LUC 1

1Dooge bule unni gir ndangi sertà ke ɔje dè nyange ke kété teei dann jéi’t, 2se gonan-gonan titeke njé ke an-in se kum de ɔri adi jéi. Njé ke kété an-in nyange nè se kum de nga, ɓila teli ei njékile mber Tà ke Maje le Nube. 3M’nder gir nyange nè nga mari. Ɗarinè, man géa, m’an titeke maje kum ndang tà’n kunde non-in’t se gonan-gonan le kade i Théophile ke njè maje dum. 4M’ra titeke bè le kade i ger’n titeke nyange nè ke d’ɔr ser’n d’edi nga, ei nyange kerɔte. 5Nyange nè malang teei kêm lo ke ngar Hérode ee’n njèkonɓee ke ɓeekon ke Juda. Njèkuje nyan-mese karé bè ndi tutu ri’n nè Zacharie. E dann njé ke le njèyo’t Abia. Dinye le’n ri’n nè Elisabeth, è girkà le Aaron maw njèkuje nyan-mese. 6Zacharie se dinye le’n Elisabeth ei njé ra nyange ke danné sêw tàkum Nube’t a, ei njiyei se go gute-ndu Nube têr-têr a tɔ. 7Nè ei oji ngonn lé tede Elisabeth è kuju. Ei joo mbak ɓugei gɔk-gɔk ta. 8Ndɔ karé bè, Zacharie ndi à ra kule kuje nyan-mese non Nube’t tede è ndɔ le njé ke le’n. 9Se go nyanra njékuje nyan-mesege ke ei ra dɔ-dɔ, ei naji nan tà le kan-in ké nan á jala à ɔse’n dann de’t le kade ra kule kêm ndɔn’t nè wa? Gir’n ke nè á d’ɔr’n Zacharie le kade ró katchatcha kêm kei ke tò se ninn’n le Nube. 10Gute kosdooge malang ndai nata kêm kei le Kuwe-ɓee à ɔji se’n tà. 11Doo ke danrán ke Kuwe-ɓee ule’n tee hɔi ke ra Zacharie’t, è nda se ke dè jikon ɗinger loo ró katchatcha’t. 12Loo ke Zacharie an’n ɓaa, tà ige’n sêl ade ɓel unde’n ndàt gang’n. 13Nè doo ke danrán ke Kuwe-ɓee ule’n nga ede Zacharie ede nè: – Ebe rai ɓel, Zacharie, ndinge ndoo lei oso mbi Nube’t. Dinye lei Elisabeth à oje ngonn ke dingem. I a kile ri’n nè Jean. 14A i ra ranel ngain dè koje ngonn’t nè nga. E i á se kari lé, nè dooge bule d’a d’al ra de sei nan’t ɔje dè koje ngonn nè nga. 15Tede à è doo ke bò tàkum Kuwe-ɓee’t. E à kain yibe nduu ke ate éké yibe ke ate karé ke rang lé a tɔ. Loo ke è nain kêm konn’t ɓai kuwe Ndil-Kêmnda taa kêm’n pel-pel. 16Ngonn nè nga à ade ngannkà Israelge à ɔsi wan teli kilei koje dè Kuwe-ɓee’t le de. 17E à njiye kété non Nube’t se tɔgmong le Ndil a, se tɔgmong ke Elie njèribe-dè-tà ke tà Nube’t ra’n kule kété mari. E à um bɔ ngannge nan’t se ngann dege. E à tel njékaltàge kade ei njéra nyan danné sêwge. E à uwe dè nja njé ke nange dann kosdooge ke Israel. E ra titeke bè le kade dé ndi dè nja de’t tchên le kuwe Kuwe-ɓee ke ra de’t a tɔ. 18Zacharie deje doo ke danrán ke Nube ule’n ede nè: – Ké