NJE KE EPHESE 4

1Man ke m’tò dangai’t tede tà le Kuwe-ɓee nga, m’ndeje sei kade adi pa njiye si uwe made nan se ɓar ke Nube ɓar sei nga. 2Ulei dè si adi nan a, awi lom-lom dann nan’t a, ilei kem̂ si pon dè nan’t a, oréi tà si njak dè nan’t se go tár ke Krist tár jèi. 3I risi ra si nang se ndɔge malang le ngonm kule noje ke Ndil-Kem̂nda tɔ’n sei nan’t nga. Kem̂lom á è kule noje ke Ndil-Kem̂nda tɔ’n sei nan’t neĵ-neĵ. 4Sei sei balkum danra ke karé bere luk-luk, Ndil-Kem̂nda è karé bere luk-luk a tɔ. Titeke bè á sei géa Nube ɓar sei le kade ingei nyan kundekem̂ tchên dè’t ke karé bere luk-luk nga. 5Kuwe-ɓee è karé bere luk-luk a, kundekem̂ è karé bere luk-luk a, kule doo manné njonm è karé luk-luk a tɔ. 6Nube karé bere luk-luk á è Bɔ njétaakem̂-Kristge malang, è on ɓee dè dooge se dè nyange malang se loo malang a, è ndi kem̂ jéi’t malang a tɔ. 7Nè né è bè géa, jèi karé-karé malang j’ingei nyan-noje karé ke ɔje dè jéi, dè jéi. Krist á è njè kɔje nyan-noje nè nga se go kem̂-maje le’n. 8Gir’n ke nè á Nube tam’n kem̂ Magtub’t le’n ede nè: «Loo ke è in aw dɔ ɓaa, è uwe njé tuwe made dege ɓer aw se de. E uwe noje se dooge a tɔ.» 9«E in aw dɔ» nga, ké gir’n è ri wa? Tà nè nga tò ɔje dè kin ke Krist in danrán ree dè nang nè. 10Jésu-Krist nga, kété in danrán á ree nang nè. E è nga kuwe á tel aw sem̂ danran’t dɔ. Jésu an loo malang dè nang nè ɔr njêt m nyan karé ɓɔyɔ ra’n tàkumn’t lé. 11E è kuwe á uwe noje se dooge ade njé ke nange ei njékawkulege a, ade njé ke karége ei njéribe-dè-tàge ke tà Nube’t a, ade njé ke nange ei njékile mber Tà ke Majege a, ade njé ke karége ke rang ei njékul dooge a, è ade njé ke nange ei njéndó dooge nyan a tɔ. 12Jésu-Krist ra titeke bè le kade njétaakem̂-Kristge asikum rai kule le de ke ɔje dè de, dè de. Titeke bè á danra Krist à ra’n tɔge ke kété-kété dè kundekem̂’t. 13Njétaakem̂-Kristge nè nga à rai kule le de ke ɔje dè de, dè de kum de ke kété-kété. E á jèi malang j’à teli k’eei danra ke karé bere luk-luk dè kundekem̂’t a, se dè ger gel Ngonn le Nube’t a tɔ. Jèi malang j’à teli k’eei dooge ke tɔge káng-káng, le maji kɔri njêt tite Krist bè tɔ. 14Titeke bè á j’à teli tooi kasi nan se ngannge lé. Tede ngannge nga njé tà ke raikarège se njé libe kum dooge in-in ndói de nyange ke pás-pàs ade ndemi. Ngannge nga tooi asinan se bato ke nel ɔse’n aw se’n yo-yo, nè-nè bè. 15Ké nè á jè tami ngarankum tà a, jè tári nan se kem̂nda káng a tɔ ɓaa, j’à rai tɔge ke kété-kété dè kum nan’t bɔk se Krist a, dè nyange malang a tɔ. Krist nga è doo dè njékebe nange le Nube. 16E takul’n è á ngire-rage ke gai-gai ndii tà nan’t ndeĵ-ndeĵ a, umi nan’t bɔk adi danra bere mbak uwe’n nan maje sem̂-sem̂ takul dè kur-rage. Ke nè á balkum ra karé-karé malang ra kule ke ɔje dè’n-dè’n ɓaa, danra bere mbak à ra tɔge ke kété-kété a, à ɓisir takul tár nan. 17Man m’ede sei ndàt se ri Kuwe-ɓee: Maje kade i teli i njiyei tite dooge ke geri Nube lé nga lé ta, tede ei nga njiyei se go tàgir le de ke raikarè. 18Tà gir le de tel tuge ndul bigm; dé mbate kum se Nube bɔk ɔje dè ndikumgajer le’n ke è ade dooge. Dé ger nyan lé tede kem̂nder urkei dè ɓengre de’t. 19Dé ger loo kɔr kum nyan ke maje se nyan ke majelé lé. D’ule ra de mbiriri dann nyanra ke yêr’t le ra kum de ke kété-kété se ndɔge malang. 20Nè sei ke i geri gel Krist ɓá nga, dé ndó sei kade i rai titeke bè lé. 21Ké nè á ndɔ ke ooi tà le’n kerɔte a, ndɔ ke dé ndó sei nyan se go ngarankumtà ke in ra Jésu’t a tɔ ɓaa, 22inyei go nyanra sige ke mari nga kɔke ta. Nyanra sige ke mari nga uwei ɔri de ra si’t tite kubu ra ndis bè. Sei nga kété ngur libe kum dooge ke rusu kem̂ si njin-njin tuju sei. 23Nè adi tàgir le si tel ra’n kige se go Ndil Nube. 24Doo ke kige ke è kum gute tà Nube nga, ulei ra si’t. Doo nè nga ngarankum tà tel’n ke njè ra nyan dè dè naje’n a, ke doo ke tò se ninn’n a tɔ. 25Gir’n ke nè á inyei go tà lanm, edi nan ngarankumtà tede jèi balkum danra ke karé bere luk-luk. 26Ke nè á wong ra sei ɓaa, an-in tá nè a kin-in rai majelé. Maje kade ebi’t ra wong pa ɓita adi kàde ur ɓai. 27Inyei loo adi sú al ndi dè si’t lé. 28Doo ke ndɔ ke è njèɓog nga, maje kade ebe ra’n ɓoge. Nè è soo’t kade ule ra’n ndibe ra kule ke maje se ji’n è kuwe. Titeke bè á à inge’n nyan le kai kade doo karé ke nyan nal’n tɔ. 29Adi tà ke ete-se karé bè tee tà si’t lé. Maje kade adi tà ke maje ke à ade kundekem̂ le njé ke rang à ra tɔge ke kété-kété á adi tee tà si’t tede kade njé ke ooi ubei maje’n. 30I rai kum Ndil-Kem̂nda ndoo lé. Nube ɔr sei unde sei se ninn’n ke kosdooge le’n takul Ndil-Kem̂nda. E nyankorji ke Nube uje ra si’t le tɔje’n sei titeke à ɔr sei dann kaiyage’t le si njing se non ndɔ ke rang. 31Maje kade kumkil kororo se ndáng ra se wong se kɔl nan beng-beng se taje ndu se kem̂yêr ke rara bere mbak nga, i sanrin de dann si’t kɔke. 32I rai kem̂-maje se nan a, i rai kem̂kanm se nan a, adi kem̂ si tin mbit dè nan’t titeke Nube ade kem̂’n tin’n mbit dè si’t takul Krist.

will be added

X\