HEBREUGE 1

1Kété mari, Nube ade njéribe-dè-tàge ke tànn’t edi kà jéige tà se rebege gai-gai nja bule. 2Nè kem̂ ndɔge ke ngeinn’t ɗarinè ɓaa, Nube ade Ngonn kem̂’n kuwe ree ede jèi tàge le’n ade j’ooi. Nube ɔr’n unde’n ke njè kɔi nyan-ndubege malang. E unde nyange se dooge malang takul Ngonn’n nè nga. 3Ngonn nè nga, è njè kade ndubra le Bɔ’n Nube kile ra’n ke nata a, è kum gute tà Bɔ’n kuwe tcha-tcha a tɔ. Ngonn nè nga gete nyankundege malang se go tà ke tee tànn’t. Loo ke Ngonn nè nga ɔr se-kaiyage tɔl kon’n ɓá ɓaa, è aw ndi dɔ nú dè jikon Nube ke njè dum dè nyange malang. 4Ngonn nè nga tel maje ngain dum dooge ke danrán ɓai. E inge ri ke tò gai se le de ke nyan-ndube. 5Kerɔte kuwe, Nube nga teen tà’n nja karé bè kuwe ede doo ke danrań ede nè: «I i Ngonn kem̂’m, ɓila man m’ee Bɔi ke m’ojii» bè ndan lé. Taɓai Nube nga teen tà’n nja karé bè kuwe tam’n tà se doo ke danrán ede nè: «M’a tel k’ee bɔ koje’n a, è à tel k’ee Ngonn kem̂’m a tɔ» bè ndan lé. 6Taɓai loo ke ade Nube ule Ngonn der’n ke è dagi ade ree dè nang nè ɓá ɓaa, è tam titeke bè ede nè: «Maje kade dooge le Nube ke danrán malang ɔsi keje de nang non Ngonn Kem̂n’t nè nga le ɗɔyi nin.» 7Nube tam tà ɔje’n dè dooge ke danrán ede nè: «Nube tel dooge le’n ke danrán ke nelge a, è tel ngann njékulege le’n ke ndon por ke on bilm-bilm a tɔ.» 8Nè loo ke Nube tam tà ɔje’n dè Ngonn’n ke dagi nè ɓaa, è ede’n ede nè: «Kutu-ngar lei i Nube tò sár se non a, kage konɓee lei nga è kage konɓee ke se dè naje’n a tɔ. 9I unde nyanra ke se dè naje’n dann kumi’t a, i ɔr nyanra ke se dè naje’n lé nga njêt a tɔ. Hei! Nube, gir’n ke nè á Nube lei ɔri dann njémade loo kawge’t lei ndum’n wubu ranel dèi’t.» 10Nube tel tam tà ɔje’n dè Ngonn’n loo ke rang’t ɓai ede nè: «E i Kuwe-ɓee kuwe á unde gir nang nè kété mari ke desêin. Danrange géa, è i kuwe á i unde de se jii a tɔ. 11Danrange se nang à jɔréi yɔgrɔm ɓai, nè i ɓaa, a i ndi sár se non. Danrange se nang à osoi ndis malang tite kubu bè. 12I Nube a i tête de ndêl-ndêl asenan se kubu ke bòi yùl bè. D’ade mbel gide de titeke dé mbel’n gide kubu ke ndis bè. Nè i ɓaa, i ndi kum ndii ke mari kuwe se ɓali-ɓali.» 13Kerɔte kuwe, Nube nga teen tà’n nja karé bè kuwe ede doo ke danrán ede nè: «I ndi dè jikonm’t sár kade m’ade njé bange lei teli ei nyan-sure-nja kum lei» bè ndan lé ɓai. 14Dooge ke danrán malang nga, ké ei nel nyange ke ei ngann njékulege le Nube kuwe lé wa? Ké è Nube á ule de kade dé ra se njé ke à ingei kaje nga lé wa?

will be added

X\