HEBREUGE 11

1Kundekem̂ nga, è nyan ke doo unde kem̂’n dè’t tchên. Kundekem̂ nga, è nyan ke doo an se kum’n lé ɓai nè è um kem̂’n dè’t bɔk-bɔk titeke è inge nyan nè nga ɓá bè. 2Dooge ke kété mari ri de ɓar ngain nga taai kum Nube takul kundekem̂ le de. 3Takul kundekem̂ á jè geri titeke Nube unde nang nè se go tà ke tee tànn’t. Nyange ke doo an se kum’n nga in-in ra nyange ke doo asekum kan se kum’n lé. 4Takul kundekem̂ á Abel ree’n se nyankuje-mese ke maje dum le Cain ade Nube. Takul kundekem̂ á Nube ɔr’n tà dè Abel’t a, tam’n tà ke maje ɔje dè nyankuje-mesege ke è ree’n a tɔ. Abel nga wei mari kuwe, nè takul kundekem̂ le’n á ɓila ndi à ɔdenan tam’n tà ɓai. 5Takul kundekem̂ á d’ɔr’n Hénok njêl d’aw’n se’n ra Nube’t anje kaw se rebe ke ra yo’t. Doo karé géa tel inge Hénok gugu lé tede è Nube kuwe unn’n aw se’n unde’n kɔtenn’t. Kété ɓita kade d’ɔr’n njêl d’aw se’n nga, Magtub ke tò se ninn’n tam titeke Hénok taa kum Nube. 6Ke nè á kundekem̂ goto ɓaa, doo asekum taa kum Nube ndan lé. Doo ke age ngɔr ke ra Nube’t tede kum se’n nan’t bɔk nga, gar-gar maje kade ger titeke Nube ndi tutu. Nube à uge dè ji njé ke sangi nin se kem̂nda káng nga. 7Nyange ke ndɔn’t ayé teei ɓai nga, ndɔ ke Nube ribe dè de ede Noé kété ade oo takul kundekem̂. Noé ile koje dè tà ke Nube ede’n, è in ra bato ade njé ke kem̂ kei le’n awi kem̂é ajii. Ra ke Noé ra titeke bè nga è ile’n tà dè dooge ke dè nang nè. Taɓai, takul kundekem̂ á ndɔ ke Nube ɔr’n tà dè Noé’t ade tel ee’n njè ra nyan se dè naje’n. 8Takul kundekem̂ á Abraham ile’n koje dè ɓar ke ndɔ ke Nube ɓar’n. Abraham in aw kem̂ ɓeekon ke ndɔ ke Nube unn’n ndu’n le kade’n. E in jain aw nal ger loo ke get ke è ndi à aw ke tutu. 9Takul kundekem̂ á Abraham ndii’n kem̂ ɓeekon ke ndɔ ke Nube unn’n ndu’n le kade’n asenan se njè nanm bè. Abraham uwe nanm kem̂ kei kubuge’t nan’t se Isaac a, se Jacob a tɔ. Isaac a, Jacob a tɔ nga, ndɔ ke Nube unn ndu’n ade de titeke unn’n ndu’n ade Abraham bè tɔ. 10Abraham ndi ngine ɓee-bò ke d’unde gir’n d’ade ngiring ngiring-ngiring. Ɓee-bò nè nga, è Nube kuwe á è njè kɔje gir’n a, njè kunde’n a tɔ. 11Sara nga kuwe géa ɓuge gɔk-gɔk nè takul kundekem̂ á tel’n ase’n kum kunde’n ko girkà dooge. E um kem̂’n bɔk-bɔk dè Nube’t titeke ayé ra nyan ndɔ ke unn’n ndu’n nga kuwe. 12Gir’n ke nè á Abraham ke è bɔ dingem ke ɓuge gɔk-gɔk a, yo uje bu rann’t ɓá a tɔ, oje’n ngonn ade oje’n ngannkànnge. Girkà Abrahamge bulei nyanmi-nyanmi tite kɔnyonge ke danrán a, bulei dum mbɔje tite nyeenger ke tà ba-bò’t bè a tɔ. 13Dooge nè nga