HEBREUGE 5

1Maw njèkuje nyan-mese ke rara géa d’ɔr’n dann dooge’t d’unde’n kade ra kule non Nube’t tede le de. E ndi le kunn nyan-noje se nyankuje-mese kade Nube tede majelé le dooge. 2Maw njèkuje nyan-mese nga géa, è njè ra majelé tite dooge nga tɔ. Gir’n ke nè á è ase kile’n kem̂’n pon dè njé ke geri nyan lé a, dè njé ke ndemi’t a tɔ. 3Maw njèkuje nyan-mese nga è doo ke majelé ule’n poré tite dooge ke rang bè tɔ. Gir’n ke nè á è unn’n nyankuje-mese ade Nube uge’n dè majelé le dooge á se kar de lé, nè è uge’n dè majelége le’n è kuwe tɔ. 4Doo karé ase kin se dè’n è kuwe ɓar ra’n maw njèkuje nyan-mese lé. Nè doo ke è Nube kuwe ɓar’n titeke ndɔ ke ɓar’n Aaron tá asekum kinge riɓar ke ɔje dè maw njèkuje nyan-mese nga ɓai. 5Krist géa, le’n è titeke bè tɔ. E kuwe in se dè’n naje riɓar ke ɔje dè maw njèkuje nyan-mese lé. Nè è Nube kuwe á ede’n ede nè: «I i Ngonn kem̂’m, unn gir ɓila man m’ee bɔi.» 6Nube tam tà ɔje dè Krist loo karé ke rang’t ɓai ede nè: «I i njèkuje nyan-mese sár se non tite le Melkisédec.» 7Krist nga, loo ke ndɔ ke è ndi se dè’n dɔ dè nang nè ɓai nga, è ɔje tà se Nube a, è ndête’n se mann non kumn’t se ndu’n ke bòi beng a tɔ. Nube asekum taa Krist tà yo’t tede koje ke è ile dènn’t. 8Krist nga è Ngonn kem̂’m Nube kuwe. Nè né è bè géa, è unn gir ndó kile koje dè bɔn’t dann nyankem̂kon malang ke ndɔ ke ra’n. 9Nube tel’n ke doo ke maje ɔr njêt. Krist tel è njè kade dooge malang ke ilei koje dènn’t ndii kumgajer sár se non. 10Kerɔte kuwe, ndɔ ke Nube ɓar Krist beng ede nè: E è maw njèkuje nyan-mese tite Melkisédec. 11J’aw se tàge ngain le kede sei dè eige ke nè ɓai. Nè loo kɔrgir nyange nè nga ɗêi-ɗêi tur se jé tede sei i teli i rai rakate dè koo girtà kɔr sonn’t. 12Kò si tò ngain kade né gar-gar ɓila sei njéndó nyan made sige ta. Nè ɗarinè, sei awi ndoo kade dé tel dé ndó sei nyange le Nube titeke dé ndó’n sei nyange desêin kuwe ɓai-ɓai. Sei teli tooi asinan se ngannge ke awi ndoo mbà se mur ke mɔré tá bè. 13Nanan ke ndi à ɔdenan kil mbà ɓai nga, è asekum ger gir nyan ke maje se nyan ke majelé lé tede è ngonn ke kide ɓai. 14Nè dooge ke tɔgi káng-káng ɓaa, mur ke mɔré lé á ɔje dè de. Mur ke mɔré lé nga ɔje dè njé ke tɔge ke asi kɔri kum nyan ke maje se nyan ke majelé se ndɔ de, ndɔ de.

will be added

X\