HEBREUGE 10

1Kerɔte kuwe, gute-ndu le Moise nga è til nyan-majege ke ndii à reei ɓai m è ngarankum nyange nga lé ɓai. Gir’n ke nè á gute-ndu ase kade dooge maji ɔri njêt se go nyankuje-mese ke d’uje se ɓal-ɓal nga ndan lé. 2Ke nè á ndɔ ke nyankuje-mese nè nga ɔr se-kaiya le njé ra majelége ade maji ɔri njêt nja karé ke ngang’n a, tàgir ke kem̂ de’t ile tà dè de’t lé a tɔ ɓaa, ké d’a kaw ndoo nyankuje-mese nja bule-bule ɓai wa? 3Nè nyankuje-mesege nè nga oléi kem̂ dooge dè kaiya ra dege ke se ɓal-ɓal. 4Kerɔte, mese bɔ mangege se ɓal binyege ase kɔr kaiyage kɔke ndan lé. 5Gir’n ke nè á loo ke Krist ayé ree dè nang nè nga, è ede Nube ede nè: «I ndige nyankuje-mese se nyan kade noje lé, nè i unde danra’m. 6Nyankuje-mesege ke ró se por se nyankuje-mese ke ɔje dè kaiya nga, taa kumi lé. 7E á m’tam’n m’ede nè: An! Nube, m’ree tede le ra nyan ke kem̂i ndige. Dé ndang tà nè nga d’ɔje’n dè’m titeke bè kem̂ Magtub ke tò se ninn’n.» 8Krist tam ede Nube kété titeke bè ede nè: «Nyankuje-mesege éké nyan kade nojege, nyankuje-mesege ke ró se por éké nyankuje-mesege ke ɔje dè kaiya ke d’adi i Nube nga, i ndige de lé a, taai kumi lé a tɔ.» Nyankuje-mesege ke Nube ute de mbeng nè nga, ei nyankuje-mesege ke dooge rai se go gute-ndu ke Moise ndang. 9Go’t gugu, Krist tam ɓai ede nè: «An! Nube, m’ree tede le ra nyan ke kem̂i ndige.» Krist tɔ ko nyankuje-mesege ke mari kɔke tel taa gute se nyankuje-mese ke kanm ke ɔje dè kwei le’n kàde kage-ke-dese’t. 10Jésu-Krist ra nyan ke kem̂ Nube ndige. E inye danra’n ade dé tɔl nja karé bere luk-luk ke ngang’n. Gir’n ke nè á è ɔr’n se-kaiyage ra jéi’t kɔke tel’n jèi dooge ke tooi se ninn de ta. 11Njèkuje nyan-mese ke rara géa nda ndêrm se ndɔ karé-karé tede ra kule tàkum Nube’t a, tede le kunn nyankuje-mesege kade’n a tɔ. Nè nyankuje-mesege nè nga asi kɔri kaiya dè dooge’t ndan lé. 12Nè Krist nga unn danra’n ade ke nyankuje-mese nja karé kuwe njing tede majelé le dooge. Go’t gugu ɓita è aw ndi dè jikon Nube’t sár se non ɓai. 13E ndi dè jikon Nube’t ɗarinè ngine sár kade Nube ade njébange le’n teli ei nyan-sure-nja kum le’n. 14Njé ke Krist unde de se ninn’n gai nga, è tel de ke dooge ke maji ɔri njêt sár se non takul danra’n ke è unn ade ke nyankuje-mese nja karé bere luk-luk. 15Ndil-Kem̂nda géa ede jèi tà nè nga titeke bè tɔ. E tam tà nè kété ke desêin ede nè: 16«An-in! mann-ra le’m ke m’a m’mann’n ra’m kade de kem̂ ndɔge ke à reei non. M’a m’ndang gute-nduge le’m dè ɓengre de’t a, m’a m’ule gute-nduge dann tàgirge’t le de a tɔ. Kuwe-ɓee Nube á tam tà nè titeke bè.» 17Nube tel tam ɓai ede nè: «M’a m’ade kem̂’m à olé dè kaiyage’t le de éké dè nyanra pás-pàsge’t le de nga gugu ndan lé ta.» 18Ke nè á Nube ade kem̂’n tin mbit dè kaiyage’t ɓá ɓaa, doo aw ndoo kunn nyankuje-mese kade tede le kaiya tɔ lé ta. 19Ngakonmge, Jésu wei tede tà le jéi. Takul mese’n á dè jéi too’n pal ade j’awi kem̂ gile kei ke tò se ninn’n se kem̂nda káng ɗarinè ta. 20Jésu pà rebe ke kige ke tò kumgajer unde’n tà kubu gang gir loo danné gang. Tà kubu gang gir loo ke tò se ninn’n nè nga tɔje danra’n è kuwe. 21J’aw se