undei kem̂ de dè Nube’t sár weii anje kingei nyan ke ndɔ ke Nube unn’n ndu’n le kade de nga. Nè né è bè géa, ei an-in nyange nè nga se go ngal’n rai oiyo Nube. Ei tami ndàt edi nè: «N’ee n’ei mbage ke n’uwei nanm dè nang nè karè.» 14Dooge ke tami tà titeke bè nga tɔji jéi adi jè geri njai titeke ei dooge ke ndii à sangi ɓeekon le de ke get. 15Ke nè á ndɔ ke kem̂ de olé dè ɓeekon le de ke in-in tutu ɓaa, né ayé teli tutu mari bere ta. 16Nè ɓeekon ke maje ngain dum dè madege ke ngur’n ra de pênn-pênn ɗarinè nga, è ɓeekon ke danrán. Gir’n ke nè á ra Nube sɔl’n dè ɓar ke dé ɓar’n Nube le de nga lé. Kerɔte kuwe, è uwe dè nja ɓee-bò karé tede tà le de ɓá. 17Takul kundekem̂ á ndɔ ke Nube nan’n kem̂ Abraham ade unn’n Isaac ke nyankuje-mese ade’n. Isaac è ngonn dagi ke ndɔ ke Abraham oje’n se go kunn-ndu le Nube. Nè né è bè géa, è unn’n ade Nube ke nyankuje-mese. 18Ndɔ ke Nube ede Abraham kété ede nè: «A inge ngannkàige se go rebe ke ra ngonni Isaac’t kuwe.» 19Abraham ger kem̂n’t mbak titeke né Isaac wei géa, Nube asekum kade unde loo tee dann njé ke koo’t karè. Gir’n ke nè á Nube tel’n se ngonn’n ade’n gugu asenan se doo ke unde loo tee dann njé ke koo’t bè. 20Takul kundekem̂ á ndɔ ke Isaac tɔr’n ndu’n dè Jacob se Esau ɔje’n dè nyange ke à reei ndɔ ke rang. 21Jacob unde kem̂’n dè Nube’t. Loo ke ndɔ ke nain ngɔr kade à wei ɓaa, è tɔr ndu’n dè ngann le Joseph’t karé-karé malang. Jacob oré dè kage tɔse le’n nang gan tá ɔse keje’n nang pite’n Nube. 22Joseph unde kem̂’n dè Nube’t. Loo ke ndɔ ke nain ngɔr kade wei ɓaa, è tam tà ɔje’n dè tee ke ndɔn’t ngann Israelge à undei loo teei kem̂ ɓee ɓer’t ɓeekon ke Egypte. Tabai è unn ndu’n ade ngann Israelge ɔje’n dè nyan ke kade ndɔn’t rai se kingennge. 23Njé koje Moisege undei kem̂ de dè Nube’t. Loo ke ndɔ ke oji nin ɓaa, ei ɓɔyɔi nin nan mute. Ei an-in titeke ngonn de maje kum de’t ngain. Ei ɓeli ndukunn le ngar nga lé. 24Moise unde kem̂’n dè Nube’t. Loo ke ndɔ ke tɔge ɓá ɓaa, è mbate kade dooge ɓari nin ngonn le ngonn Pharaon ke dinye. 25Nè è ndige kade dé ra kum’n ndoo se kosdooge le Nube nan’t; è soo’t ngain dum ndi ra ranel mbɔr dann kaiya’t. 26Moise an rasɔl ke ndɔn’t d’a d’ile dè Krist’t nga ke nyanbaw ke dum dè nyanbawge malang ke ɓeekon ke Egypte. E oré kum’n sêw dè nyankuge dè jinn’t ke ndɔ ke rang. 27Moise unde kem̂’n dè Nube’t á ndɔ ke è inye’n ɓeekon ke Egypte nal ɓel wong ke ayé ra ngar dènn’t. E nda dè njann’t njáng titeke an Nube ke dookunde le’n ase kan’n se kum’n lé nga ɓá bè. 28E takul kundekem̂ á ndɔ ke Moise ade