HEBREUGE 2

1Gir’n ke nè á, gar-gar ade j’adi kem̂ jéi è dè ra jéi’t dum ke kété ɔje dè nyange ke j’ooi tà’n ɓá nga. Ke nè á jè rai bè lé ɓaa, j’à nditei ndàl kosoi kɔke. 2Tà ke ndɔ ke dooge ke danrán ndói kà jéige nga, ke nè á doo karé al dè éké unn mbi’n dè’t ɓaa, kure’n à ɔde kum’n se go rebe’n titeke d’ɔje’n nga kuwe. 3Kaje ke bò nè nga, ke nè á j’an-in ke nyan lé ɓaa, ké tà à uwe dè jéi lé titeke bain wa? Kaje ke bò nè nga, Kuwe-ɓee kuwe unn gir kile mber’n kété ɓita njé ke ooi tà’n tànn’t se mbi de edi jèi ade aw go lenn’t deĵ ɓai. 4Nube kuwe géa ra nyan-tɔjege se nyange ke dum kum a, se nyankɔbege gai-gai le kade njékɔrgo tàge an-in tà tam de ke ngarankum tà le’n è Nube kuwe. Taɓai, Nube kai nyan-nojege le Ndil-Kem̂nda se go kem̂ndige le’n è kuwe. 5Konɓee ke ndi à ree ke j’à j’ilei mber’n nè nga, è dooge ke danrán á Nube à ade à on-in lé, nè è dooge ke dè nang nè á à on-in. 6Nè doo karé tam tà nè nga kêl loo karé ke rang’t kem̂ Magtub ke tò se ninn’n ede nè: «Ké doo nga, è nyan ri kade kem̂i olé dènn’t wa? Ké dookunde nga è nyan ri kade i tɔse kumi dènn’t wa? 7Oiyo, i ra doo ade tɔgmong le’n nain gugu ndêin go le dooge ke danrán’t ade kur’n aw mbɔr. I ade ndubra se riɓar taai ra doo ndul nga pel-pel. 8I ade doo è njèkonɓee dè nyange malang ke i ra de ɓá nga.» Nyan karé ke nal k’ee gir tɔgmong’t le doo nga goto. Nè né è bè géa, ɗarinè jè j’an titeke doo è njèkon dè nyange malang lé ɓai. 9Nè jè tɔse kum jé dè nyan ke nè’t: Jésu, è ke dé tel se’n d’ade tɔgmong le’n nain go le dooge ke danrán ndêin bè, ɓita go’t gugu dé tel d’ule ndubra se riɓar dènn’t tede nyankem̂konge ke inge ji yo’t. Takul kem̂noje le Nube, è á Jésu inge’n yo weii’n tede dooge malang. 10Nube è njèkunde nyange malang, nyange malang tooi takul’n. E ndige tel dooge bule ke ngann kem̂nge kade ingei ndubra le’n se’n n’ee Nube nan’t tɔ. Gir’n ke nè á è tel’n Jésu ke njèkaje dooge ke maje ɔr njêt tede nyankem̂konge ke è inge. 11Jésu togo se-kaiyage le dooge ɔr de unde de se ninn de gai. E a, dooge ke è unde de se ninn de gai a tɔ nga, ei girkà karé. Gir’n ke nè á ra Jésu sɔl’n dè ɓar dooge ngakonnge lé. 12Kerɔte kuwe Jésu ede Nube ede nè: «M’a m’tee se rii non ngakonmge’t a, m’a m’ɗɔyi se pa dann kosdooge ke Israel a tɔ.» 13Jésu tel tam ɓai ede nè: «Man ɓaa, m’a m’unde kem̂’m dè Nube’t kuwe karé.» E tel tam kuwe ɓai ede nè: «An’m, man se ngannge ke Nube ade’m se de.» 14Ngannge ke d’oje de se go danra nga ei dooge ke yo on ɓee dè de’t. Jésu géa ade d’oje’n ke doo made de bè tɔ. E ra tite bè tede le kɔr’n tɔgmong le njè kem̂ majelé ke njè tɔ ko dooge wont kɔke se go kwei le’n. 15Jésu ra titeke bè tede le taa’n dooge ke yo ra de ɓer ade ndebi nginn-nginn. 16Kerɔte kuwe, Jésu ree dè nang nè tede din-in dooge ke danrán lé, nè è ree tede din-in ngannkà Abraham. 17Gir’n ke nè á, gar-gar Jésu tel tanan se ngakonnge tcha-tcha dè nyange’t malang tede kade tel ee’n maw njèkuje nyan-mese le Nube a, taɓai è njè kem̂kanm ke dooge asi kundei kem̂ de dènn’t tede kase ke è ase kɔr se-kaiyage le kosdooge malang kade taai kum Nube kerɔte. 18Ɗarinè, Jésu asekum ra se njé ke nyankem̂kon nan de; tede è kuwe géa, ndɔ ke orè tà’n njak dè nyange ke nan’n tɔ.

will be added

X\