njèkuje nyan-mese ke bò ke d’ɔr’n d’unde’n ke njèkan dè kei le Nube. 22Bè ɓaa, j’agi ngɔr ke ra Nube’t se kem̂nda káng a, se kundekem̂ ke deri tede Jésu togo se-tàgir ke majelé ke dè ɓengre jéi’t. E togo danra jéi se mann ke unju nyang-nyang ɓá a tɔ. 23Kundekem̂ tchên le jéi ke j’ilei mber’n nga, ade j’uwei gan-gan anje kade kem̂ jéi tête mann. Oiyo, Nube à ra nyan ke è unn ndu’n le ra nga kuwe. Adi j’umi kem̂ jéi dènn’t bɔk-bɔk. 24Ade jé tɔsi kum jéi dè nan’t a, adi j’ɔsi gir nan dè tár nan’t a, se dè nyanra ke maje’t a tɔ. 25Adi j’inyei loo kebe nan le jéi titeke njé ke nange ebi ra de dè’t se ndɔge, ndɔge nga lé. Adi j’ulei dingem kem̂ nan’t dum ke kété tede sei an-in ndɔ tel le Kuwe-ɓee Krist nain ngɔr ta. 26Jèi ke jè geri ngarankum tà njai ɓá, ke nè á jè teli j’inyei go kundekem̂ le jèi le tel rai kaiya titeke kem̂ jéi ndige ɓaa, nyankuje-mese karé ke rang ke à ɔr se-majelége le jéi goto ta. 27Nè nyan karé ke jè nginei ɓaa, è tà ke tò ɓel ngain ke Nube à gang dè jéi’t. Nyan karé ke rang ke jè nginei ɓai tɔ ɓaa, è por ke on bilm-bilm ke à ró njébange le Nube ndɔ gangtà’t le’n. 28Nanan ke altà tà gute-ndu ke Moise ndang, ke nè á dooge joo éké mute ɔri go njai ɓaa, d’a d’unn kum de mbeng le tɔl’n m doo karé à an kumndoo le’n lé. 29Doo ke an Ngonn le Nube ke nyan lé nga, d’a gangtà ke tò ɓel dènn’t dum madege ke rang. Ké sei giri bè an-in lé wa? Kerɔte kuwe, doo nè nga ile koje dè mese mann-ra ke d’ɔr’n d’unde’n se ninn’n gai nga lé. E nede Ndil-Kem̂nda ke njè kade jè geri kem̂noje le Nube nga. 30Oiyo, è Nube ke njè tam kede nè: «Dalban ɔje dè’m, nanan ke ra majelé nga è man á m’a m’ade kure nyanra’n à ɔde kum’n» nga, jè geri nin ɓá. E tel tam ɓai ede nè: «Kuwe-ɓee à gangtà dè kosdooge’t le’n.» 31Koso ke doo à nal pater koso ji Nube ke njèndi kumgajer’t nga, è nyan ke tò ɓel ngain. 32Adi kem̂ si olé dè nyan ke tee dè si’t kété loo ke ndɔ ke ingei lookar le Nube. Sei ingei lookar le Nube mbɔr lé ɓai ɓaa, sei unni gir ra rɔ ke bò a, ingei nyankem̂konge a tɔ. 33Ndɔ ke nange dé ra se si nyantosowur a, d’ile rasɔl de si’t tàkum dooge’t dé tel sei ke kurkogo le dooge a, ndɔ ke nange tɔ ɓaa sei kuwe in-in se kem̂ si oréi ra si nan’t se njé ke dé ra se de nyange ke titeke bè nga a tɔ. 34Sei an-in kumndoo le dangaige. Loo ke dooge ɔyi nyankinge sige géa, sei rai ranel tede sei geri mbak titeke nyankinge le si ke maje dum ke doo à taa ji si’t lé tò ra Nube’t non ɓai. 35Inyei go kundekem̂ le si nga lé, tede takul’n á d’a d’uge’n dè ji si. 36Sei awi ndoo korè tà njak tede le ra’n nyan ke kem̂ Nube ndige kɔr son’n njêt. Titeke bè á a ingei nyan ke ndɔ ke Nube unn’n ndu’n le kade sei nga. 37Magtub le Nube ke tò ninn’n tam ede nè: «E ke ndi à ree nga, mbɔr ɓaa, è à ree kuwe m à tile mbɔr lé. 38Nube tam ede nè: Doo le’m ke ra nyan se dè naje’n ɓaa, è à ndi kumgajer takul kundekem̂. Nè ke nè è inye go kundekem̂ le’n kɔke ɓaa, ra’m à nel’m dènn’t lé.» 39Dooge ke nange inyei go kundekem̂ le de kɔke awi dann tuju’t. Jèi nga jèi tite de lé. Jèi ɓaa, j’undei kem̂ jéi dè Nube’t tede kaje’n ngarankum ra jéi.

will be added

X\