NJE KE GALATIE 5

1Krist taa jèi ji ɓer’t inye jèi dɔ ɗarinè tede le kade jè ndii dè jéi pal kerɔte. I ndai dè nja si’t njáng m adi dé tel d’ile kule ɓer kɔbe si’t gugu lé ta. 2Ooi maje, man Paul m’ede sei ndàt, ke nè á adi d’uje tà mɔte si ɓaa, sei an-in Krist ke nyan lé. 3M’tel m’ede sei tà nè nga ndàt kuwe ɓai. Doo ke rara ke ade d’uje tà mɔte’n ɓaa, gar-gar à ra nyange ke gute-ndu ɔje nga bere mbak se ndɔ’n-ndɔ’n. 4Ke nè á i sangi le kade tà ɔr dè si’t non Nube’t se go gute-ndu nga ɓaa, sei tin-in se Krist ɓá ta. Taɓai noje ke Nube uwe se si nga utei piring ilei kɔke a tɔ. 5Jèi njétaakem̂-Kristge ɓaa, j’undei kem̂ jéi tchên se go Ndil titeke Nube à ɔr tà dè jéi’t takul kundekem̂. 6Kuje tà mɔte éké kuje tà mɔte lé, è nyan ke liriri tede le doo ke um nan’t bɔk se Jésu-Krist. Nè nyan ke è ngarankum nyan nga, è kundekem̂ ke ra kule dè tár nan’t. 7Kété sei an-in ngɔde maje. Ké nan ɗarinè ɔge sei kile koje dè ngarankum tà’t nga wa? 8Tà ke majelé ke dé mbusu’n sei d’ɔge’n sei kile koje dè ngarankum tà’t nga, in ra Nube’t ke njè ɓar sei nga lé. 9Undei kumkunju dè ra si’t tede pululu è nyan ke ndêin bè, nè ade nduju ke loin bere mbak in ti ngiring-ngiring. 10Kuwe-ɓee ade m’ndà kem̂’m káng dè si’t titeke tàgir le si à tò gai se le’m lé. Nè doo ke njè bungul sei nga, né ee’n doo ke bain-bain géa, Nube à ade kure nyanra’n à ɔde kum’n ɓai. 11Ngakonmge, man m’ile mber kuje tà mɔte lé. Ke nè á m’ile mber kuje tà mɔte ɓaa, ké Juipge à ɔri man kororoi tede ri taɓai wa? Ke nè á m’ile mber kuje tà mɔte ɓaa, kwei le Krist kàde kage-ke-dese’t à tel k’ee jig le tuge nja doo kile’n dann kaiya’t lé ta. 12Dooge ke njé bungul sei titeke bè nga, maje kade d’ade dé tɔr gum de d’oré’n dè kuje tà mɔte de ɓaa, à è soo de’t. 13Ngakonmge, sei nga dé ɓar sei le kade i ndii dè si pal. Nè maje kade edi gos dè ndi dè pal’t nè nga le ra’n nyange le danra karè lé. I rai ɓer le nan tede tár ke sei tári nan nga. 14Ke nè á sei rai titeke bè ɓaa, a i rai gute-ndu nga kade maje ɔr njêt. Tede gute-ndu bere mbak nga d’oré nan’t d’ade è ndukunn ke karé bere d’ede nè: «I a tár doo madi titeke i tár’n rai i kuwe bè tɔ.» 15Ke nè á ndi dè pal le si aw se si sár ade i ton-in nan a, ujei ngire nan se tà nyanm-nyanm a tɔ ɓaa, undei kumkunju dè ra si’t lé ɓaa a i tuji nan. 16Tà ke man m’ede sei á nè: Inyei Ndil-Kem̂nda adi ɔr non si ɓaa, ngur nyange ke majelé le danra à ra sei lé. 17Tede ngur nyange ke majelé le danra ute ngur nyange le Ndil-Kem̂nda mbeng a, ngur nyange le Ndil-Kem̂nda ute ngur nyange ke majelé le danra mbeng a tɔ. Gir’n ke nè á sei asikum rai nyange ke kem̂ si ndige nga se ndɔ’n-ndɔ’n lé. 18Ke nè á Ndil-Kem̂nda ɔr non si ɓaa, sei i ndii gir gute-ndu’t nga lé ta. 19Ngur nyange ke majelé le danra nga tooi nata ndái-ndái. Ei á tooi nè: Tò se nan ke kaiya’t, ra mine, nyanra ke pás-pàs. 20Polé mage, ra nan se kuge, kɔr nan njêt, ra jang se nan, kɔl nan, ra kem̂kein, ra wong, ra nan tà, tà tin nan, kai nan, kɔr kum nan. 21Ra ngur nyan pênn-pênn, ra ɓer le yibe, kunn gon nyankuse se nyange ke nange ke taai nan se de bè. Man m’ede sei ndàt kété titeke ndɔ ke m’ede’n sei nga: Dooge ke inyei ra de nyein dann nyange ke nè nga, loo le de goto kem̂ Konɓee’t le Nube sár se non. 22Kann nyan le Ndil á tò nè: Tár nan, ranel, kem̂lom, kem̂kile, kem̂-maje, kem̂-kunde, 23kaw lom-lom se kunde kumkunju dè ra’t a tɔ. Gute-ndu ute nyange nè nga mbeng lé. 24Dooge ke umi nan’t bɔk se Jésu-Krist nga, uwei danra se ngur nyange le’n ke majelé ɓerii kade kage-ke-dese’t. 25Jè ndi kumgajer takul Ndil-Kem̂nda; bè ɓaa, jè njiyei se goo Ndil-Kem̂nda. 26Ade jè rai ngur riɓar ke raikarè lé a, ade jè tɔsi nan tà lé a, ade jè rai kem̂kein dè nan’t lé a tɔ.

will be added

X\