NJE KE GALATIE 3

1Hai! sei njé kem̂ tɔ kuju tàge lé ke i ndii kem̂ ɓeekon ke Galatie. Ké nan yêl sei bè wa? Sei nga d’ɔrgir tà le Jésu-Krist ke dé ɓer’n kade kage-ke-dese’t d’ade tò nata ndái-ndái tàkum si’t. 2Tà karé bere ke m’ndige le koo tà si’t á nè: Ké sei ingei Ndil-Kem̂nda nga takul kule rage ke ɔje dè gute-ndu éké takul Tà ke Maje ke ooi á undei kem̂ si dè’t nga wa? 3Ké bain á kem̂ si tɔ kuju tà lé sár bè wa? Kété sei umi kem̂ si dè tɔgmong’t le Ndil-Kem̂nda, nè ɗarinè i ndigi kumi kem̂ si dè tɔgmong’t le danra si sei’t kuwe ta wa? 4Ké nyankɔbege se nyan-majege ke Ndil ade dé ra d’ade an-in kété nga, è se ndáng karè wa? M’gir kade è se ndáng karè lé. 5Nube ade sei Ndil-Kem̂nda, taɓai è ra nyankɔbege dann si’t utu’n go. Ké Nube ra nyankɔbege takul kule rage ke ɔje dè gute-ndu wa? Ḿ-m̀, è ra nyankɔbege dann si’t takul Tà ke Maje ke ooi a, Tà ke Maje ke undei kem̂ si dè’t nga a tɔ. 6Abraham géa, ndɔ ke le’n è titeke bè tɔ. E unde kem̂’n dè Nube’t a, Nube an’n ke doo ke tà ɔr dènn’t a tɔ. 7Ooi tà nè maje i geri: Njétaakem̂-Kristge à ei ngann le Abraham ke gete. 8Magtub ke tò se ninn’n ɔje loo’n kété ede nè: Nube ayé kɔr tà dè dooge ke ei Juipge lé takul kundekem̂ le de. Magtub ke tò se ninn’n nga ede Abraham Tà ke Maje nè nga kété ede nè: «Dooge malang ke ei Juipge lé nga, Nube à tɔr ndu’n dè de’t takuli i.» 9Abraham um kem̂’n dè’t. Gir’n ke nè á Nube tɔr ndu’n dènn’t. Dooge malang ke undei kem̂ de dè Tà ke Maje’t nè nga ingei ndutɔr titeke Abraham inge’n ndutɔr bè tɔ. 10Njé ra nyange ke gute-ndu ɔje malang nga, ndu-mann uwe de tede dé ndang kem̂ Magtub’t d’ede nè: «Nanan ke ra nyange ke magtub gute-ndu ɔje nga ade ɔr njêt se ndɔge malang lé ɓaa, ndu-mann uwe dè’n ɓá ta.» 11Doo karé géa tà ɔr dènn’t non Nube’t takul gute-ndu nga lé. E nyan ke tò nata ndái-ndái tede doo ke tà ɔr dènn’t à ndi kumgajer takul kundekem̂ dè Nube’t. 12Nè gute-ndu è nyan ke tò gai se kundekem̂ dè Nube’t. Nyange ke gute-ndu ɔje nga, doo ke ra tɔl mbas se ndɔge malang ɓaa à ndi kumgajer. 13Krist uge dè jé ɔr jè ji ndu-mann’t le gute-ndu. E tel ra’n ke doo ke ndu-mann uwe dè’n bè tede tà le jéi. Titeke ke bè á dé ndang’n kem̂ Magtub ke tò se ninn’n d’ede nè: «Nanan ke dé ɓer’n kàde kage’t ɓaa, ndu-mann uwe dè’n ɓá ta.» 14Krist ra titeke bè le kade dooge ke ei Juipge lé ingei ndutɔr ke ndɔ ke Nube unn’n ndu’n ade Abraham. Ndutɔr nè nga dooge ke ei Juipge lé ingei takul Jésu-Krist. Ndil-Kem̂nda ke ndɔ ke unn ndu’n le kade jéi nga, j’ingei takul kundekem̂. 