HEBREUGE 7

1Melkisédec nè nga, ndɔ ke è ngar ke kem̂ ɓee ke Salem. E njèkuje nyan-mese le Nube ke njè dum dè nyange malang. Loo ke ndɔ ke Abraham tête rɔ ngarge tel à ree ke ɓéee ɓaa, Melkisédec tile non’n se rebe tɔr ndu’n dènn’t. 2Nyan malang ke Abraham in’n loo rɔ’t nga, ke nè á è dɔg ɓaa è ɔr tà karé-karé ade Melkisédec. Melkisédec nga tel se tà koje jéi è «ngar ke njè ra nyan se dè naje’n». Melkisédec è ngar ke kem̂ ɓee ke Salem. Salem nga, kɔr gir’n se tà koje jéi ɓaa è «ngar ke njè kade dooge kem̂lom». 3Melkisédec nga, Magtub ke tò se ninn’n tam tà ɔje’n dè bɔ’n se kon’n éké girkà le’n ade j’ooi lé. Jè geri ndɔ koje’n éké ndɔ kwei’n lé a tɔ. E tò asenan se Ngonn le Nube. E njèkuje nyan-mese se ndɔge malang a, se ɓal-ɓal a tɔ. 4An-in! Melkisédec nga è doo ke bò. Kà jéi Abraham ndɔ ke tɔr tà nyange ke maje-maje ke in’n loo rɔ’t karé-karé ade’n. Ke nè á nyan è dɔg ɓaa, è ɔr tà karé ade Melkisédec. 5Girkoje le Lévi ke ei girkà njékuje nyan-mesege nga géa, magtub gute-ndu ede de le kade ke nè á nyan le kosdooge ke Israel è dɔg ɓaa, ei deji de kade tɔri tà’n karé-karé. Ei rai titeke bè se kosdooge ke Israel ke ei ngakon dege ke girkà’t le Abraham kuwe mbain. 6Melkisédec nga è girkà le Lévi lé. Nè né è bè géa, ke nè á nyan è dɔg ji Abraham’t ɓaa, è unn tà karé ade’n. Abraham è doo ke ndɔ ke Nube unn ndu’n ade’n ɓá. Nè né è bè géa, Melkisédec tɔr ndu’n dènn’t. 7Kerɔte kuwe, loo n’aje’n goto. Doo ke tɔr ndu’n de madenn’t nga, è doo ke bòi dum dè made’n nè nga kuwe. 8Ngannkà Lévige ke ei girkà njékuje nyan-mesege nga, ke nè á nyan è dɔg ɓaa d’unn tà karé d’ade de. Ei dooge ke yo ra ɓee kem̂ de’t kade à gotoi ndɔ karé ɓai. Melkisédec géa, ke nè á nyan è dɔg ɓaa d’unn tà’n karé d’ade’n tɔ. Nè Melkisédec ɓaa è doo ke njèndi kumgajer sár se non titeke Magtub ke tò se ninn’n tam’n nga. 9Titeke Abraham ra’n, nyan è dɔg ɓaa è unn tà karé ade. Lévi kuwe géa ra titeke bè tɔ. Tede ngannkànnge géa, ke nè á nyan è dɔg ji kosdooge ke Israel ɓaa, ei unni tà karé-karé adi de. 10Loo ke ndɔ ke Melkisédec an-in ngɔde tile kum Abraham nga, d’oje Lévi lé ɓai. Abraham è kà dɔg Lévi. 11Kem̂ magtub gute-ndu ke ɔr non kosdooge ke Israel nga, è ngannkà Lévige á d’ɔr de ke njékuje nyan-mesege. Ei njékuje nyan-mesege tite Aaron bè. Ke nè á ndɔ ke dooge asi maji kɔri njêt se go nyankuje-mese le ngannkà Lévi ɓaa, né d’a d’aw ndoo njèkuje nyan-mese ke rang ke tanan se Melkisédec lé ta. 12Ke nè á rebe ra nyankuje-mese tel tur tò gai ɓaa, Nube à tur magtub gute-ndu nga kade tò gai tɔ. 