JEAN 20

1Ndɔ ke njè kutu go ndɔ taa kebe, Marie ke ɓee le’n è Magdala tee se ndɔgé aw dè ɓada se loo ke tò gundu-gundu ɓai. E an titeke doo ndubri kuberi mbal ke bòi ke d’utu’n tà be-ɓade nga ile rang. 2Marie ɔse wan tel se ngɔde ree ra Simon Pierre’t se njèkuwe-gir-Jésu karé ke rang ke Jésu ndige’n ngain. Marie ede de ede nè: – D’ɔr ninn Kuwe-ɓee Jésu kêm bolè mbal’t nga kɔke. Nè jè ger loo ke d’ile tutu lé. 3Pierre se njèkuwe-gir-Jésu karé ke rang nè nga, teei awi dè ɓada. 4Ei joo mbak unni gir naji nan ngɔde. Nè njèkuwe-gir-Jésu karé ke rang nè nga an-in ngɔde kalang tee dè ɓada kété non Pierre’t. 5E ɗuge nang ɓaa an tà kubuge ke dé ɓir’n Jésu á tooi nang njɔk karè. Nè né è bè géa, è aw kêm be-ɓade’t lé. 6Go’t gugu ɓita Simon Pierre ree ke le’n. E ree dɔ aw kêm be-ɓade’t. Simon Pierre an tà kubuge ke dé ɓir’n Jésu tooi nang njɔk karè tɔ. 7Tà kubu ke dé dɔ’n dè Jésu nga, d’udu kɔtch-kɔtch d’ile gai loo ke rang’t se tà kubuge ke dé bir’n. 8Go’t gugu ɓita njèkuwe-gir-Jésu karé ke rang ke an-in ngɔde aw dè ɓada kété non Pierre’t nga aw kêm be-ɓade’t ke le’n tɔ. E an nyange nè se kum’n. Gir’n ke nè á è unde’n kêm’n dè kunde loo tee dann njé ke koo’t le Jésu. 9Magtub ke tò se ninn’n tam kété mari ede nè: Jésu à unde loo tee dann njé ke koo’t gar-gar. Sár ɓila njékuwe-gir-Jésuge geri gir tà nè njai lé ɓai. 10Njékuwe gir-Jésuge ke joo nè nga teli awi ɓéee. 11Marie nda nata ngɔr se dè ɓade Jésu à non. E non nda gon’n kêm bolè mbal ke dé dubu’n Jésu tutu. 12E an dooge ke danrán joo tulei kubu ke nda káng-káng ndii nang loo ke kété d’unde’n ninn Jésu tutu a, è ke karé ndi loo ke kété dè Jésu sɔbe tutu a, è ke karé ke rang ndi loo ke kété nja Jésu sɔbe tutu a tɔ. 13Dooge ke danrán ke joo nè nga deji Marie edi nè: – Dinye, ké i non tede ri wa? Marie ile de dè’t ede nè: – D’ɔr Kuwe-ɓee le’m Jésu kêm bolè mbal’t kɔke. M’ger loo ke d’aw d’ile’n tutu lé. 14Loo ke Marie tam tà nè nga gir gang ɓá ɓaa, tur ra’n warar ɓaa, è an Jésu nda goon’t. Nè è ger titeke è Jésu nga lé. 15Jésu dejé ede nè: – Dinye, ké i non tede ri wa? Ké i sang nan wa? Marie ke ɓee le’n è Magdala an Jésu ɔje’n njèra kule man-kagege karè. Gir’n ke nè á è ede’n ede nè: – Ngar, ke nè á è i a ɔré ɓaa, ɔje’m loo ke ilé tutu ɓaa, m’a maw le kunné. 