang nè ɗarinè. An-in! doo karé ke bò dum Jonas è dann si’t laa. 33Doo unde por tu lampe’t ɓaa, à tel kaw kule mbonreen loo’t éké à sebe debe dè’t lé tɔ. Nè è à nan dɔ tà kagenn’t le kade njé ke reei kêm kei an-in loo njai. 34Kum jéi tò asenan se lampe le danra jéi. Loo ke kum jéi an loo njai ɓaa, danra jéi bere mbak è ke unju. Nè loo ke kum jéi majelé ɓaa, danra jéi bere mbak ndi dann tilkus’t. 35J’undei kumkunju dè ra jéi’t le kade lookar ke kêm jéi’t tel è tilkus lé. 36Ke nè á danra jéi bere mbak ndi dann lookar’t anje kade kêl’n karé ndi dann tilkus’t ɓaa, danra jéi bere mbak ndi dann lookar’t bɔndum titeke lampe ade loo ndoin’n dè jéi’t kotong bè. 37Loo ke tà nain tà Jésu’t ɓai ɓaa, Pharisien karé bè ɓar’n kade aw se’n kêm kei le’n use se’n nyan. Jésu aw se’n kêm kei le’n use se’n nyan. 38Loo ke Pharisien nè an titeke Jésu use nyan nal togo ji’n kété ɓaa, tà ige’n sêl. 39Nè Kuwe-ɓee ede doo nè nga ede nè: – Sei Pharisienge, sei i togoi gide nyankain mannge se nyankuse nyange adi unju nyang-nyang nè ngur banm dooge táa nyan le de ji de’t a, se kêmyêr rusu kêm si njin-njin. 40Sei njé kêm tɔ kuju tà lége, ké è Nube kuwe á ra gide nyan a, kêm nyan a tɔ lé wa? 41Ngarankêm si tá adi Nube ke nyan-noje ɓaa, nyankain mannge se nyankuse nyange le si malang à unji. 42Sei Pharisienge, a an-in ɓai! Kam nyange ke ri de nè menthe se gɔje-ndube se kam wubu géa, ke nè á è dɔg ɓaa ɔri tà karé adi Nube. Mbi targe malang géa, ke nè á è dɔg ɓaa, unni karé adi Nube a tɔ. Nè nyanra ke se dè naje’n a, tár Nube a tɔ nga, sei an-in de ke nyan lé. Nyanra ke se naje’n se tár Nube nga, ei nyange ke a i rai de gar-gar kété ɓita nyange ke rang à orèi go de ɓai. 43Sei Pharisienge a an-in ɓai! Sei ndigi ndii kété non dooge’t kêm kei kebe nange’t a, sei ndigi kade dooge rai sei lapya ndá-looge’t a tɔ. 44Sei nga a an-in ɓai! Tede i tooi asinan se dè ɓade ke loo ke dooge an-in lé njiyei dè’t nal ger. 45Doo karé dann njékɔrgir gute-nduge deje Jésu ede nè: – Njèndó dooge nyan, tàge ke i tam nè nga, è titeke unde jè nan’t mbak i taje jè. Ké an bè lé wa? 46Jésu ile njèkɔrgir gute-ndu nè nga dè’t ede nè: – Sei njékɔrgir gute-nduge nga géa, a an-in ɓai! Sei unni nyan-kotoge ke wɔi undei dè dooge’t. Nè ngaw ji si géa ulei ɔdii nyan-kotoge nè nga lêm lé. 47Sei nga a an-in ɓai! Tede sei undei kei dè ɓade njéribe-dè-tàge ke tà Nube’t adi maje ndêi. Nè dé ke sei undei kei adi de adi maje ndêi nè nga, è bɔsige á ndɔ ke tɔli de. 48Loo ke sei rai titeke bè nga, sei umi nan’t bɔk se bɔsige dè nyan ra de’t. Ei ei njétɔl njéribe-dè-tàge ke tà Nube’t kété, nè sei ɓaa, sei njé ra dè ɓade dege kade unju nyang-nyang. 49Gir’n ke nè á, Nube ke njèkumkunju tam’n tà kété ɔje’n dè si ede nè: «M’a m’ule se njéribe-dè-tàge se njékawkulege kade de. D’ade tɔl njé ke nange a, d’a d’ɔr njé ke nange kororoi a tɔ.» 50Njéribe-dè-tàge ke tà Nube’t malang ke d’ile mese de nang unn gir loo kunde gir nang’t sár tee’n ɓila nga, Nube à ade kure’n à ɔde kum dooge ke ndii dè nang nè ɗarinè ɓai. 51Unn gir dè Abel ke d’ile mese’n nang kété sár tee’n dè Zacharie ke ndɔ ke dé tɔl’n dadann ɗinger loo nyankuje-mese se kêm kei ke tò se ninn’n. Oiyo, mese dooge nè malang ke an-in nang nga, man m’ede sei ndàt, Nube à ade kure’n à ɔde kum dooge ke ndii dè nang nè ɗarinè ɓai. 52Sei njékɔrgir gute-nduge, a an-in ɓai! tede sei ɔri lakêlé tà rebe nyanger ke ɔje dè Nube nga ji si’t. Sei géa ilei nja si tu rebe’t nè nga lé a, njé ke ndigi kawi se rebe nè nga géa, ɔgi de a tɔ. 53Loo ke Jésu unde loo tee nata kêm kei le Pharisien nè nga ɓaa, Pharisienge ke ei njékɔrgir gute-nduge se gute de ke rang nga, wong ra de dè Jésu’t ngain ade osoi rann’t dejii tàge bule adi tà tée tànn’t pɔt-pɔt. 54D’um’n titeke bè tede le kile’n tà dènn’t se go tàge ke à tee tànn’t nga.

will be added

X\