HEBREUGE 4

1Ndɔ ke Nube unn ndu’n ede nè j’à j’awi loo taa kebe’t le’n. Ndukunn le’n nè nga tò njáng ɓai. Bè ɓaa, ade j’undei kumkunju dè ra jéi’t le kade doo karé dann si’t ɔse loo taa kebe nè nga pat nal lé. 2Jèi géa d’ile mber Tà ke Maje d’ade jèi titeke ndɔ ke d’ile’n d’ade kà jéige nga tɔ. Nè tà ke ndɔ ke ei ooi nga, ei taai undei kem̂ de dè’t kade è soo de’t lé. 3Jèi nga, ke nè á j’umi kem̂ jéi dè tà’t nè nga ɓaa, j’à j’ilei nja jéi loo taa kebe’t le Nube nga. Loo nè nga, ndɔ ke Nube tam tà ɔje’n dè kété ede nè: «Wong ra’m ngain ade m’unn ndu’m m’ede nè: D’a d’ile nja de loo taa kebe’t le’m nè nga ndan lé.» Nube tam tà nè nga titeke bè kété mari ɓita unde nyange malang ke dè nang nè tɔl mbas ɓai. 4Dé tam tà loo karé ke rang’t d’ɔje’n dè ndɔ ke njèkon’t ji sejimute d’ede nè: «Loo ke Nube unde nyange malang tɔl mbas ɓá ɓaa, è taa kebe ndɔ ke njèkon’t ji sejimute.» 5Nube tam tà nè loo karé ke rang’t ɓai ede nè: «D’a d’ile nja de loo taa kebe’t le’m ke m’uwe dè nja m’unde konn tede le de nga ndan lé.» 6Njé ke ndɔ ke d’ile mber Tà ke Maje d’ade ooi kété sàk-sàk nga, ei ilei nja de loo taa kebe’t nè nga lé tede ei unni mbi dè tà’t nè nga. Nè dooge ke nange à ilei nja de loo taa kebe’t le Nube nè nga kerɔte. 7Gir’n ke nè á Nube tel ɔje’n ndɔ karé ke rang. Ndɔ nè nga dé ɓar’n «Ɓila». E tam tà nè nga ra ɓal aru bule ngain ɓita ade ngar David ndang tà’n kem̂ Magtub Pa’t ke j’ooi tà’n kété ɓá ede nè: «Ke nè á ɓila ooi ndu Nube ɓaa, adi ɓengre si nder titeke kété nga lé ta.» 8Ke nè á ndɔ ke Josué uwe dè nja loo taa kebe ke get ade kosdooge ke Israel ɓaa, né ɓila Nube à tam tà kɔje’n dè ndɔ taa kebe ke rang gugu lé ta. 9Bè ɓaa, loo taa kebe ke get le kosdooge le Nube tò tutu. Loo taa kebe nè nga tò tite loo taa kebe le Nube ke njèkon’t ji sejimute nga bè. 10Oiyo, nanan ke aw loo taa kebe’t le Nube ɓaa, è géa à taa kebe dè kulege’t ke è ra titeke ndɔ ke Nube taa’n kebe dè kulege’t ke kinge’n bè tɔ. 11Ade jè pabrai loo par-par tede kile nja jéi loo taa kebe’t nè nga. Maje kade doo karé tel è njè dum nan tite kosdooge ke Israel ɔse’n loo taa kebe ke get nè nga pat nal lé. 12Tà le Nube è tà ke tò kumgajer ke ra kule ngain dum kuye kaskar ke ate ngang joo. E aw sár tee ngarankem̂ doo’t se tàgir le’n, se dè kur rage se wubu ke kem̂ kinge ra’t a tɔ. Tà le Nube ndi ter tàgir le doo ke dè ɓengrenn’t se nyan ke doo ɔje kem̂n’t le ra ɓai a tɔ. 13Nyankunde le Nube karé bè ke ɓɔyɔ ra’n tàkumn’t goto. Nyan malang tò nata ndái-ndái tàkum è ke ndɔn’t j’à tutei go nyanra jéi kadi nin. 14Ade j’uwei kundekem̂ ke j’ilei mber’n nga mong tede j’awi se njèkuje nyan-mese ke bò. Njèkuje nyan-mese ke bò nè nga è Jésu Ngonn le Nube ke unde kem̂ danran ndàt gang aw sár ra Nube’t nú. 15Kerɔte kuwe, maw njèkuje nyan-mese le jéi nga ase ra se jéi dè yaige’t le jéi kuwe. Loo ke ndɔ nain dè nang nè ɓai nga, nyange nan’n titeke nan’n jéi bè tɔ, nè è ute kaiya mbeng. 16Ade j’agi ngɔr kɔte kutu-ngar’t le Nube ke njè kem̂noje se kem̂nda káng. Loo nè nga Nube à ade kem̂’n à tin mbit dè jéi’t, à ade jèi nyan-noje ke à ra se jéi ndɔ ke kanm’t ɓai.

will be added

X\