JACQUES 1

1Man Jacques, ɓer kule le Nube se Kuwe-ɓee Jésu-Krist, m’ndang magtub nè m’ade girkàge le Israel ke dɔg-gidé-joo ke yali nan karé-karé m’ra’n de lapya. 2Ngakonmge, ke nè á nja si tuge sei dè nyan nange’t gai-gai ɓaa, an-in ke nyan ranel ke deri. 3Sei geri mbak, nyan ke nan kundekem̂ le si nga à oje korè tà njak. 4Korè tà njak le si nga maje kade undei dè se rebe lé. Titeke bè á sei a maji kɔri njêt a, nyan karé bè géa à nal sei lé a tɔ. 5Ke nè á doo karé dann si’t nal kumkunju ɓaa, maje kade kɔ Nube. Nube è njè kade dooge malang nyan se kem̂ karé anje ndáng de. 6Nè gar-gar, maje kade i deje’n nyan se kundekem̂ m i naje se rai lé. Doo ke naje se ra’n nga è doo ke kem̂’n è joo. Doo ke kem̂’n è joo nga tò asenan se kɔr mann ke tal bungus-bungus ke nel ɔr’n aw se’n yo-yo, nè-nè bè. 7E soo’t kade doo ke titeke bè nga gir kem̂n’t ede nè n’a n’inge nyan karé ji Kuwe-ɓee’t lé. 8E doo ke njè kem̂ joo ke aw yo-yo, nè-nè dè rebege malang ke aw tutu. 9Maje kade njètaakem̂-Krist ke njèndoo ade dè’n in tchakm tede kunde ke Nube unde’n dɔ ɗeng. 10Maje kade njètaakem̂-Krist ke è baw ade dè’n in tchakm tede tel ke Nube tel se’n gugu. Baw tò asenan se putu kage éké walè bè. 11Loo ke kàde ube, in ɔse ramam ade kam kage ndolè a, putu’n ur nang a, kin mande le’n ɔse ngei ngai a tɔ. Baw nga géa, le’n à è titeke bè tɔ. Ndɔ karé à goto njêl dann nyanbawge’t le’n. 12Doo ke oré tà’n njak dè nyange ke nann’t ɓaa, ra’n à nel’n. Doo ke orè tà’n njak dè nyange ke nan-in nin ɓaa à inge jɔkɔ kunn banga le ndii’n kumgajer. Jɔkɔ kunn banga nga, ndɔ ke Nube unn’n ndu’n le kade njé ke tárii. 13Loo ke nyan nan doo karé ɓaa, è soo’t kade tam ede nè: «E Nube á nan’m lé.» Oiyo, Nube aw ndoo ra doo majelé lé a, Nube géa asekum sú doo ndan lé a tɔ. 14Nè nanan géa è ngur nyange le’n ke dè ɓengrenn’t kuwe á leŝe’n aw se’n dann nyan nange’t. 15Ke nè á j’inyei loo j’adi ngur nyange nè ɓaa, à ndann ngonn le koje kaiya. Loo ke kaiya nè ra tɔge ɓá ɓaa à in ke kété koje yo tɔ. 16Sei kotárge le’m, adi kum si sú sei dè tà’t nè nga lé. 17Nyan kade noje ke maje se nyan kunde njage ke maji ɔri njêt nga in-in dɔ danrán ra Bɔ jéi Nube ke njè kunde kàde se kɔnyonge. Nube nga tur hal’n rang lé a, loo ke rann’t tel tuge ndul ndɔ karé bè lé a tɔ. 18E ɔje se go kem̂ndige le’n le kade jèi ndikumgajer takul Tà ke Maje le’n ke è ngarankum tà. Gir’n ke nè á jéi le’n kuwe deri dann nyankundege le’n malang. 19Ooi tà nè maje, kotárge le’m. Maje kade nanan géa in kalang ur mbi’n oo’n tà. Nè maje kade in kalang tam tà éké ade wong in se’n kalang lé a tɔ. 20Kerɔte kuwe, doo ke wong in se’n nga à ra nyan ke se dè naje’n tàkum Nube’t lé. 21Gir’n ke nè á ɔri ra si kɔke dann nyan ke mine’t bere mbak se gute nyange ke rang ke majelé. I taai Tà ke Maje ke Nube dubu ɓengre si’t se ngonn koje. Tà nè nga ase kaje ngarankum ra si. 22Adi kum si sú sei lé. Tà ke Maje ke ooi nga, i rai nyan’n se ndɔge malang m ooi ke koo karè lé. 23Oiyo, doo ke oo tà á ra nyan’n lé ɓaa, tò asenan se doo ke gon kum’n se kuturam bè. 24E gon ra’n an, loo ke è ɔte aw mbɔr ɓaa, ke loon’t nè kuwe kem̂’n wei nal sêl dè rann’t ke gon ɓá nga. 25Nè doo ke ter gute-ndu ke maje ɔr njêt ke njè kade jè ndii dè jéi pal nga, nda dè’t njáng ra nyan’n, oo ade kem̂’n wei nal sêl dè’t lé ɓaa, doo nè nga ra’n à nel’n dè kule rann’t kuwe. 26Ke nè á doo karé dann si’t an ra’n ke njè ger Nube, nè è ger loo kule aljem̂ tann’t lé ɓaa, è sú kum ra’n è kuwe. Ger Nube le doo nè nga tel è nyan ke raikarè. 27Tɔse kum dè ngann halge’t se njékei-kingege dè nyantosowurge’t le de a, kan go ra sêw-sêw dè nyange ke mine ke dè nang nè a tɔ, è ngarankum ger Nube ke taa kum Bɔ jéi Nube.

will be added

X\