ri á à ade m’a m’ger titeke tà ke ede’m nga à è tà kerɔte wa? Tede man jè se neen’m jè ɓuge ngain ta. 19Doo ke danrán ke Kuwe-ɓee ule’n nga tel ile Zacharie dè’t ede nè: – Man m’ee Gabriel ke njè nda non Nube’t se ndɔge-ndɔge. E Nube kuwe á ule’m rai’t le kade m’ɔje sei tà a, le kade m’ile mber Tà ke Maje nè nga m’adi a tɔ. 20Nè titeke i um kêmi dè tà’t ke m’edi nga lé ɓaa, ɗarinè kɔbi à utu, i asekum tam tà lé sár kade nyange nè ke m’edi tà’n aw’n loon’t deĵ ɓita. 21Loo ke Zacharie ndi oo tà le doo ke danrán ke Nube ule’n nga ɓaa, gute dooge ke ndii nginei nga, kêm de tò kekek tede è nain kêm kei ke tò se ninn’t le Kuwe-ɓee ade kur’n heb ɗak. 22Loo ke Zacharie unde loo tee nata ɓaa, è asekum tam tà kede de lé. Mbi’n se kɔbe’n utu ade yei ji’n ɓàk-ɓàk karè. Loon’t nè ɓita kum kosdooge gang reng ade geri titeke nyan-pinde tee dènn’t kêm kei le Nube ɓai. 23Ndɔ ke Zacharie tɔl ngang kule le’n kêm kei’t le Nube mbas ɓá ɓaa, è tel aw kêm kei le’n. 24Mbɔr go’t ɓaa, neen’n Elisabeth ndann ngonn. Elisabeth ɓɔyɔ ra’n kêm kei ase nan mi. E tam ede nè: 25– An-in nyan ke Kuwe-ɓee ra tede tà le’m. Ɗarinè è ɔr rasɔl dèm’t tàkum dooge’t malang. 26Loo ke Elisabeth ndann ngonn ra nan mute-mute ɓaa, Nube ule Gabriel, doo ke danrán kêm ngonn ɓee karé ke ɓeekon ke Galilée, ri’n nè Nazareth. 27Doo ke danrán nè nga Nube ule’n ra ngomande karé ke è njènong le dingem ke ri’n nè Joseph. Joseph nga è girkà le ngar David. Ri ngomande ke nal ger dingem ɓai nè nga, è Marie. 28Doo ke danrán ree ra Marie’t ede’n ede nè: – M’rai lapya, i nga Kuwe-ɓee uwe sei noje a, tɔse kum’n dèi’t a tɔ. 29Loo ke Marie oo tà nè bè ɓaa, tà ige’n sêl. E deje ra’n tà dè ɓengren’t ede nè: – Ké lapya ke bain á bè wa? 30Doo ke danrán ke Kuwe-ɓee ule’n nga ede Marie ede nè: – Marie, ebe rai ɓel tede Nube tári ngain. 31An! ɗarinè i a ndann ngonn, i a koje ngonn ke dingem, a ile ri’n nè Jésu. 32A è doo ke bò a, d’a ɓar’n Ngonn Nube ke njèdum dè nyange malang. Kuwe-ɓee Nube le jéi à ade à è ngar titeke ndɔ ke unn’n ndu’n ade kà’n ngar David. 33Ngonn nè nga à on ɓee dè kosdooge ke Israel’t sár se non. Konɓee le’n nga, ngei’n goto. 34Marie tel deje doo ke danrán ke Nube ule’n nga ede nè: – Dingem ɔde ra’m ndɔ karé lé. Ké m’a m’ndann ngonn titeke bain wa? 35Doo ke danran nè nga ile Marie dè’t ede nè: – Ndil-Kêmnda à ra kule rai’t a, tɔgmong le Nube Njèdum dè nyange malang à sebe dèi’t titeke ndil oso’n dè doo’t bè. Gir’n ke nè á, ngonn ke tò se ninn’n ke a oje’n nga d’a ɓar’n Ngonn Nube. 36An! bêni Elisabeth ke d’an’n ke kuju nga, ndann ngonn ke dingem dè ɓugenn’t ase nan mute-mute ɗarinè ta. 37Tede tɔgmong le Nube asekum ra nyan malang. 