HEBREUGE 9

1Mann-ra ke desêin nga aw se ndukunnge ke ɔje dè ra kule kade Nube se go rebe’n kem̂ gile kei kubu ke tò se ninn’n ke dè nang nè. 2Kété mari dé ra kei kubu. Dé gang kem̂’n se tà kubuge danné loo joo. Kem̂’n ke desêin, dé ɓar’n gile kei ke tò se ninn’n. E loo ke d’unde’n kage nan lampe se table tunde ngurwalge tutu. 3Kem̂’n ke njèkon’t joo ɓaa, dé ɓar’n gile kei ke tò se ninn’n gai. 4Dè ɗinger loo ke dé ra se nar-ɔr tò kem̂ gile kei ke tò se ninn’n gai’t nè nga. E loo nè á dé ró nyange ke ete sununu tutu d’ade Nube. Sandu mann-ra ke dé loin gide bere mbak se nar-ɔr tò kem̂ gile kei ke tò se ninn’n nè nga tɔ. Jóbai ke dé leen se nar-ɔr tò kem̂ sandu mann-ra’t nè nga. Mur ke ri’n nè manne se kage tɔse le Aaron ke ndɔ ke putu njin tooi kem̂ sandu mann-ra’t nè nga tɔ. Taɓai begre mbal ke dé ndang gute-nduge tutu tooi kem̂ sandu mann-ra’t nè nga tɔ. 5Dé leen nar nyange ke ndoin kein-kein taai nan se dooge ke danrán ke ndai tàkum Nube’t bè, ei naji bage de dè ɗinger loo nyankuje-mese tede kunn’n kem̂ tin mbit le Nube nga lát-lát. Loo kɔrgir nyange nè malang kêrêr-kêrêr kade sei goto ɗarinè ɓai. 6Dé gang kem̂ kei kubu nè nga se tà kubuge danné loo joo. Dé tunde nyange malang tutu se loo’n-loo’n ɓá ɓaa, njékuje nyan-mesege awi kem̂ kei ke desêin’t se ndɔge malang rai kule tutu. 7Nè kem̂ kei ke njèkon’t joo ɓaa, è maw njèkuje nyan-mese kuwe se kar’n luk-luk á ile njà’n tutu nja karé bere kem̂ ɓal karé. Gar-gar à aw se mese dan kade tede majelége le’n è kuwe kété ɓita tede kaiyage le kosdooge ke rai majelé dè mbe’t nga ɓai. 8Ke nè á kem̂ kei kubu ke desêin ke dé ɓar’n loo ke tò se ninn’n nè nga goto lé ɓai ɓaa, Ndil-kem̂nda tɔje jèi ade jè geri titeke tà rebe kaw gile kei ke tò se ninn’n gai’t nga tò se kutu’n bere ɓai. 9Kem̂ kei ke desêin ke tò se ninn’n nga è nyan-tɔje ke ɔje dè kurloo ke ɗarinè. Dè kurloo ke ɗarinè nga, nyan-nojege se nyankuje-mesege ke doo unn ade Nube nga asekum tel tàgir le’n ke kem̂n’t kade maje ɔr njêt lé. 10Tàge ke ɔje dè nyankuje-mese se nyankain a, se togo rage ke se ri de-ri de nga, ei ndukunnge le dooge. Ndukunnge nè nga d’unde de d’ade tooi bè sár le ngine’n ndɔ ke Nube à tel gɔl’n nyan malang kade aw danné. 11Nè ɗarinè, Krist unde loo tee pan. E maw njèkuje nyan-mese ke ɔje dè nyange ke maje ke ndii à reei. Krist aw kem̂ kei kubu ke bò a, ke maje ɔr njêt a tɔ. Kei kubu nè nga è ji doo á ra lé a, taɓai è kei kubu ke tò ɔje dè dè nang ke è dann nyankundege’t le Nube karè lé a tɔ. 12Gile kei ke tò se ninn’n gai nè nga, Krist aw ile njà’n tutu nja karé bere luk-luk ke ngang’n. E aw kem̂ kei nè nga se mese bal binyege éké mese ngann mangege lé. Nè è aw gile kei ke tò se ninn’n gai nè nga se mese’n è kuwe taa’n jèi inye’n jèi dɔ sár se non. 13Mese bal binyege se bɔ mangege éké bu kon-mang ke dé ró de dé siye dè njé ra majelége’t nga ɔri se-ra de ke nata ade tooi se ninn de. 14Nè Krist inye ra’n ade Nube ke nyankuje-mese ke maje ɔr njêt takul Ndil ke njèndisenon. Mese Krist nga ɔr se-tàgir le jéi ke majelé ndát-ndát dum le mese dange ɓai. Mese’n ɔr jèi unde jèi se ninn’n tede kade jè rai kule j’adi Nube ke njèndi kumgajer. 