NJE KE GALATIE 6

1Ngakonmge, ke nè á uwei doo karé dè ra nyan ke se go rebenn’t lé ɓaa, sei ke i njiyei se go Ndil-Kem̂nda ɓai nga, i gɔli nin ilei nin rebe ke danné se ndu noje. Sei géa, kem̂ si dè ra si’t nè bainléa a teli rai majelé se’n tɔ. 2I taai nyankoto ke wɔi dè nan’t. Titeke bè á a i rai gute-ndu le Krist nga tɔli mbas. 3Ke nè á doo karé ke è doo ke raikarè gir kem̂n’t ede nè: N’ee doo ke n’ase ɓaa, è kuwe sú kum ra’n. 4Maje kade nanan géa ter kule ra’n ke le’n-le’n an. Ke nè á kule ra’n maje kade dè’n in-in’n tchakm ɓaa, maje kade dè’n in tchakm ɔje dè’n è kuwe se kar’n m à kuwe dè kin tchakm le’n kɔje’n le doo ke rang lé. 5Sei geri mbak, nanan géa à unn nyankoto ke wɔi ke ɔje dè’n-dè’n. 6Doo ke ndi ndó Tà ke Maje nga, maje kade ade njèndó’n Tà ke Maje oré se’n nan dè nyan-majege’t le’n gar-gar. 7Adi kum si sú sei dè tà’t nè nga lé: Doo à ule mbe dè Nube’t lé, tede nyan ke doo dubu nga à uje kann’n kuwe. 8Doo ke dubu nyan ke ɔje dè danra ɓaa, è à uje kann nyan ke oje dè danra ke è tuju nga tɔ. Doo ke dubu nyan ke ɔje dè Ndil ɓaa à inge ndikumgajer sár se non. Ndikumgajer sár se non nga, è kann nyan le Ndil. 9Adi kem̂ jéi tête mann dè ra nyan ke maje’t nga lé. Ke nè á j’adi ji jéi sɔl giré lé ɓaa, ndɔn’t j’à j’ujei kann’n ɓai. 10Titeke bè á, loo ke j’ingei kurloo ɓaa, adi jè rai maje se dooge malang. Nè maje kade jè rai maje se ngakon jéige ke undei kem̂ de dè Nube’t j’adi dum dè le dooge ke rang malang. 11An-in! magtub ke man kuwe m’ndang se ji’m guri-guri m’ade sei. 12Dooge ke nange ndigi kundei tɔge dè si’t le kade ujei tà mɔte si. Ei rai titeke bè le taa’n kum Juipge karè nè bainléa à kɔri de kororoi tede tà le Krist ke dé tɔl’n kade kage-ke-dese’t. Kɔr ke d’a d’ɔr de kororoi á è nyan karé ke dé ɓel d’unde’n tɔge dè si’t le kade d’uje’n tà mɔte si. 13Njé kuje tà mɔte dege kuwe géa an-in dè gute-ndu nga sêw-sêw lé. Nè né è bè géa, dé ndige le kade adi d’uje tà mɔte si tede le kunn’n tà ra de’t tede mɔte si ke adi d’uje. 14Man ɓaa, nyan karé bere ke m’unn’n tà ra’m dè de’t nga, è kwei le Krist Kuwe-ɓee le jéi Jésu Krist kade kage-ke-dese’t. M’an nyange le nang nè ke nyange ke tuji tede kwei le Kuwe-ɓee le jéi Jésu-Krist. Man géa dooge ke dè nang nè an-in man ke doo ke wei bè tɔ. 15Kuje tà mɔte éké kuje tà mɔte lé nga, è nyan lé. Nyan ke get-get ɓaa, è le tel k’ee doo ke kige le Nube. 16Dooge ke njiyei se go tà ke m’ndó sei nè nga têr-têr ɓaa, maje kade kem̂lom se kem̂kanm nain se de. Maje kade kem̂lom se kem̂kanm nain se kosdooge le Nube malang. 17Unn gir’n ɗarinè, maje kade doo karé bè ndɔje’m lé ta, tede sire dò le Krist tò ram’t laa. 18Ngakonmge, maje kade kem̂noje le Kuwe-ɓee le jéi Jésu-Krist nain se si karé-karé malang. Maje kade è titeke bè kuwe.

will be added

X\