JACQUES 2

1Ngakonmge, sei undei kem̂ si dè Kuwe-ɓee’t le jéi Jésu-Krist ke d’ile riɓar dènn’t ɓá. Ɔri kum dooge lé, tede kɔr kum dooge nga uwe made nan se kundekem̂ dè Krist’t lé. 2Bainléa doo karé ule ninge bise ke dé ra se nar-ɔr jinn’t a, ule kubu ke ndolé rann’t ree’n loo kebe nan’t. Bainléa doo karé ke njèndoo ule kubu ke tò yoro rann’t ree’n loo kebe nan’t nè nga tɔ. 3Nè sei oréi kum si dè doo ke njè kule kubu ke ndolé kein-kein se ndɔ’n-ndɔ’n nè tá edi nin edi nè: «I ɓaa, i ree i ndi loo ke maje’t nè tá.» Nè njèndoo ɓaa edi nin edi nè: «I ɓaa, i nda se njai dɔ loo ke nè’t» éké «I ndi nang njam’t dè nang ndul’t nè.» 4Ke nè á sei rai titeke bè, à ɓaa ké è kɔr kum nan ke sei ɔri dann si’t lé ɓai wa? Ké è tà ke sei kuwe in-in kalang i gangi dè nan’t se go tàgirge ke majilé ke dè ɓengre si’t lé wa? 5Ngakonm ke m’tár sei ooi maje. Ké è Nube kuwe á tɔr njé ke d’an de ke njéndooge ke dè nang nè le kade ei baw kundekem̂ge lé wa? Ké è Nube kuwe á tɔr de kade on-in se’n ɓee le’n titeke unn’n ndu’n ade njé ke tári nin nga lé wa? 6Nè sei ɓaa, ilei rasɔl dè njèndoo’t. Ké nange á ei njékon sei njanm-njanmge a, njé kali sei kawi se si loo gangtà’t nga wa? Ké è dé bawge nè nga lé ɓai wa? 7Ké è dé á dé njé nede sei njétaakem̂-Kristge nga lé ɓai wa? 8Kerɔte kuwe, gute-ndu ngar ke dé ndang kem̂ Magtub’t d’ede nè: «I tár doo ndul madi titeke i tár’n danrai i kuwe bè» nga, ke nè á i rai ɔri son’n njêt ɓaa, sei rai maje. 9Ke nè á sei ɔri kum dooge ɓaa, i rai majelé karé ɓá ta. Gute-ndu ile tà dè si’t tede sei ali tà tànn’t. 10Ke nè á doo an dè gute-ndu bere sêw-sêw nè è ɔse è ke karé pat nal ɓaa, tà uwe dè’n ɔje dè gute-ndu bere mbak. 11Kerɔte kuwe, è Nube ke karé ke njè tam kede nè: «I sang dinye éké dingem ke rang lé» nga kuwe á tam ɓai ede nè: «I tɔl doo lé.» Nè ke nè á i sang dinye éké dingem ke rang lé géa, nè i tɔl doo ɓaa, i tel i njèkal tà tà gute-ndu’t ɓá ta. 12Bè ɓaa, i tami tà á in-in i rai nyan’n a tɔ. Sei sei dooge ke d’a gangtà dè si’t se go gute-ndu ke ade i ndii dè si pal nga gar-gar. 13Doo ke an kumndoo le madennge lé ɓaa, ndɔn’t Nube à unn kum’n mbeng le gangtà dènn’t nal kan kumndoo le’n tɔ. Nè doo ke an kumndoo le madennge ɓaa, à nda loo gangtà’t se kem̂ ɓel ndan lé. 14Ngakonmge, ke nè á doo karé tam ede nè: «M’unde kem̂’m dè Nube’t» anje ra kule dè’t ɓaa, ké kundekem̂ le’n nè nga à kaje’n wa? 15Bainléa ngokon si éké kon nann si karé awi ra de karè nal kubu éké nal nyankuse se ndɔ karé-karé a tɔ. 16Bainléa doo karé dann si’t ede de ede nè: «Awi i ndii se kem̂lom, ulei kubu ra si’t, usei nyan i ndanni a tɔ» nal kade adi de nyange ke awi ndoo’n le ndii kumgajer nga ɓaa, ké ri á à è soo’t tede le de wa? 17Kundekem̂ nga géa è titeke bè tɔ. Kundekem̂ ke anje ra nyan karé dè’t nga tò asenan se nyan ke wei se dè ra’n ɓá bè. 18Nè doo karé à tam kede nè: «I, i ndi se kundekem̂ a, man m’aw se kule rage a tɔ.» M’a m’tel deje’n kede nè: «I tɔje’m kundekem̂ lei ke anje ra kule dè’t nga ade m’an ɓaa, man géa m’a m’tɔji kundekem̂ le’m se kulege ke m’ra dè’t kade an tɔ.» 19I gir titeke Nube è karé bere luk-luk. Tàgir lei aw loon’t kuwe. Nè ndilge ke majelé géa giri kem̂ de’t titeke bè tɔ, nè ɓel ra de ade ndebi nginn-nginn. 20Habi! i doo ke njè kem̂ tɔ kuju tà lé, ké i ger titeke kundekem̂ ke anje ra kule dè’t nga è nyan ke raikarè lé wa? 21Kà jéi Abraham nga, ké ndɔ ke ra bain á Nube ɔr’n tà dènn’t wa? Ndɔ ke Nube ɔr tà dè Abraham’t tede ngonn’n Isaac ke unn’n ade ke nyankuje-mese dè ɗinger’t loo’t. 22I an titeke kundekem̂ le Abraham a, kule ra’n a tɔ nga, asinan deĵ. Kundekem̂ le’n maje ɔr njêt takul kule rannge. 23Tà ke dé ndang kem̂ Magtub’t d’ede nè: «Abraham unde kem̂’n dè Nube’t. Gir’n ke nè á Nube an’n ke doo ke tà ɔr dènn’t a, ɓar’n made’n a tɔ» nga, aw loon’t deĵ. 24Sei an-in mbak titeke kule ra doo á Nube ɔr’n tà dènn’t an’n ke njè ra nyan se dè naje’n m è takul kundekem̂ á se kar’n lé. 25Rahab kaiya dinye nga géa, le’n è titeke bè tɔ. Nube ɔr tà dènn’t an’n ke njè ra nyan se dè naje’n takul kule rannge. Rahab uwe dooge ke d’ule de ke rann’t ra de mba ɓita inye de ade unni rebe ke rang teli awi ɓai. 26Kerɔte kuwe, danra ke kebe goto kem̂é nga tel è ninn ta. Kundekem̂ ke anje ra kule dè’t nga géa, tel è ninn titeke bè tɔ.

will be added

X\