15Gir’n ke nè á Krist ee’n njè nda dann dooge se Nube ɔje’n dè mann-ra ke kige nè nga. E wei uge dè dooge ke ali tà kété mari gir mann-ra ke desêin’t. Titeke bè á dooge ke Nube ɓar de à asi kingei nyan-majege ke tooi se non ke ndɔ ke è unn’n ndu’n le kade de nga. 16Loo ke magtub ke ɔje dè kai nyan-ndube tò tutu ɓai ɓaa, gar-gar è tà le kade kuwe njè ndang magtubge nè wei pa ɓita. 17Magtub ke ɔje dè kaya nyan-ndube nga, njèndang’n wei pa ɓita d’a ra’n kule ɓai. Loo ke njèndang magtub mann-ra ke ɔje dè kai nyan-ndube ndi kumgajer ɓai ɓaa, doo karé ase ra kule se magtub nè nga lé. 18Gir’n ke nè á mann-ra ke desêin nga géa, d’ile mese nang pa ɓita d’unde’n gir ɓai. 19Moise ɔrgir ndukunnge nè titeke dé ndang’n kem̂ magtub gute-ndu’t nga ade kosdooge malang pa ɓita. Taɓai è unn mese ngann mangege se bal binyege pɔti se mann. E siye mese nè nga dè magtub gute-ndu’t kuwe kété ɓita siye dè kosdooge’t malang ɓai. Moise siye mese nè se balkum kage karé ke dé ɓar’n Hysope a, se bin bate ke ker a tɔ. 20E tam ede nè: «E ke nè nga è mese mann-ra ke Nube unn’n ndu’n le kade ilei koje dè’t.» 21Moise siye mese dange nè nga dè kei kubu kebe nan’t se dè nyanra kulege malang ke tooi kem̂ kei kubu’t nga tɔ. 22Se go gute-ndu nga, nyange ke mese ɔr se-de á bulei ngain gée. Loo ke mese oso nang lé ɓaa, loo kinge kem̂ tin mbit dè majelége’t goto. 23Kerɔte kuwe, ke nè á til nyange ke danrán nga géa d’ɔr se-de titeke bè ɓaa, danra nyange ke danrán géa awi ndoo kade d’ɔr se-de se nyankuje-mese ke maje ngain dum dè è ke kété. 24Kei ke tò se ninn’n ke dooge rai nga è til ngarankum kei ke tò se ninn’n. E kei ke tò se ninn’n ke dooge rai nè á Krist aw kem̂é lé. Nè è kem̂ danran’t nú ra Nube’t á è ndi ra rebe tà le jéi ɗarinè. 25Se ɓal-ɓal nga, maw njèkuje nyan-mese le Juipge aw gile kei ke tò se ninn’n gai nè se mese dange. Nè è Krist ɓaa aw kem̂ gile kei ke tò se ninn’n nè nga le kinye ra’n kade ke nyankuje-mese nja bule lé. 26Ke nè á è inye ra’n ade ke nyankuje-mese nja bule ɓaa, né ndɔ ke nyankem̂konge à rai nin nja bule unn gir’n mari loo ke Nube unde’n gir nang nè. Nè ɗarinè Krist tɔje ra’n nata ndái-ndái ke nyankuje-mese nja karé bere luk-luk ke ngang’n kem̂ ndɔge ke ngeinn’t nè tede kudu’n kum majelé le dooge. 27Dookunde le Nube nga, gar-gar à wei nja karé bere ke ngang’n. Go’t gugu ɓita Nube à gangtà dènn’t ɓai. 28Krist inye ra’n ade ke nyankuje-mese nja karé bere luk-luk ke ngang’n tede kɔr’n majelé le dooge bule. E à tel le ree ke njèkon’t joo ɓaa, è tede kɔr majelé le dooge tɔ lé ta, nè tede kaje njé ke ndii nginei nin tchên ta.

will be added

X\