HEBREUGE 12

1Jèi géa, njékɔrgo tàge le jéi ndii ɗêng-ɗêng tɔ. Bè ɓaa, nyan ke rara ke wɔi jèi a, se kaiya ke ule jèi poré ɔge jèi kaw kum jéi ke kété nga adi jè risi de j’undei de nang. J’an-in ngɔde kum jéi ke kété ɔje dè nyan ke tò non jéi’t. 2Jésu è njèkunde gir kundekem̂ le jéi a, è njè kade kundekem̂ le jéi maje ɔr njêt a tɔ. Ade j’oréi kum jéi dènn’t sêw-sêw se ndɔge malang. Jésu inye ra’n ade dé tɔl kade kage-ke-dese’t anje kan rasɔl’n ke nyan. Kerɔte kuwe, Jésu oré kum’n dè nyan ranel ke tò nonn’t kété ɓaa, ɗarinè è ndi dè jikon kutu-ngar’t le Nube ta. 3Jésu nga géa njékaiyage utei nin mbeng, nè oré tà’n njak. I giri dènn’t ɓaa uti kum si parr m adi kem̂ si tête mann lé. 4Sei rɔi se kaiya utei nin mbeng, nè i ndai garang-garang sár kade ingei yo lé ɓai. 5Sei adi kem̂ si wei nal dè tà ke Nube ndeje’n sei titeke bɔ ngannge ndeje’n de bè nga. «Ngonn’m, kumkunju ke Kuwe-ɓee tɔji nga, maje kade an ke nyan ke karè lé. Ke nè á Kuwe-ɓee ndángi ɓaa, ade kem̂i tête mann lé. 6Doo ke Kuwe-ɓee tár’n ɓita tɔje’n kumkunju a, dooge malang ke è an de ke ngann’n ɓita um ndêin dè de’t ɓai a tɔ.» 7Nube an sei tite ngannenge bè á tɔje’n sei kumkunju. Maje kade oréi tà si njak. Ké ngonn ke ra á bɔ’n tɔje’n kumkunju lé wa? 8Ke nè á Nube tɔje sei kumkunju titeke tɔje’n ngannenge malang nga lé ɓaa, sei sei ke bɔ gotoge m sei ngann kem̂nge lé. 9Bɔ jéige ke d’oje jèi nga, loo ke d’ɔje jèi kumkunju tede kade jè ndii maje ɓaa, j’ulei dè jéi j’adi de. Bɔ jéi Nube ke njè kade jèi ndikumgajer nga, ké j’à kulei dè jéi kadi nin dum bɔ jéige ke oji danra jéi nga ɓai lé wa? 10Bɔ jéige ke oji jè nga tɔji jèi kumkunju mbɔr se go tàgirge le de ei. Nè Nube ɓaa tɔje jèi kumkunju tede kade j’ubei maje a, jè tooi se ninn jéi gai tite’n è bè tɔ. 11Kɔje doo kumkunju ke rara nga, kété ɓaa è kumndoo m è ranel lé. Nè go’t gugu ɓita njé ke dé tɔje de kumkunju à teli ndii se kem̂lom, tede nyanra de ke se dè naje’n ke unni gir rai nga. 12Bè ɓaa, adi ji si ke wei sululu nga tel mong káng-káng a, adi merkeje si ke unde ɓalè nga tel mong ɗaj-ɗaj a tɔ. 13I rai rebege ke ndai danné sêw i njiyei tutu, tede kade njèmete tel njiye maje tá m kade ɔse rebe pat nal lé. 14Uwei ra si mong le ndii se kem̂lom se dooge malang. Awi kum si ke kété-kété le k’eei dooge ke tooi se ninn de gai. Ke nè á è bè lé ɓaa, doo karé bè géa à an Kuwe-ɓee se kum’n ndan lé. 15An-in go ra si maje le kade doo karé bè géa tel uwe ndube kem̂noje le Nube nga lé ta. Taɓai undei kumkunju dè ra si’t tede kade ngire wurkate ke ase tuju dooge ube dann si’t lé, nè bainléa ngire wurkate nè nga à kin tuju dooge bule ngain. 