38Marie tel ile Gabriel dè’t ede nè: – Man m’ee ngonn njèndi le Kuwe-ɓee ke dinye karè. Maje kade è ra se’m titeke i tam’n. Ke loon’t nè kuwe Gabriel inye Marie ɔte aw. 39Kêm ndɔn’t nè kuwe Marie ɔse nang kalang in aw ngonn ɓee ke tò dè mbalge ke ɓeekon le Juda. 40E aw kêm kei le Zacharie ra lapya Elisabeth. 41Loo ke Elisabeth oo ndu Marie ke ra’n lapya ɓaa, ngonn ke kêmn’t unn gir tɔse’n gùl-gùl. Ke loon’t nè kuwe Ndil-Kêmnda taa kêm Elisabeth pel-pel. 42Elisabeth tam tà se ndu’n ke bòi beng ede nè: – Nube tɔr ndu’n dèi’t dum dinyege ke rang malang a, ndutɔr le’n nè nga à nain se ngonn ke a oje’n a tɔ. 43Ké man nga m’ee nan kade Kuwe-ɓee le’m ree ram’t wa? 44An! loo ke ndui ke i ra’m lapya nga oso mbim’t ɓaa, ra ngonn ke kêm’t nel’n ade tɔse’m gùl-gùl. 45Rai neli tede i naje se rai dè nyange ke Kuwe-ɓee Nube ule doo ke danrán ade edi nga lé. I um kêmi dè’t titeke à aw loon’t deĵ kuwe! 46Marie tam ede nè: – Ngarakum ra’m ile riɓar dè Kuwe-ɓee’t a, 47Ngarakum ra’m ra ranel dè Kuwe-ɓee Nube ke njètaa’m tà yo’t a tɔ. 48Man m’ee ngonn njèndi le’n ke dinye karè nè è gir dèm’t. Unn gir’n ɗarinè sár ke kété, girkoje dooge ke ɔsi gonan-gonan à ɓari man dinye ke njèranel. 49Tede Nube ke tɔgmong le’n dum dè nyange malang ra nyange ke tò ɓel tede’m. Ri’n è ri ke tò se ninn’n gai . 50Kêmkanm le’n nga, ngei’n goto tede le njé ke ilei koje dènn’t. 51E ra nyange ke bò se go tɔgmong le ji’n. E jɔrè ngarge ke njé tɔgmong-ge 52nang bɔrɔr-bɔrɔr dè kutu-ngarge’t, nè è unn njétɔgmong-ge lé unde de dɔ ɗáng. 53Njé ke ɓo ra de nga, è uwe se de noje se nyange ndàj-ndàj, nè è rɔ njényan kingege ji de karè ɗáng-ɗáng. 54E din kosdooge ke ei Israel, ngonn njèndi le’n, tede kêm’n olé dè kêmkanm’t le’n titeke è unn’n ndu’n ade Abraham kété mari nga. 55Ndukunn nè nga tò njáng tede le ngannkà Abrahamge. 56Marie ndi se Elisabeth kêm kei le’n ase nan mute ɓita tel aw ɓéee le’n ɓai. 57Loo ke ndɔ koje ngonn le Elisabeth ase ɓá ɓaa, è oje ngonn ke dingem. 58Loo ke njémade tà keige le Elisabeth se njénojege le’n an-in titeke Kuwe-ɓee ra kêmkanm se’n ɓaa, rai ranel se’n nan’t. 59Loo ke ngonn ke kide nè ra ndɔ ji sejimute, njèkon’t sɔsɔ ɓaa, dé ree le kuje tà mɔte’n. Dé ndige le ɓar’n se ri ɓɔ’n Zacharie. 