15Ngakonmge, m’a m’unn nyan karé ke dooge rai a, ke an-in se ndɔ si-ndɔ si a tɔ, le kede’n sei tà nè: Loo ke doo karé ndang magtub ade tò njai unn’n ndu’n ɓaa, doo karé ke rang asekum kute magtub nè nga mbeng éké kile tà ke rang dè ège ke doo nè ndang kem̂ magtub’t nè nga lé. 16Ndɔ ke Nube unn ndu’n ade Abraham se ngonnkà’n. Nube tam ede nè: «Ngannkàige» lé, nè «ngonnkài». E ule ji’n dè ngonnkà’n ke karé bere luk-luk ke è Krist. Ke nè á Nube tam ede nè ngannkàige ɓaa, tà nè ɔje dè dooge bule. 17An-in! tà ke m’ndige tam á tò nè: Ndɔ ke Nube unn ndu’n njang ade Abraham. Ndukunn le Nube nga tò njáng sár ɓal aru sɔ se kɔr-mute ɓita magtub gute-ndu tee ɓai. Gute-ndu asekum tuju ndukunn ke Nube unn ade Abraham kété nga ndan lé. 18Ke nè á Nube tɔr ndu’n dè doo’t takul gute-ndu ɓaa, ndukunn le Nube nga è nyan ke raikarè. Nè Nube tɔr ndu’n dè Abraham’t takul ndu’n ke è unn ade’n kété mari nga. 19A ɓaa, ké kule le gute-ndu nga è ri wa? Gute-ndu nga ree oré dè ndukunn le tɔje dooge nyanra de ke uwe made nan se le Nube lé. Gute-ndu nga tò sár ade ngonnkà Abraham ke Nube unn ndu’n ɔje’n dè’n nga ree’n. Gute-ndu nga è dooge ke danrán á ndɔ ke undei ɓita umi ji njè ndà dann de’t se dooge ɓai. 20Loo ke doo è se kar’n luk-luk ɓaa à aw ndoo njè nda dann de’t lé, tede Nube è se kar’n bere luk-luk. 21Ké gute-ndu ute ndukunnge le Nube nga mbeng wa? Ḿ-m̀, è bè lé. Ke nè á gute-ndu ke d’ade kété nga asekum kade doo ndikumgajer ɓaa, né tà à ɔr dè doo’t takul gute-ndu nga kuwe. 22Nè Magtub ke tò se ninn’n tam ndàt ede nè: Dooge malang ndii gir tɔgmong’t le kaiya. Nyan ke Nube unn’n ndu’n le kade dooge nga, njétaakem̂-Kristge ingei takul kundekem̂ le de. 23Kété ɓita kade Krist ke j’undei kem̂ jéi dènn’t ree ɓai nga, gute-ndu uwe jè dangai utu tà jé kei sár ade Krist ke j’undei kem̂ jéi dènn’t ree’n. 24Gute-ndu nga tò asenan se ɓer ke njèkan dè jé a, njèkɔr non jé kaw se jé ra Krist’t ade Nube ɔr’n tà’n dè jé’t takul kundekem̂. 25Nè ɗarinè, loo ke Krist ke j’undei kem̂ jé dènn’t ree ɓá ɓaa, jè ndii gir tɔgmong’t le ɓer ke njèkan dè jé se njèkɔr non jé kété nga lé ta. 26Ɗarinè sei Juipge se njé ke ei Juipge lé ke undei kem̂ si dè Jésu-Krist’t nga, sei malang sei ngann le Nube. 27Sei malang d’ulei sei manné njonm se ri Krist nga, sei teli taai nan se Krist. 28Doo ke è Juip éké è Juip lé goto ɗarinè ta. Ɓer éké doo ke ndi dè’n pal goto ta, dingem éké dinye goto ta; tede sei malang sei dooge ke karé takul kum ke umi nan’t bɔk se Jésu-Krist. 29Ke nè á sei le Krist ɓaa, sei girkà le Abraham, sei njé kinge nyan-ndubege titeke ndɔ ke Nube unn’n ndu’n ade’n.


Copyright
Learn More

will be added

X\