13Krist ke dé tam tàge nè d’ɔje’n dè’n nga, è girkà ke rang’t ta. Doo karé bè ke girkà’t le’n ra kule loo ɗinger loo nyankuje-mese’t nga ndan lé. 14Dooge malang geri njai titeke Kuwe-ɓee le jéi Jésu nga d’oje’n girkà’t le Juda. Ndɔ karé bè géa Moise tam tà ɔje’n dè girkà nè titeke ei njékuje nyan-mesege bè lé. 15Gute-ndu ke ɔje dè nyankuje-mese ke dé tur gir rang nga, è nyan ke tò nata ndái-ndái. D’ɔr njèkuje nyan-mese karé ke rang ke tite Melkisédec d’unde’n ɓá. 16Njèkuje nyan-mese ke rang ke d’ɔr’n d’unde’n nè nga è se go ndukunnge le girkà dooge lé, nè è se go tɔgmong le njèndi kumgajer sár se non. 17E njèkuje nyan-mese ke dé tam tà d’ɔje’n dè’n kem̂ Magtub ke tò se ninn’n d’ede nè: «I i njèkuje nyan-mese sár se non se go ra’n le Melkisédec bè.» 18Ndukunn ke kété desêin nga dé tuju’n kɔke tede tɔg’n goto ade tel è nyan ke raikarè. 19Gute-ndu le Moise ase kade doo ra nyan ke maje ɔr njêt tàkum Nube’t lé. Nè ɗarinè Nube ade jèi nyan kundekem̂ tchên dè’t ke maje dum madege malang. Takul’n è á j’agi ngɔr ke ra Nube’t. 20Kɔr ke Nube ɔr Krist unde’n ke njèkuje nyan-mese nga, Nube mann ra’n. Njékuje nyan-mesege ke rang ɓaa, d’unde de karè anje mann-ra. 21Nè loo ke Nube ɔr Jésu unde’n ke njèkuje nyan-mese nga, è ede’n ndàt ede nè: «Kuwe-ɓee mann ra’n. E mann-ra ke à tò sár m è à tur ndu’n rang ndan lé: I a i Njèkuje nyan-mese sár se non.» 22Gir’n ke nè á Jésu tel ee’n der gir mann-ra ke maje dum madege nè nga. 23Njékuje nyan-mesege ke rang bulei ngain taai gute nan-nan tede yo on ɓee dè de’t ɔge de ndii kumgajer. 24Nè Jésu ɓaa, è njèkuje nyan-mese ke doo à taa gute’n lé, tede è njèndi kumgajer sár se non. 25Gir’n ke nè á njé ke reei ra Nube’t se takul Jésu ɓaa, è ase kaje de nja karé bere ke ngang’n. Jésu nga ndi kumgajer sár se non. E ɔje tà se Nube dɔ-dɔ tede le de. 26Jésu nga è maw njèkuje nyan-mese ke j’awi ndoo’n. E tò se ninn’n gai, tà karé géa uwe dè’n lé a, nyan ke mine karé géa ɓar ri’n lé a tɔ. E ɔr ra’n ndi mbeng se njé ra majelége a, Nube unn’n unde’n dɔ mbeng dè nyange’t malang a tɔ. 27Jésu è tite maw njèkuje nyan-mesege ke rang lé. E aw ndoo kunn nyankuje-mesege kade kuge’n dè majelége le’n se le dooge ke rang se ndɔ karé-karé lé. Nè è unn ra’n è kuwe ade ke nyankuje-mese uge’n dè majelé le dooge nja karé bere luk-luk ke ngang’n. 28Gute-ndu ɔr dooge ke yo on ɓee dè de’t unde de ke njékuje nyan-mesege. Nè tà mann-ra le Nube ree utu go gute-ndu. Tà mann-ra nè ɔr Ngonn kem̂ Nube unde’n ke maw njèkuje nyan-mese ke maje ɔr njêt.

will be added

X\