16An-in go ra si maje le kade doo karé bè géa tel è njè tò se nan ke kaiya’t éké njè nede nyan tite Esau lé. Esau nga, ndɔ ke ige nyan ke ɔje dè ngonn der nga kɔke tede nyankuse ke nja karé bere. 17Sei geri mbak, Esau nga ndɔ ke mbɔr go’t gugu ɓaa, è ndige le kinge ndutɔr ke nyan-ndube nè bɔ’n ute’n mbeng. E non se mann non kumn’t a, è sang loo kade bɔ’n tel tur ndu’n nè ase nan’t ade’n lé ta. 18Loo ke sei ndɔti ngɔr ke ra Nube’t nga, sei asikum ndai kɔte mbal karé ke ri’n nè Sinai nga lé. Mbal nè nga è mbal ke doo ase kɔde se ji’n lem̂ lé. Mbal nè nga taa por gegeg a, tilkus sebe dè’t rip a, loo ke dè’t tel tuge ndul a, nel bò ule dè’t mbin-mbin a tɔ. 19Sei ooi ká burunju ke ndɔ ke ɓar ase loo nák-nák éké ndu Nube ke ndɔ ke ɓar beng-beng nga lé tɔ. Loo ke ndɔ ke kosdooge ke Israel ooi ndu Nube ke ɓar nè nga ɓaa, ei ɓeli ngain ade ndigi kade Nube tel tam tà ede de gugu lé ta. 20Ndɔ ke Nube unn ndu’n ade de ede nè: «Ke nè á è doo ndul éké dan ke rara géa ɔde mbal nè lem̂ ɓaa, d’a t’ile’n se kuberi her mbás-mbás tɔl’n kɔke.» Ɓel ra de ngain ade dé taa ndukunn nè nga lé. 21Nyan ke ndɔ ke Nube ade d’an nga tò ɓel ngain ade Moise kuwe géa tam ede nè: «Ɓel ra’m ngain ade m’ndebe nginn-nginn.» 22Nè sei ɓaa, i reei ngɔr ke dè mbal ke ri’n nè Sion, ɓee-bò le Nube ke njèndi kumgajer. Ɓee-bò nè nga è Jérusalem. E loo ke dooge ke danrán ke kɔr de dum mbɔje ɔsi nja de nan’t ndai rai ranel. 23Sei reei ra njékebe nange le Nube ke ei ngann dernge ke d’unde ri de kem̂ Konɓee ke danrán’t. Sei reei ra Nube ke njègangtà dè dooge’t malang a, se dè njé ra nyan se dè najennge ke ɔri son kule le de njêt ɓita weii ɓai a tɔ. 24Sei reei ra Jésu ke njè nda dann mann-ra ke kige’t le Nube se kosdooge le’n. Mese Jésu ɔr tà dè jéi’t dum le Abel ke ndɔ ke an-in nang nga ɓai. 25Kem̂ si dè ra si’t nè bainléa a kin-in mbati kooi tà tà Nube ke ndi ede sei tà’t nga. Kosdooge ke Israel ke ndɔ ke mbati kooi tà tà Moise’t ke njè kede de tà dè nang nè nga, ndɔ ke d’ade kure nyan ra de ɔde kum de. Jèi ɓaa, Nube ndi danrán nú á ede’n jèi tà. Jèi géa, ke nè á jè mbati kooi tà tànn’t ɓaa, kure nyan ra jéi à ɔde kum jéi dum le de ei nè ɓai m loo naje’n goto. 26Ndɔ ke ndu Nube ɓar beng-beng ade nang yei ɓuk-ɓuk. Nè ɗarinè è unn ndu’n ede nè: «M’a m’ade nang à yei nja karé ɓai. E nang á m’a m’ade à yei ɓuk-ɓuk se kar’n lé ta, nè danrán géa m’a m’ade à yei ɓuk-ɓuk se’n nan’t tɔ.» 27Tà ke Nube tam ede nè: «Nja karé ɓai» nga tɔje jèi njai titeke nyankundege à yeyi ɓuk-ɓuk, à gotoi njêl le kinyei loo kadi nyange ke à yeyi ɓuk-ɓuk lé. 28Ade jè rai oiyo Nube tede ɓeekon ke j’ingei nga è ɓeekon ke à yei ndan lé. Taɓai ade jè rai nyan ke taa kum’n a, j’ilei koje dènn’t a, jè ɓeli ndil’n a tɔ. 29Kerɔte kuwe, Nube le jéi nga è tite por ke ró nyan bè.

will be added

X\