HEBREUGE 6

1Bè ɓaa, ade j’inyei go nyan-ndóge ke desêin ke dé ndó jèi ɔje dè kundekem̂ dè Krist’t nga ɓaa, ade j’awi kum jéi ke kété dè nyan-ndó ke maje ɔr njêt le dooge ke tɔgi káng-káng. Ade jè teli dè nyan-ndó ke desêin’t lé ta. Nyan-ndó ke desêin nga ɔje dè kinye go nyanrage ke majelé ke à awi se jéi kile jèi tà yo’t a, ɔje dè kundekem̂ dè Nube’t a tɔ. 2Nyan-ndó ke ɔje dè kule doo manné njonm éké kile ji dè doo’t éké kunde loo tee dann njé ke koo’t éké gangtà ke se non ke a tò sár se non nga, dé ndó sei kété ɓá m j’à tel ke dè’t ɓai-ɓai lé ta. 3Ke nè á Nube inye loo ade jè ɓaa, j’à ndó sei nyan ke ɔje dè dooge ke tɔge tá ta. 4Doo ke nange ke teli osoi dann majelé’t nga, ei dooge ke ingei lookar le Nube ɓá. Ei dooge ke nan-in nyan-noje le Nube geri nel’n ɓá a, ingei Ndil-Kem̂nda ɓá a tɔ. 5Dooge nè nga nan-in tà le Nube geri maje’n ɓá a, an-in nyankɔbege ke ɔje dè Konɓee le Nube ke ndi à ree nga ɓá a tɔ. 6Nè né è bè géa, ei teli ɔsi kundekem̂ le de pater nali osoi gide loo’t nata. Dooge nè nga, loo tel tur hal de dum de bang ta. E dooge nè á tɔli Krist Ngonn le Nube ɓeri nin kàde kage-ke-dese’t a, ilei rasɔl dènn’t tàkum dooge’t nata ndái-ndái a tɔ. 7Loo ke nang njibe mann ndi ke ede dɔ-dɔ á go’t gugu tee se kam nyange ke maje ade njéndɔrge ɓaa, Nube tɔr ndu’n dè nang’t a tɔ. 8Nè né è bè géa, nang nè ade konnge se tiroge tá kujei nan hakl-hakl ɓaa, tel è nyan ke karè. Mbɔr ɓaa Nube à mann’n a, ndêin-ndêin ɓaa d’ade ró’n se por rák-rák kɔke a tɔ. 9Kotárge le jé, ke nè á jè tam tàge nè nga bè géa, jè ger kem̂ jé’t mbak titeke sei umi nja si rebe ke maje ke à tee se si dè kaje’t. 10Nube è njè banm doo lé. Kem̂’n à wei nal dè nyan ke sei rai tede tà le’n nga lé. Sei i ndii rai se njétaakem̂-Kristge ke rang kum si ke kété ɓai tede tár ke i tári Nube nga. Kem̂ Nube à wei nal dè ra ke i rai se de nga lé. 11Nè jè ndige kade nanan géa dann si’t ute ra’n kalang titeke kété sár kade è an’n nyan ke è unde kem̂’n tchên dè’t nga se kum’n ndɔ ke rang. 12I teli njérakatege lé ta. I ndaji kum dooge ke orèi tà de nják-nják dè kundekem̂’t le de á ingei nyan-ndube ke Nube unn ndu’n ade de nga. 13Ndɔ ke Nube unn’n ndu’n ade Abraham. Doo karé ke rang ke bòi dum dè Nube kade ubu ra’n se ri’n ade Abraham goto. 14E Nube kuwe á ubu ra’n ade Abraham ede nè: «Kerɔte kuwe, man tɔr ndu’m dèi’t kade ngannkàige bulei ɗik-ɗik ke kété-kété.» 15Ndɔ ke Abraham ile kem̂’n pon ngine’n titeke bè ɓita Nube ade’n nyan ke ndɔ unn’n ndu’n le kade nga ɓai. 16Dooge ubi ra de se ri doo ke bòi dum dè de. Kubu ra è tà ke tɔl gang tà najege le de malang. 17Ndɔ ke Nube ra se Abraham titeke bè tɔ. Ngannkà Abrahamge ayé kingei nyange ndɔ ke Nube unn’n ndu’n ade’n. Nube ndige kade ngannkà Abraham geri njai titeke kunn-ndu le’n n’ee Nube nga, è kunn-ndu ke tò njáng. Gir’n ke nè á è tɔl’n tà’n se kubu ra. 18Kunn-ndu le Nube se kubu ra le’n nga ei nyange joo ke à tooi njáng. Nyange ke joo nè nga tɔji jèi titeke Nube tam tà lanm ndan lé. Nube sɔl kem̂ jéi se nyange ke joo nè nga. Gir’n ke nè á j’ubei go nyange malang j’inyei jè paberii nyan ke j’undei kem̂ jéi tchên dè’t ke Nube à ade jèi nga. 19Kundekem̂ tchên nè nga tò asenan se nar nyan dɔɔ bato nang ke ngiring ngiring-ngiring ke jè tɔi ra jéi’t. Kundekem̂ tchên nè nga aw sár al gide kubu gang gile loo ke tò se ninn’n. 20Gile loo ke tò se ninn’n nè nga, Jésu kuwe è doo le jéi ke desêin ke ur lêbêt aw tutu tede tà le jéi. E tel è maw njèkuje nyan-mese tite Melkisédec sár se non.

will be added

X\