NJE KE GALATIE 2

1Ɓal dɔg-gidé-sɔ go’t gugu ɓaa, m’ɔr Barnabas se Tite m’um de goom’t m’tel m’aw’n kem̂ ɓee-bò ke Jérusalem kuwe ɓai. 2M’tel m’aw Jérusalem se go nyan ke Nube tɔje’m. Loo ke m’tee nú ɓaa, m’kebe njétaakem̂-Kristge m’ɔr gir Tà ke Maje ke m’ile m’ber’n m’ade dooge ke ei Juipge lé nga se ngang’n-ngang’n m’ade ooi. Dooge ke ei njékɔr non dege géa m’kebe de gai m’ɔr gir Tà ke Maje ke m’ile mber’n nè nga m’ade de. M’ra titeke bè tede kade Tà ke Maje ke kété éké ke ɗarinè ke m’ndi m’an-in ngɔde’n nga, tel è nyan ke raikarè lé. 3Tite è se’m. E nga è Juip lé nè doo unde tɔge dènn’t ade uje tà mɔte’n lé. 4Ke nè á ndɔ ke Tite ade d’uje tà mɔte’n ɓaa, è tede tà le dooge ke nange ke rai ra de ke njétaakem̂-Kristge ke turi dann jéi’t se go ngein. Ei turi dann jéi’t se go ngein le teri ké ndi dè pal le jéi ke j’ingei ra Jésu-Krist’t tò titeke bain wa? Ei rai bè le teli jèi ke ɓerge gugu taɓai. Nè j’ule dè jé j’ade dooge nè nga lé a, 5j’inye kurloo ke ndêin bè géa j’ade de lé a tɔ. Jè ra titeke bè le kade ngarankum tà le Tà ke Maje nga too’n njáng dann si’t. 6Njé ke d’an de ke dooge ke bòi nonm’t kété nga usu’m nyan karé dè de’t lé. Nube nga è njè ndête kum doo karé bè lé. Njé ke d’an de ke dooge ke bòi nga, dé ndoo’m nyan ke kige karé bè lé. 7Nè dé nè nga d’an titeke Nube um kule kile mber Tà ke Maje le dooge ke ei Juipge lé nga jim’t titeke um’n le Juipge ji Pierre’t bè tɔ. 8Nube ke njè tel Pierre ke njèkawkule le Juipge nga kuwe á tel’m ke njèkawkule le dooge ke ei Juipge lé tɔ. 9Jacques se Céphas se Jean ke ndɔ ke d’an de ke kage ngadann kei nga, loo ke an-in noje ke Nube uwe se’m ɓaa, ulei jikon de adi jè se Barnabas umi se jé nan’t bɔk. Gir’n ke nè á man se Barnabas jee’n njékaw kile mber Tà ke Maje kade njé ke ei Juipge lé, nè ei ɓaa ei njékaw kile mber Tà ke Maje kade Juipge tɔ. 10Nyan karé ke ei ndigi le kade jè ra ɓaa, è le kade j’ade kem̂ jé olé dè njéndooge’t. E ke nè nga è nyan ke m’tɔse kum’m dè’t m’ra se ngarankem̂’m kuwe tɔ. 11Nè loo ke Pierre ree kem̂ ɓee-bò ke Antioche ɓeekon ke Syrie ɓaa, m’in se’n dè nyanra’n ke se go rebe’n lé tàkum dooge’t. 12Kété ɓita kade Jacques ule Juipge ke nange ade reei Antioche ɓai nga, Pierre use nyan nan’t se dooge ke ei Juipge lé kem̂’n karé a tɔ. Nè loo ke dooge nè nga reei teei pan ɓaa, è ebe ra’n kuse nyan se njé ke ei Juipge lé ɔr ra’n ndi mbeng tede ɓel kum Juipge. 13Njétaakem̂-Kristge ke nange ke ei Juipge nga ndonmi nan go kede gos’t le Pierre ade Barnabas kuwe géa tel ee’n njèkede gos se de nan’t mbak. 14Nè loo ke m’an pa njiye de uwe made nan se ngarankum tà le Tà ke Maje ke nga lé ɓaa, m’in se Pierre tàkum dooge’t malang m’ede nè: «I i Juip nè i ra nyanra Juipge lé. I ra nyan asenan se dooge ke ei Juipge lé. A ɓaa, ké bain á i unde tɔge dè njé ke ei Juipge lé le kade teli rai nyanra Juipge nga taɓai wa?» 15Jè nga, jè Juipge m jè jè njé ra majelége tite dooge ke ei Juipge lé nga bè lé. 16Nè né è bè géa, jè ger maje titeke Nube ɔr tà dè doo’t se go kule rannge ke ɔje dè gute-ndu nga lé. Nè è ɔr tà dè doo’t se go kundekem̂ dè Jésu-Krist’t. Gir’n ke nè á jè Juipge géa, j’unde’n kem̂ jé dè Jésu-Krist’t le kade Nube ɔr’n tà dè jé’t takul kem̂ jé ke j’unde dè Jésu-Krist’t nga. Nube ɔr tà dè jé’t se go kule ra jége ke ɔje dè gute-ndu nga lé. Ḿ-m̀, Nube à ɔr tà dè doo karé’t se go kule rage ke ɔje dè gute-ndu nga lé. 17Jè Juipge ke j’um nan’t bɔk se Krist nga, tà ɔr dè jé’t ɓá. Ke nè á d’an jè jè kuwe ke njé ra majelége tɔ ɓaa, ké Krist è ngonn njèkule le nyanra ke majelé taɓai wa? Ḿ-m̀, è bè lé. 18Ke nè á m’unn gir le ra nyange ke kété m’inye go de nga ɓai ɓaa, man kuwe m’tel m’ee njè ra majelé. 19Gute-ndu ile’m tà yo’t ade ɗarinè m’ee yo-doo gir gute-ndu’t tede le tel ndi kumgajer tede le Nube ta. Man nga dé tɔl’m kade kage-ke-dese’t se Krist nan’t se non’m. 20Man nga, dé tɔl’m kade kage-ke-dese’t se Krist’t nan’t. Ke nè á m’ndi kumgajer ɓai ɓaa, è man lé ta, nè è Krist á ndi kumgajer kem̂’t. Ke nè á danra’m ndi kumgajer ɗarinè ɓaa, è tede kem̂’m ke m’unde dè Ngonn le Nube ke tár’m. Ngonn le Nube inye ra’n ade yo tede’m. 21Noje le Nube nga, man m’ute mbeng lé. Ke nè á tà ɔr dè doo’t takul gute-ndu ɓaa, Krist wei se ndáng karè.

will be added

X\