HEBREUGE 13

1I tári nan se ndɔge malang tite ngakon nange bè m ebi’t lé. 2Adi kem̂ si wei nal dè ra mba’t lé. Ra mba ke titeke bè á njé ke nange uwei dooge ke danrán ke ra de’t anje kade geri. 3Adi kem̂ si olé dè njé ke tooi dangai’t titeke sei géa, sei dangaige se de nan’t bè tɔ. Adi kem̂ si olé dè njé ke dé ra kum de ndoo tite sei géa, sei danra ke karé se de nan’t a tɔ. 4Maje kade dooge malang ilei koje dè taa nan’t. Maje kade dingem se dinye adi taa nan le de unju nyang-nyang. Kerɔte kuwe, Nube à gangtà dè dooge ke njé tò se nan ke kaiya’t a, à gangtà dè njé tò se dinye le dooge a tɔ. 5Adi ngur nar ule aljem̂ tà si’t uwe’n sei ɓer lé. I rai ranel dè nyan ke tò ji si’t tede Nube kuwe tam ndàt nè: «M’a m’inyei sengel lé a, m’a m’inye gooi ndan lé a tɔ.» 6Gir’n ke nè á jè ndaii kem̂ jéi káng j’edi nè: «Kuwe-ɓee è der gir’m, m’a m’ɓel ndan lé. Doo ase ra se’m nyan karé lé.» 7Adi kem̂ si olé dè njékɔr non sige ke ndɔ ke ilei mber tà le Nube adi sei nga. Adi kem̂ si olé dè ndi kumgajer le de dè nang nè a, se dè kwei’t le de a tɔ. An-in kundekem̂ le de ke nyan-tɔje le si tɔ. 8Jésu-Krist nga tel ra’n rang lé. E ndi titeke tagela a, titeke ɓila a tɔ. A ndi titeke bè sár se non. 9Inyei loo adi njéndó dooge nyan ke se ri de-ri de ke rang libi kum si lé. Nyan ke soo’t ɓaa, è noje ke Nube uwe se jéi á ule dingem kem̂ jéi’t m è ndukunnge ke ɔje dè nyankusege lé. Nè dooge ke ilei koje dè ndukunnge ke ɔje dè nyankuse nè nga, nyan karé ke è soo de’t tutu goto sár. 10Jèi nga j’awi se ɗinger loo nyankuje-mese le jéi ke njékuje nyan-mesege ke ndɔ ke rai kule gile kei ke mari ke tò se ninn’n nga ndête kade awi tutu usei nyan lé. 11Nyankulge ke maw njèkuje nyan-mese uje’n mese kem̂ gile kei ke tò se ninn’n gai nga, è tede kuge’n kure majelé le dooge. Danra nyankulge ke d’uje’n mese nè nga, d’oto d’aw’n gide loo’t nata dé ró se por rák-rák kɔke. 12Gir’n ke nè á Jésu géa weii’n gide ɓee-bò ke Jérusalem nata tede kade mese’n ɔr’n kosdooge unde de se ninn de gai. 13Bè ɓaa, ade jè taai nyan rasɔl le’n j’otoi dè jéi’t j’awi jè tilei non’n gide loo ndi’t nata heb. 14Oiyo, dè nang nè nga j’awi se ɓeekon le jéi ke get ke tò se non lé, nè jè sangi ɓeekon ke get ke ndi à ree. 15Bè ɓaa, adi tà jéi teen ile riɓar dè Nube’t se ndɔge malang takul Jésu. Pite Nube nga tò asenan se nyankuje-mese ke j’unni j’adi nin bè. 16Adi kem̂ si wei nal dè ra maje’t, se dè kai tà nyankinge le si kade dooge ke rang nga lé. Nyankuje-mesege ke titeke bè nga taa kum Nube. 17Ilei koje dè njékɔr non sige’t a, ulei dè si adi de a tɔ. Dé nè nga, dé tɔse kum de dè ngarankum ra si’t se ndɔge malang. E dé nè á ndɔ ke rang d’a d’ɔrgir tà ke ɔje dè ngarankum ra si kade Nube. Ilei koje a, ulei dè si adi de titeke bè le kade dé ra’n kule nè nga se ranel anje ɓar tà. Ke nè á dé ɓar tà ɓaa, ayé maje dè si’t lé. 18Ɔji tà se Nube ngain tede le jé. Kerɔte kuwe, jè ger mbak titeke tàgir le jé ke kem̂ jé’t nga unju nyang-nyang. Taɓai jè ndige kade pa njiye jé maje se ndɔge-ndɔge. 19Nè m’tel m’ra ndoo ra si’t nja karé ɓai le kade ɔji tà se Nube tede le’m le kade inye loo ade m’tel kalang m’aw ra si’t gugu. 20Nube ke njè kade jèi kem̂lom, è ade Kuwe-ɓee le jéi Jésu unde loo tee dann njé ke koo’t. Nube ɔr’n unde’n ke maw njèkul batege. Jésu unde gir mann-ra ke à tò sár se non se mese’n è kuwe. 21Maje kade Nube ke njè kade jèi kem̂lom ade sei tɔg si ade i rai nyange ke maje ke se ri de-ri de. Maje kade ade sei tɔg si kade i rai nyan ke kem̂’n ndige. Maje kade Nube ade jè rai nyange ke taai kum’n takul Jésu-Krist. Maje kade ndubra è le Krist sár se non. Maje kade è titeke bè kuwe. 22Ngakonmge, m’deje sei kade i taai tà ndejege nè nga se kem̂nda káng, tede tàge ke m’ndang kem̂ magtub’t m’ule’n m’ade sei nga, ase loon’t bè karè. 23Maje kade i geri titeke ngokon jéi Timothée nga d’inye’n dɔ ɓá ta. Ke nè á ree law ɓaa, j’à j’aw se’n nan’t le kan sei. 24I rai lapya njékɔr non sige se njétaakem̂-Kristge malang adi man. Njétaakem̂-Kristge ke kem̂ ɓeekon ke Italie rai sei lapya. 25Maje kade kem̂noje le Nube nain se si malang.

will be added

X\