JACQUES 5

1Ooi! sei baw nyankingege, i non-in ra si kaláng-kaláng undei kon’n ɓat ɓita. Dangte à ra sei tede nyankumndooge ke à gebi nan dè si’t. 2Nyanbaw le si oso kodé ɗɔk-ɗɔk a, kubuge le si géa kinder-kɔde use ndát-ndát a tɔ. 3Nar-ɔr se nar-nda le si nga kar uwe de. Kar ke uwe de nga à ile tà dè si’t a, à bɔr ra si mbɔtch-mbɔtch tite por bè. Ngei ndɔge è ngɔr ta, nè sei unni kum si dɔ i kebi nyanbawge le si ke dè nan’t, dè nan’t. 4An-in! dooge ke adi rai kule sa ko kem̂ ndɔrge’t le si nga géa, ɔgi de nar kuge dè ji de mbeng kɔke. Kure nar kuge dè ji de nga ɓar yoror-yoror a, non le njé sa koge nè nga oso mbi Kuwe-ɓee’t ke Njèkunde nyange malang. 5Sei i ndii deŝ dann ranelge’t dè nang nè. Sei usei a, an-in a, adi kem̂ si ndann gɔj-gɔj a tɔ, i nginei ndɔ gangtà le Kuwe-ɓee. Sei uli ra si eri lɔt-lɔt asinan se dange ke uli ra de nginei ndɔ ke kade dé tɔl’n de bè. 6Sei ilei tà dè njé ra nyan se dè najennge, i tɔli de se ndáng karè anje kade ilei rɔ adi sei. 7Ngakonmge, ilei kem̂ si pon-pon sár ndɔ tel ree le Kuwe-ɓee. An-in! njèndɔr. E ndi ngine njar ko. Unn gir dè ndi hel’t kuwe ile kem̂’n pon ndi ngine njar ko sár ade ndi aw’n ɓéee. 8Sei géa, ilei kem̂ si pon a, oréi tà si njak a tɔ, tede ndɔ tel ree le Kuwe-ɓee nain ngɔr ta. 9Ngakonmge, ke nè á i ndigi kade Nube gangtà dè si’t lé ɓaa ebi ra si kim nan. An-in! njègangtà nga in nda dɔ tàbit kei’t ɓá ta. 10Ngakonmge, an-in! njéribe-dè-tàge ke tà Nube’t ke ndɔ ke ilei mber se ri Kuwe-ɓee nga, nyankem̂kon ra de kuwe, nè ei ilei kem̂ de pon-pon. An-in! de ke nyantɔjege le si bè. 11An-in! dooge ke ndai dè nja de’t njáng nga, j’ede nè ei njéranelge. Kerɔte kuwe, sei ooi sertà ke ɔje dè korè tà njak le Job. Sei geri nyange ke Kuwe-ɓee ade’n utu go nyankumndoo ke ra’n. Oiyo, Kuwe-ɓee nga è baw kan kumtondoo a, è baw kem̂kanm a tɔ. 12Ngakonmge, gar-gar ebi ra si kubu ra si se danran éké se nang nè éké se nyan karé ke rang lé. Nè maje kade ke nè á edi nè oiyo ɓaa, è oiyo go karé; ke nè á edi nè ḿ-m̀ ɓaa, è ḿ-m̀ kuwe go karé. I rai titeke bè ɓaa, Nube à gangtà dè si’t lé. 13Ké nan dann si’t á ndi dann nyankem̂kon’t wa? Ke nè á doo karé dann si’t ndi dann nyankem̂kon’t ɓaa, maje kade ɔje tà se Nube kum’n ke kété-kété. Ké nan dann si’t ndi se kem̂nda káng wa? Ke nè á doo karé ndi se kem̂nda káng ɓaa, maje kade ɔse page ɗɔi’n Nube. 14Ké nan dann si’t á ndi se ratur wa? Ke nè á dann si’t doo karé ndi se ratur ɓaa, maje kade ɓar ngatɔgege le njékebe nange le Nube le kade ɔji tà se Nube tede’n a, kade ndumi nin wubu se ri Kuwe-ɓee a tɔ. 15Ke nè á ngatɔgege ɔji tà se Nube kerɔte ɓaa, Nube à unn njèratur nè kur’n dɔ. Ke nè á njèratur nè ra majelé ɓaa, Kuwe-ɓee à ade kem̂’n à tin mbit dènn’t. 16Ɔri gir majelé le si adi nan. Ɔji tà se Nube tede nan le kade ratur ɔr’n dè si’t. Doo ke Nube ɔr tà dènn’t nga, nyan ke è deje’n se kundekem̂ ke nunge tchanm nga, è ase ra nyan ke bòi ngain. 17Elie è doo ke è gar jéi jèi. E ɔje tà se Nube ade nunge tchanm tede kade ndi ede lé. Ɓaa, ndi oso nang ɗêin lé sár ɓal mute se nan mute-mute. 18Go’t gugu, è tel ɔje tà se Nube. Ke loon’t nè kuwe, ndi tête ede ade nyange teli kujei nan nang hakl. 19Ngakonmge, ke nè á doo karé dann si’t ndem rebe ngarankum tà, doo karé ase tel ree se’n tu rebe ke maje’t. 20Maje kade i geri titeke njè tel se njè ra majelé kile’n rebe ke maje’t nga, taa ngarankum ra’n tà yo’t a, utu kum majelége le’n bule a tɔ.

will be added

X\