NJE KE GALATIE 4

1M’tam m’ede nè loo ke ngonn ke njè kɔi nyan-ndube nain ngonn ɓai nga, tò asenan se ɓer bè. Nè né è bè géa, è nga kuwe è kuwe nyange malang. 2Loo ke è nain ngonn ɓai nga, è ndi gir tɔgmong’t le dooge ke njékan dè’n se nyange le’n sár ade ndɔ ke bɔ’n ɔje nga ase’n deĵ ɓita. 3Jèi nga géa, le jéi è titeke bè tɔ. Loo ke ndɔ ke jè nain ngannge ɓai nga, jèi ɓerge le tɔgmong-ge ke dè nang nè. 4Nè loo ke dè kurloo ke Nube ɔje ase deĵ ɓá ɓaa, Nube ule Ngonn’n. Ngonn’n nga dinye á oje’n a, ndi gir gute-ndu’t a tɔ. 5Ngonn le Nube nga ree tede le gang dè dooge ke kété ndii gir gute-ndu’t kade teli ndii dè de pal. E ree le tel jèi ke ngann kem̂ Nube. 6Sei sei ngann kem̂ Nube kerɔte kuwe. Gir’n ke nè á Nube ule’n Ndil Ngonn’n ade ndii’n dè ɓengre jèi’t. Takul Ndil nè nga á jè tami tà se ndu jéi ke bòi j’edi nè: «Abba, Bɔ jé.» 7Titeke bè á ɗarinè i ɓer lé ta. Titeke i ngonn le Nube nga, i i njè kɔi nyan-ndube se go ndukunn le Nube. 8Kété mari ke sei geri Nube lé ɓai nga, sei rai ɓer le mage polége ke d’ase k’ee Nube ke get lé. 9Nè ɗarinè sei geri Nube ɓá tede tár ke è tár sei nga. A ɓaa, ké bain á sei ɔsi wan i teli dè nyan-ndóge ke asi rai se si lé nga taɓai wa? Ké bain á sei ndigi teli rai ɓer le nyan-ndóge nè nga gugu ɓai wa? 10Sei an-in dè ndɔge éké nange, dè kurlooge éké dè ɓalge sêw-sêw a tɔ. 11M’ɓel kem̂’t m’ede nè: Bainléa m’ule ra’m ndibe tede le si se ndáng karè. 12Ngakonmge, m’deje sei le kade i teli i tooi tite’m titeke man géa m’tel m’ee’n tite si sei bè tɔ. Sei rai se’m majelé karé bè lé. 13Kété ke desêin ke ndɔ ke m’aw m’ile mber Tà ke Maje m’ade sei nga, sei geri mbak titeke kem̂ ndɔn’t nè nga, ratur ra danra’m ngain. 14Ratur ke ra’m nga è nyan ke nan sei. Sei an-in man ke nyan ke tò yêr tàkum si’t ade i tibi man yor lé a tɔ. Nè sei uwei man ke ra si’t tite doo ke Nube ule’n bè. Sei uwei man ke ra si’t titeke uwei Jésu-Krist kuwe ke ra si’t bè tɔ. 15Ké ranel le si ke ndɔ ke kété nga è ra wa? Tà ke m’a m’tam nè nga è ngarankum tà m m’lanm lé: Kem̂ ndɔn’t nè nga, ke nè á ndɔ ke asi tɔri njar kum si kadi man ɓaa, ayé tɔri kuwe. 16Ké ngarankum tà ke m’ede sei nga á m’tel m’ee’n njèban le si ta wa? 17Paber ke dooge ke nange paberi sei par-par nga, è se kem̂nda káng lé. Nè ei ndigi le kutei sei mbeng ram’t tede le kade ei tá i paberai de par-par. 18Nyan karé ke maje ɓaa, i paberi nyanra ke maje se ndɔge-ndɔge. I nginei kade m’ee se si ɓita i rai lé. 19Ngannemge, koje ke m’oje sei nga, ndo le si ule’m ndibe asenan se dinye ke à oje ngonn bè. Ndo le si nè nga à ule’m ndibe titeke bè sár kade i teli i taai nan se Krist tcha-tcha. 20Ɗarinè, m’ndinge ra’m le k’ee ra si’t tá bainléa m’a m’tur ndu’m rang ɓai. Ke nè ɓaa, m’ger tà ke get kum tam lé. 21Sei ke i ndigi ndii gir gute-ndu’t nga edi man, ké sei ooi tà ke gute-ndu tam nga lé wa? 22Dé ndang kem̂ magtub gute-ndu’t d’ede nè: Abraham oje ngannge ke dingem joo. Ngonn’n ke karé kon’n è ɓer a, ngonn’n karé ke rang kon’n è dinye ke ndi dè’n pal. 23Nè ngonn’n karé ke kon’n, Agar, è ɓer nga oje’n se go rebe ke dooge oji nan. Ngonn’n karé ke rang ke kon’n, Sara, oje’n nga è se go kunn ke Nube unn’n ndu’n ade Abraham kété. Sertà nè nga ndó jèi nyan karé ke rang ɓai. 24Dinyege ke joo nè nga ei nyan-tɔjege ke ɔje dè mann-ra ke joo ke tò dann Nube se kosdooge le’n. Mann-ra ke karé è gute-ndu ke ndɔ ke Nube ade Moise dè mbal ke ri’n ne Sinai. Kosdooge le Nube ndii gir mann-ra’t nè tite ɓerge bè. Agar kon ngonn ke karé nga tò ɔje dè mann-ra ke dè mbal ke Sinai nga. 25Agar nga è tite mbal ke ri’n nè Sinai ke tò kem̂ ɓeekon ke Arabie. Agar tò ɓila asenan se ɓee-bò ke Jérusalem se Juipge ke ndii gir ɓer’t. 26Nè ɓee-bò ke Jérusalem ke dɔ nga ndi dè’n pal, è è á è kon jéi a tɔ. 27Tede dé ndang kem̂ Magtub ke tò se ninn’n d’ede nè: «I ke i kuju ke oje ngonn lé nga, i ra ranel. Al rai se ndui ke bòi beng i ke ndɔ karé ndo rai lé nga. Ngann le dinye ke dé sure’n d’inye’n nga bulei ngain dumi ngann le dinye ke njè ngaw ke ndi kei ngaw’t.» 28Ngakonmge, sei ngannge le Nube se go kunn-ndu le’n tite Isaac bè. 29Kété ndɔ ke ngonn le Abraham ke dingem ke oje’n titeke d’oje’n ngannge se go danra ɔr kororoi è ke d’oje’n se go kunn-ndu gir Ndil Nube’t. Ɓila géa è titeke bè tɔ. 30Nè né è bè géa, ké tà ri á magtub ke tò se ninn’n tam wa? E tam ede nè: «I rɔ dinye ke è ɓer se ngonn’n ke dingem nè nga kɔke. Tede ngonn le ɓer à inge nyan-ndube se ngonn le dinye ke ndi dè’n pal nga nan’t ndan lé.» 31Titeke bè á ngakonmge, jè jèi ngann le dinye ke è ɓer nga lé, nè jèi ngann le dinye ke ndi dè’n pal.

will be added

X\