HEBREUGE 8

1Maw tàge malang ke jè ndige le kede sei nga á nè: J’awi se maw njèkuje nyan-mese ke bò. E ndi danrán kɔte kutu-ngar’t le Nube ke njè dum dè nyange malang. 2E Ngonn njèkule le Nube. E ra kule kem̂ gile kei ke tò se ninn’n gai. Gile kei ke tò se ninn’n gai nè nga, è Kuwe-ɓee kuwe á ra m è doo á ra lé. 3Maw njèkuje nyan-mese ke rara géa, d’ɔr’n d’unde’n kade unn nyan-noje se nyankuje-mese ade Nube. Gir’n ke nè á Jésu nga géa, è soo’t kade unn nyan ade Nube tɔ. 4Ke nè á Jésu nain dè nang laa ɓai ɓaa, ayé k’ee njèkuje nyan-mese ndan lé. Tede njékuje nyan-mesege ke d’ɔr de se go gute-ndu ndii ɗêng-ɗêng ɓai. 5Kulege malang ke njékuje nyan-mesege rai se go gute-ndu adi Nube nga, ei til ngarankum nyange ke danrán. Gir’n ke nè á, loo ke ndɔ ke Moise ayé ra kei kubu kade Nube nga, Nube ede’n kété ede nè: «Ade kem̂i dè rai’t tede a i ra nyange malang le tɔl mbas se go rebe ke ndɔ ke m’tɔji dè mbal’t nga.» 6Nè kule ke Nube um ji Krist’t ade ndi à ra ɗarinè nga, è kule ke tò gai ke maje ngain dum le njékuje nyan-mesege ke rang ke kété ɓai. Jésu-Krist è njè nda dann mann-ra ke maje ngain dum è ke kété. Mann-ra nè nga, Nube unde gir’n dè ndukunnge ke maje ngain dum ndukunnge ke kété mari. 7Ke nè á ndɔ ke mann-ra ke desêin nga maje ɔr njêt ɓaa, d’a sang loo kunde gir mann-ra ke njèkon’t joo taa’n gute’n lé ta. 8Kuwe-ɓee Nube an nyan ke majelé ra kosdooge’t le’n. Gir’n ke nè á è ndáng’n de ede nè: «Kuwe-ɓee tam ede nè: An! kem̂ ndɔge rang ke à reei nga, m’a m’tɔl tà mann-ra le’m ke kige kade kosdooge ke Israel se kosdooge ke Juda. 9Mann-ra ke kige nè nga, è tite mann-ra ke kété m’mann’n ra’m m’ade kà dege kété ndɔn’t ke m’uwe’n de se ji’m m’ade undei loo teei nata kem̂ ɓeekon ke Egypte nga lé. Mann-ra ke kété nga kà dege ali dè. Gir’n ke nè á man géa m’inye’n go de tɔ. 10Kuwe-ɓee tel tam ede nè: An! kem̂ ndɔge ke à reei non nga, m’a m’mann ra’m kade kosdooge ke Israel. M’a m’ule gute-ndumge dann tàgirge’t le de a, m’a m’ndang gute-ndumge dè ɓengre de’t a tɔ. Man m’a m’ee Nube le de a, d’a dé kosdooge le’m a tɔ. 11Doo karé dann de’t à ndó njè made ɓee le’n éké ngokon’n k’ede nè: Ké i ger Kuwe-ɓee kuwe wa? à goto ta. Dooge malang à geri man kem̂ ndɔn’t nè unn gir dè ngannge ke ndêin bè sár tee’n dè dooge ke bòi’t. 12M’a m’ade kem̂’m à tin mbit dè nyanra dege ke pás-pàs a, m’a m’ade kem̂’m à olé dè majelége’t le de gugu ndan lé a tɔ.» 13Loo ke Nube tam tà ɔje’n dè ri mann-ra ke kige nè ɓaa, è tel mann-ra ke desêin ade è nyan ke ndis ta. Nyan ke ndis nga è nyan ke ɓuge ke nain ngɔr ɓaa, à unde nang ndàs ta.

will be added

X\