60Nè kon’n ede de ede nè: – Ḿ-m̀, j’à ɓari n’ee Jean tá. 61Dé tel d’ile’n dè’t d’ede nè: – Dann njénojege’t lei malang nga, doo karé ke ri’n nè Jean goto. 62Dé tel dé deje Zacharie tà se ji de d’ede nè: – Ké ngonni nga i ndige kade jè ɓarii nan wa? 63Zacharie ade dé ree se bà ndang magtub d’ade’n. E ndang tà kêm bà’t nè ede nè: – Ri ngonn nè nga è Jean. Dé malang tà ige de sêl dè ri ngonn’t nè nga. 64Ke loon’t nè kuwe ndon Zacharie ɗile warar ade teen tà’n tam’n tà yarar-yarar ɗɔi’n Nube. 65Ɓel unde njé ke kêm ngonn ɓee’t nè nga ndàt gang de malang. Ser nyange nè nga oso se loo mbit-mbit kêm ɓeege ke tooi dè mbalge’t le ɓeekon le Juda bere mbak. 66Dooge malang ke ooi ser nyange nè nga, giri tà kêm de’t edi nè: – Ngonn nè nga ké ndɔ ke rang à è doo ke bain wa? Tɔgmong le Kuwe-ɓee gete’n se ndɔge malang. 67Ndil-Kêmnda taa kêm Zacharie bɔ ngonn nè nga pel-pel ade ɔr’n gir nyan ke Nube tɔje’n ede nè: 68– Kuwe-ɓee Nube le kosdooge ke Israel nga, maje kade dooge malang ilei riɓar dènn’t. Tede è ree din jéi balkum kosdooge le’n ke uge dè jéi. 69E ade njètaa dè dooge ɔse nang in dann girkà’t le David ke kété è ngonn njèndi le’n nga. 70E tam tà nè nga kété mari se go rebe ke ra njéribe-dè-tàge’t le’n ke tooi se ninn’n ede nè: 71N’a n’taa jéi ji njébange’t le jéi a, se ji dooge’t malang ke ɔri jéi njêt nga a tɔ. 72Nube ra se jéi kêmkanm titeke bè tede kêm’n olé dè mann-ra’t le’n ke tò se ninn’n ke è mann’n ra’n ade kà jéige kété mari nga. 73E ade kêm’n olé dè mann-ra ke è mann’n ra’n ade kà jéi Abraham ede nè: N’a n’taa jéi ji njébange’t le jéi. 74Loo ke è uwe jéi wont ɔr jéi ji njébange’t le jéi ɓá ɓaa, è ade jéi tɔgmong le ra’n kule kade’n se kêmnda káng. 75Nube ndige le kade jè rai nyan ke se dè naje’n tàkumn’t sár ngei ndɔ ndikumgajer le jéi dè nang nè. 76Ngonn nè nga d’a ɓar’n njèribe-dè-tà ke tà Nube’t ke njè dum dè nyange malang. Ngonn nè nga à njiye non Kuwe-ɓee’t le gɔl rebege le’n ke à ree’n. 77E ade balkum kosdooge le’n à geri titeke Nube aje de a, à ade kêm’n à tin mbit dè kaiyage’t a tɔ. 78Tede Nube le jéi nga, kêmkanm taa ra’n pel-pel. E takul kêmkanm le’n á ade lookar le’n in-in’n danrán nú ree ndogó’n dè jéi’t. 79Lookar nè nga à ndogó dè njé ke ndii dann tilkus’t se njé ke ndii tà yo’t. Lookar nè nga à ɔr non jéi dè rebe ndi se kêmlom dann nan’t a tɔ. 80Ngonn nè nga, ra tɔge ke kété-kété a, hal’n ɓeɓer a tɔ. E ra ɓee kêm dile’t sár kade ndɔ ke rang à kile’n ra’n ke nata tàkum dooge ke Israel.

will be added

X\