NJE KE EPHESE 1

1Man Paul, njèkawkule le Jésu-Krist se go kem̂ndige le Nube. M’ndang magtub nè m’ade njé ke tooi se ninn de se njé ke awi kum de ke kété-kété de kundekem̂ dè Jésu-Krist’t [ke ndii kem̂ ɓee-bò ke Ephèse]. 2Maje kade kem̂-maje se kem̂lom ke in ra Bɔ jéi Nube’t a, ke in ra Kuwe-ɓee Jésu-Krist a tɔ, nain se si. 3Nube Bɔ Kuwe-ɓee le jéi Jésu-Krist nga, maje kade dè’n mong káng-káng. E tɔr ndu’n dè jéi’t takul kum nan’t bɔk le jéi se Jésu-Krist a, è ade jéi nyan-majege gai-gai malang ke ɔje dè Ndil kem̂ danran’t. 4Nube tɔr jéi takul Jésu-Krist kété mari ɓita è unde nang nè ɓai. E tɔr jéi le kade jèi dooge le’n ke jè tooi se ninn jéi gai tàkumn’t a, le kade tà karé bè uwe dè jéi nonn’t dè tár ke è tár jèi’t nga lé a tɔ. 5Nube ɔje kem̂n’t kété mari le tel jéi ke ngann kem̂nge se go tár ke è tár jéi takul Jésu-Krist. E ke nè á è nyan-maje ke è ɔje kem̂n’t njáng se go kem̂ndige le’n. 6Ade jè ɗɔyi Nube tede noje le’n ke maje dum ke è uwe se jéi. Nube uwe se jéi noje nè nga takul kotár le’n Krist kuwe karé luk-luk. 7Takul Krist ke wei ade mese’n an-in nang á j’ingei nyankuge dè jéi ɓee ɓer’t a, Nube ade kem̂’n tin’n mbit dè kaiyage’t le jéi a tɔ. E kem̂noje ke bò ke gar’n goto á Nube uwe se jéi! 8Kem̂noje nè nga Nube ade taa ra jéi pel-pel. Takul kem̂noje nè nga á j’ingei kumkunju se gos nyanger ke deri. 9Nube ade jè geri nyan-maje ke tò loo ɓɔyɔn’t káráng. E uwe dè nja nyan ke tò loo ɓɔyɔn’t nga kété mari se go kem̂ndige le’n è kuwe. 10Loo ke ndɔ’n à ase deĵ ɓaa, nyan ke Nube ɔje le ra á tò nè: A ɔse nja nyange ke danrán se nyange ke dè nang nè malang nan’t le kade Krist è doo dè de. 11Takul’n è á j’inge’n gaje nyan-ndube ke ɔje dè jé tede Nube tɔr jè kété mari se go nyan ke è ɔje. Nube ra nyan malang ade aw loon’t deĵ se go nyan ke è ɔje se go kem̂ndige le’n. 12Jèi dooge ke desêin ke j’undei kem̂ jéi dè Kris’t tchên nga, dé tɔr jèi le kade j’ulei ndubra dè Nube’t. 13Takul Krist á sei géa ooi ngarankum tà, ke è Tà ke Maje ke aje sei. Takul kundekem̂ ke sei undei kem̂ si dè Krist’t á Nube unde’n nyankorji le’n ke è Ndil-Kem̂nda ra si’t, titeke ndɔ ke è unn’n ndu’n kété mari ade sei nga. 14Ndil-Kem̂nda ke Nube ade jèi nga, è tàpitem nyan-ndube ke è unde konn tede le kosdooge le’n. J’a j’ingei nyange ke Nube unde konn nè nga bere mbak ndɔ ke j’à j’ɔri dè jéi gir tɔgmong’t le ɓer. Adi j’ɔsi pa j’ulei ndubra dè Nube’t a tɔ. 15Gir’n ke nè á, loo ke m’oo kɔbe kem̂ si ke kundei dè Kuwe-ɓee Jésu’t a, m’oo ser tár ke sei tári njé ke tooi se ninn de malang a tɔ ɓaa, 16m’ra Nube oiyo m’ebenn’t lé tede le si. Kem̂’m olé dè si’t dɔ-dɔ loo ke m’a m’ɔje’n se’n tà. 17Man m’ra titeke bè le kade Nube le Kuwe-ɓee le jéi Jésu-Krist, è Bɔ jéi ke ndubra è le’n ade sei kumkunju le Ndil. Titeke bè á kum si à gang’n dè Nube’t le kade i geri nin njai-njai. 18M’deje Nube le kade ade kum ɓengre si gang tchat. Titeke bè á a i geri nyan kundekem̂ tchên dè’t ke è ɓar sei tede nga. Taɓai sei a geri bò ndubra le’n se bò nyan-ndube ke uwe dè nja unde konn tede le njé ke tooi se ninn de. 19M’deje Nube ɓai le kade ade kum si gang dè tɔgmong le’n ke kile ke nata tede jéi jèi njétaakem̂-Kristge. Tɔgmong ke bò nè nga, è è ke ndɔ 20ke Nube ade Krist ade unde’n loo tee’n dann njé ke koo’t. Nube ade Krist tɔgmong ke bò nè ade aw ndii’n dè jikonn’t dɔ danrán. 21Titeke bè Nube unn Krist mbeng unde’n dè njé kunde gir gute-nduge se njétɔgmong-ge se njé kàde bòge se kuwe-ɓeege ke danrán éké ke dè nang nè malang, éké ri ke rara malang ke d’a ɓar dann dooge ɗarinè éké ke ndɔ ke rang nga, Krist dum dè de malang. 22Nube ɔr Krist unde’n dè nyange’t malang a, ade’n è doo dè njékebe nange le’n è Nube a tɔ. 23Njékebe nange le Nube nga, è danra Krist. Njékebe nange le Nube nga unni kagera Krist lát-lát. Krist nga dum dè dooge se nyange malang se ndɔ’n-ndɔ’n a tɔ.

will be added

X\