NJE KE EPHESE 5

1Sei sei ngannge le Nube. Nube tár sei ngain. Bè ɓaa, i ndaji nyanra’n. 2I njiyei se tár nan titeke Krist tár’n jèi á inye’n ra’n ade Nube tede le jéi è kuwe ke nyan kade noje se nyankuje-mese ke taa kum Nube. 3Maje kade ri tò se nan ke kaiya’t se ra mine se nede nyan ke rara géa ɓar dann si’t lé. Nyange nè nga tuwe sei njétaakem̂-Kristge ɗêw lé karè. 4Maje kade adi tà rasɔl se tà mbe a, se tà kule mbe dè nan’t a tɔ, teei tà si’t lé. Nyange nè nga tuwe sei ɗêw lé. Nè è soo’t kade tà ra Nube oiyo tá tee tà si’t. 5Ooi maje: doo karé bè dann njé tò se nan ke kaiya’t éké doo ke ra’n mine éké njè nede nyan a ingei nyan-ndube kem̂ Konɓee’t le Krist lé a, kem̂ Konɓee’t le Nube ndan lé a tɔ. Nede nyan nga è mage polé. 6Adi doo karé géa sú sei se tàge ke raikarè lé. Wong le Nube oso dè dooge ke mbati kilei koje dènn’t. 7Umi nan’t se dooge dè nyange ke titeke bè nga lé. 8Tede kété sei ngannge le loondul, nè ɗarinè ɓaa sei ngannge le lookar takul kum ke umi nan’t bɔk se Kuwe-ɓee nga. Bè ɓaa, i njiyei tite ngannge le lookar bè. 9Nyanrage le lookar nga á tooi nè: kem̂-maje ke se ri’n ri’n a, nyanra ke se dè naje’n a, se ngarankum tà a tɔ. 10I teri nyan ke à taa kum Kuwe-ɓee nga maje an-in. 11Umi nan’t bɔk se ngannge le loondul dè nyanra de’t lé. Nè è soo’t kade in-in se de dè’t tede kule ra de nga è kule ke maje’n goto. 12Nyange ke dooge rai se go ngein nga tò rasɔl m maje kum tam tà’n lé. 13Nè loo ke d’ɔrgir nyange ke rai nga ɓaa, tooi nata ndái-ndái dann lookar’t. 14Nyan malang ke loo unju dè’t nga tel è lookar tɔ. Gir’n ke nè á dé tam’n d’ede nè: «I ke i tò ɓi nga, i teen kumi, unde loo i tee dann njé ke koo’t ɓaa, Krist à ndoin non-in’t.» 15An-in! go pa njiye si sêw-sêw. I njiyei tite njékumkunjuge m i njiyei asenan se njé kem̂ tɔ kuje tà lége bè lé. 16I pabrai loo ke Nube inye ade sei nga par-par tede ndɔge ke jè ndii tutu ɗarinè nga, ei ndɔge ke majelé. 17I ndii sann karè lé, nè i sangi rebe le ger nyan ke Kuwe-ɓee ndige le kade i rai nga tá. 18Adi yibe ule mbe dè si’t lé. Tede yibe aw se doo ke loo nyanra ke pás-pàs’t kade tuju. Nè adi Ndil tá taa kem̂ si pel-pel. 19Ɔsi page ilei riɓar dè Kuwe-ɓee’t se ngarankem̂ si bere mbak. Ɔsi page ke Ndil á ule tà si’t nga i piti Kuwe-ɓee tede kem̂-maje le’n. 20Nube Bɔ jéi nga, i rai nin oiyo se ndɔge malang tede nyange malang se ri Kuwe-ɓee le jéi Jésu-Krist. 21Ulei dè si adi nan tede ɓel ke i ɓeli Ndil Krist nga. 22Dinyege, ulei dè si adi ngaw sige titeke ulei dè si adi Krist nga bè tɔ, 23tede ngaw dinye è doo dè neen’n titeke Krist ee’n doo dè njékebe nange le Nube. E Krist nga, è njèkaje njékebenange le Nube ke ei danra’n è kuwe. 24Nè titeke njékebe nange le Nube ulei dè de adi Krist nga, maje kade sei dinyege géa ulei dè si adi ngaw sige gar-gar titeke bè tɔ ɔje dè nyange malang. 25Ngaw dinyege, i tári neen sige titeke Krist tár’n njékebe nange le Nube á inye ra’n è kuwe ade tede le de nga. 26Krist ndogo mann njékebe nange le Nube tchák-tchák. E ɔr se-kaiyage le de se go ngarankum tà le’n, unde de se ninn’n ade ei le Nube kuwe ɗarinè. 27E ra titeke bè le kade njékebe nange le Nube ndai tàkumn’t dann ndubra’t se ra’n ke ndolé kein-kein anje kɔr-ɓal éké anje kum kule a tɔ. Krist ndige le kade njékebe nange le Nube tooi se ninn de gai, le kade tà karé uwe dè de lé a tɔ. 28Sei ngaw dinyege i tári neen sige titeke i tári danra si sei kuwe bè tɔ. Doo ke tár neen’n ɓaa, tár danra’n è kuwe. 29Ḿ-m̀, doo karé bè ɔr ra’n è kuwe njêt ndan lé. Nè nanan géa ul ra’n maje a, tɔse kum’n dè rann’t maje titeke Krist ra’n se njékebe nange le’n bè. 30Jèi jèi balkum ra Kristge. 31Titeke dé ndang’n kem̂ Magtub’t d’ede nè: «Gir’n ke nè á dingem à inye bɔ’n se kon’n le kum nan’t bɔk se neen’n, ei joo mbak à teli k’ei danra ke karé bere luk-luk.» 32Nyan ke tò loo ɓɔyɔn’t nga, è nyan ke bò. Nè man m’tam tà nè nga m’ɔje’n dè Krist se njékebe nange le Nube. 33Gar-gar nanan géa dann si’t à tár neen’n titeke tár’n ra’n bè. Gar-gar, maje kade dinye ɓel ndil ngaw’n.

will be added

X\