16Jésu ɓar Marie ede nè: – Marie! Marie tel tur ra’n warar ke ra Jésu’t ɓar’n se tà hébreu ede nè: – Rabbuni! tel se tà koje jè ɓaa, è «Kuwe’m!» 17Jésu tel ede Marie ede nè: – Ɔde ra’m lé tede m’in m’aw ra Bɔm’t lé ɓai. Nè i ɓaa, i tel aw ede ngakonmge ede nè m’ndi m’aw ke ra Bɔ’m Nube’t. Bɔ’m Nube nga, è Bɔ si sei a, è Nube le si a tɔ. 18Marie ke ɓee le’n è Magdala ree ede njékuwe-gir-Jésuge ede nè: – Man nga m’an Kuwe-ɓee ɓá. Marie ɔr sertàge ke Jésu ede’n ade d’oo. 19Loo sɔlé kêm ndɔ ke njè kutu go ndɔ taa kebe, loo ke ndɔ il ɓá ɓaa, njékuwe-gir-Jésuge kebi nan kêm kei uti tà rebe dè de’t kák-kák tede ɓeli Juipge. Jésu tee hɔi, nda dann de’t ede de ede nè: – Maje kade kêmlom nain se si. 20Loo ke è tam tà nè nga bè ɓá ɓaa, è tɔje dè jinnge se kêl kàde’n ade d’an. Ra njékuwegir Kuwe-ɓee Jésuge nel de ngain tede kan ke an-in nin. 21Jésu tel ede de ede nè: – Maje kade kêmlom nain se si. Ɗarinè, man géa m’ule sei titeke kété Bɔ’m ule’m nga tɔ. 22Loo ke è tam tà nè nga titeke bè ɓá ɓaa, è tó kebe dè de’t puu ede nè: – I taai Ndil-Kêmnda! 23Njé ke adi kêm si tin mbit dè kaiyage’t le de nga, Nube à ade kêm’n tin mbit dè de’t tɔ. Njé ke inyei kaiyage le de dè’t nga, Nube à inye kaiyage le de dè’t tɔ. 24Thomas è ke karé dann njé ke dɔg-gidé-joo’t. Thomas nga d’ile ri tɔy’n nè «Ndunge.» E goto se madennge loo ke ndɔ ke Jésu tel ree’n ra de’t. 25Loo ke Thomas ree ɓaa, njékuwe-gir-Jésuge ke rang edi nin edi nè: – Jè j’an Kuwe-ɓee ɓá. Thomas tel ede de ede nè: – Ke nè á m’an tà dò pondɔ ke jinn’t, m’ule ngaw ji’m tà dò ninge ke kêl kàdenn’t nga lé ɓaa, m’a m’taa tà le si ndan lé. 26Ndɔ sɔsɔ gugu ɓai, njékuwe-gir-Jésuge teli kebi nan kêm kei karé’t. Ei uti tà rebege dè de’t kák-kák. Thomas è se de nan’t kêm ndɔn’t nè nga. Nè né è bè géa, Jésu tee hɔi, nda dann de’t ede de ede nè: – Maje kade kêmlom nain se si. 27Go’t gugu è tur kum’n dè Thomas ede’n ede nè: – An tà dòge ke jim’t. Ule ngonn jii ke kété nè ɔde’n tà dò ninge ke kêl kàdem’t. Ebe’t kunn mbii dè tà’t lei. Unde kêmi dèm’t. 28Thomas tel ile Jésu dè’t ede nè: – Kuwe-ɓee le’m, Nube le’m. 29Jésu tel ile Thomas dè’t ede nè: – I unde kêmi dèm’t tede kan ke an’m karè. Njé ke undei kêm de dèm’t anje kan’m nga, ra de à nel de. 30Jésu ra nyankɔbege ke rang bule ngain tàkum njékuwe-girnge’t. Nyankɔbege nè nga, dé ndang tà’n kêm magtub’t nè malang lé. 31Nè tà nyankɔbege ke dé ndang tà’n kêm Magtub’t nè nga, è tede le kade awi kum si ke kété dè kunde kêm si dè Krist’t titeke è Ngonn Nube nga kuwe. Ke nè á undei kêm si dènn’t ɓaa, a ingei ndikumgajer se non takul ri’n è.

will be added

X\