NJE KE GALATIE 1

1Kule ke man Paul m’ndi m’ra nga, gir’n in ra dooge’t éké doo karé á ade’m lé. Nè man m’ee njèkawkule se go kem̂ndige le Jésu-Krist se Bɔ’n Nube ke njè kade unde loo tee dann njé ke koo’t nga. 2Man se ngakonmge malang, jè ndang magtub nè j’ule’n j’ade sei njékebe nange le Nube ke i ndii kem̂ ɓeekon ke Galatie. 3Maje kade kem̂noje se kem̂lom ke in ra Bɔ jéi Nube’t se ra Kuwe-ɓee’t le jéi Jésu-Krist nain se si. 4Jésu Krist inye ra’n è kuwe ade yo tede kaiyage le jéi. E inye ra’n ade yo tede le kɔr’n jéi wont ji tɔgmong ke majelé le dè nang nè nga se go kem̂ndige le Bɔ jéi Nube. 5Bɔ jéi Nube nga, maje kade ndubra è le’n sár se non. Maje kade è titeke bè kuwe. 6Tà ige’m sêl tede kin ke sei in-in kalang i turi gide si adi è ke njè ɓar sei se go kem̂noje le Krist. Sei nga in-in kalang i turi gide si ade è ke njè ɓar sei tede le tur ra si go nyan ke rang’t m go Tà ke Maje’t nga lé ta. 7Ḿ-m̀, Tà ke Maje ke rang karé bè goto. Nè dooge ke nange dé bungul sei karè a, dé ndige tur Tà ke Maje le Krist nga kile gel a tɔ. 8Sei i taai Tà ke Maje ke ndɔ ke j’ile mber’n j’ade sei nga ɓá. Ke nè á jè éké doo ke danrán karé ree ede sei tà ke rang karé ke tò gai se Tà ke Maje ke ndɔ ke j’ile mber’n j’ade sei nga ɓaa, maje kade Nube ɔr’n kɔke dann kosdooge’t le’n! 9Titeke ndɔ ke j’ede’n sei kété ɓá nga, ɗarinè m’tel m’ede sei nja karé ɓai: Ke nè á doo ede sei tà ke rang karé ke tò gai se Tà ke Maje ke sei taai kété baa, maje kade Nube ɔr’n kɔke dann kosdooge’t le’n. 10Ɗarinè, ké m’aw ndoo taa kum dooge éké m’aw ndoo taa kum Nube wa? Ke nè á m’sang le taa kum dooge karè ɓaa, bainléa ɓila man m’ee le Krist lé ta. 11Ngakonmge, man m’ndige le kade i geri titeke Tà ke Maje ke m’ile mber’n nga in ra doo’t lé. 12Tà ke Maje nè nga, m’inge ra doo karé’t lé a, doo karé á ndó’m lé a tɔ. Nè Jésu-Krist á ribe dè ade’m. 13Sei ooi ser nyanra’m se pa njiye’m kété ke m’nain’n dann girkàge’t le Juipge ɓai nga mbak. Njékebe nange le Nube nga ndɔ ke m’ɔr de kororoi m’ade al dè loo’n a, m’sanrin de sakte-sakte a tɔ. 14M’aw kum’m ke kété-kété dè nyangirkàge’t le Juipge m’dum njé dèkasenange le’m bule ke girkoje’t. Ra’m ɔlé pêl-pêl dè nyangirkàge’t le kàmge dum njé dèkasenange le’m malang. 15Nè né è bè géa, Nube ɓar’m unde’m se ninn’n se go kem̂noje le’n loo ke ndɔ ke m’nain’n kem̂ konm’t ɓai. 16Nube ade kum’m gang dè Ngonnenn’t tede kade m’ile mber tà le’n made dooge ke ei Juipge lé. Ke loon’t nè kuwe m’aw ra doo karé’t bè m’deje’n tà lé. 17M’in ke loon’t nè m’aw ra njé ke ei njékawkulege nonm’t kété nga lé, nè m’in m’aw kem̂ ɓeekon ke Arabie ɓita m’tel m’ree kem̂ ɓee-bò ke Damas gugu ɓai. 18M’ra ɓal mute ɓita m’tel m’aw kem̂ ɓee-bò ke Jérusalem le sang ger gel Céphas. M’ra ndɔ dɔg-gidé-mi rann’t. 19M’an doo ke rang dann njékawkulege’t lé, nè Jacques ngokon Kuwe-ɓee kuwe se kar’n á m’an’n. 20An-in! nyange ke m’ndang tà’n m’ade sei nè nga, m’ede sei se ri Nube m è tà lanm lé. 21Go’t gugu, m’in m’aw kem̂ ɓeege’t le ɓeekon ke Syrie se ɓeekon ke Cilicie. 22Njékebe nange le Krist ke ndii kem̂ konɓee ke Judée nga, geri kum’m lé ɓai. 23Nè ei ooi tà le’m ke dooge tami edi nè: «Njè kɔr jèi kororoi kété nga, ɗarinè ndi ile mber Tà ke Maje le kundekem̂ dè Nube’t ke ndɔ ke ndige tuju’n nga.» 24Njétaakem̂-Kritsge ke Judée ɗɔyi Nube tede tà le’m man.

will be added

X\