dé tɔl ngann batege unde’n gir ra nan Paque. E ade dé rɔke mese ngann batege tàbit keige’t le de tede kade doo ke danrán ke njè tɔ ko dooge tɔl ngann der kosdooge ke Israel lé. 29Kosdooge ke Israel undei kem̂ de dè Nube’t á ndɔ ke gangi ba-bò kate titeke è nang ke tutu bè. Nè loo ke dooge ke Egypte nan-in le ndaji kum de ɓaa, nain manné wont. 30Kosdooge ke Israel undei kem̂ de dè Nube’t. Gir’n ke nè á ndɔ ke njiyei guguri dè ɓee-bò ke Jéricho ndɔ ji sejimute ɓaa, ndogo bɔr ke d’unde d’an-in’n dè ɓee-bò ke Jéricho nga unde nang ráp-ráp. 31Rahab, kaiya dinye unde kem̂’n dè Nube’t á ndɔ ke dé tɔl’n se njékaltàge tà Nube’t lé. E uwe njé gon looge ke rann’t ra de mba se kem̂lom. 32Ké ta ri á m’a tam ɓai wa? Ke nè á m’ndige kɔrgir tà ke ɔje Gédéon, Barac, Samson, Jephté, David, Samuel se njéribe-dè-tàge ke tà Nube’t se ngang’n lêr-lêr ɓaa, kurloo le’m ayé kase lé. 33Dooge nè malang undei kem̂ de dè Nube’t á ndɔ ke têti rɔ ɓeekonge a, rai nyan ke se dè naje’n a, ingei nyange ke ndɔ ke Nube unn’n ndu’n ade de a, uwei tà toboige a tɔ. 34E takul kundekem̂ á ndɔ ke ei tɔli por ke on bilm-bilm dè de’t a, teei tà yo kuye kaskar’t a tɔ. Ke nè á d’oso se ratur ke tò ɓel ngain géa, ra de tel tò karè a, dé gon rɔge ade dé yal njérɔge ke dè ɓeege ke rang karé-karé a tɔ. 35Dinyege undei kem̂ de dè Nube’t. Titeke bè á ndɔ ke njé ke nange teli ingei dooge le de ke undei loo teei dann njé ke koo’t. Dingemge ke nange ndɔ ke dé ra se de nyantosowurge, nè né è bè géa, ei mbati kade doo taa de inye de dɔ. Ei rai titeke bè tede undei kem̂ de tchên dè kunde loo tee dann njé ke koo’t ke maje ngain gée nga. 36Nè njé ke nange ke rang ɓaa, ndɔ ke d’ule mbe dè de’t a, dé tunde de se ndêin a tɔ. Ndɔ ke dé tɔ njé ke nange se sul a, dum de dangai’t a tɔ. 37Dé tile njé ke nange se kuberi her mbàs-mbàs dé tɔl de a, dé tuje de danné mɔr-mɔr dé gang de a, dé tɔl de se kuye kaskar a tɔ. Dé ra de d’ade d’ile dɔ gam-gam a, d’ɔi nyange le de ndát-ndát ade ɓann ngire batege se binyege á d’utu’n dè ra de a tɔ. Dangte ra de tede dé ra se de majelé ngain a, d’ɔge de loo taa kebe a tɔ. 38Dé nga, njé ke dè nang nè utei de mbeng ade d’ile ganm-ganm se kem̂ dile a, se dè mbalge, d’an-in dé ɓɔyɔ ra de kem̂ bolè mbalge’t se gute ɓee nang’t a tɔ. 39Dooge nè malang nga taai kum Nube tede kem̂ de ke undei dènn’t, nè né è bè géa, ingei nyan ke ndɔ Nube unn’n ndu’n le kade nga lé ɓai. 40Ndɔ ke Nube ɔje rebe nyan karé ke maje ngain dum tede le jéi, nè è ndige le kade d’inge nyan nè nga anje jèi ndan lé.

will be added

X\