NJE KE COLOSSES 4

1Sei kuwe-ɓolége, i rai ɓolége le si se dè naje’n a, se go rebe’n a tɔ. Adi kem̂ si olé titeke sei géa Kuwe si ndi danrán non tɔ. 2Uwei ra si mong ɔji tà se Nube se ndɔge malang a, i ndii kum dè ra’n oiyo’t a tɔ. 3Ɔji tà se Nube tede tà le jé tɔ. Titeke bè á è à ɔr’n tà rebe kade j’ile’n mber tà le’n. I deji nin le kade ɔr tà rebe ade j’ile’n mber tà le Krist ke tò loo ɓɔyɔn’t ɓai nga. E tede tà le Krist á ɓila m’ndii’n se sulge jim’t. 4Ɔji tà se Nube tede kade ade m’ɔrgir tà le Krist nga ndát-ndát se go rebe’n. 5I njiyei se kumkunju’n ra njé ke nata’t a, i pabri kurloo ke Nube ade sei nga parr-parr a tɔ. 6Maje kade tà tam si è ke maje se ndɔge-ndɔge a, kade tà si tee se tà nelge dɔ-dɔ a tɔ. Titeke bè á sei a geri loo kile nanan géa dè tà’t se go rebe’n. 7Nyan malang ke ɔje dè’m nga, ngokon’m Tychique ke è kótar le’m à ɔrgir maje kade ooi. Tychique nga è ngarankum njè gete’m a, è njèmade kule le’m gir Kuwe-ɓee’t a tɔ. 8Gir’n ke nè á m’ule’n ra si’t kade ede sei tàge ke ɔje dè jé kade ooi ɓaa, adi ɓengre si oso’n nang pon. 9M’ule njèkem̂nda Onésime m’ade aw se Tychique nga nan’t. Onésime è ngokom’m ke m’tár’n ngain. E doo ke ɓee le si nú. Dé joo mbak kuwe d’a d’ɔrgir nyange malang ke ɔje dè jé loo ke nè’t kade ooi. 10Aristarque njèmade dangai le’m ei se Marc ngonn le ngokon Barnabas rai sei lapya tɔ. Marc nga ndɔ ke m’ede sei tàge ke ɔje dè’n kété ɓá. Ke nè á aw tee ra si’t ɓaa, uwei nin ke ra si’t se maje’n. 11Jésu ke dé ɓar’n Justus nga géa ra sei lapya tɔ. Dé ke mute nè nga kuwe se kar de á dé Juipge ke njétaakem̂-Krist ke dé ra se’m kule ke ɔje dè konɓee le Nube. E dé nè á dé njé sɔl kem̂’mge. 12Epaphras, doo ke ɓee le si nú ra sei lapya. E ɓer kule le Nube ke ndi ra rɔ se ndɔge malang tede le si loo kɔje tà’t le’n se Nube. E ra titeke bè kade i ndai dè nja si’t njáng a, i maji ɔri njêt a, i geri nyan malang ke kem̂ Nube ndige a tɔ. 13Man m’ɔrgo tà le’n m’ede sei titeke è ule ra’n ndibe ngain tede le si a, tede le njé ndii kem̂ ɓee-bò ke Laodicée se Hiérapolis a tɔ. 14Njèkuge-kaje, Luc, kotár le’m ei se Démas rai sei lapya tɔ. 15I rai lapya njétaakem̂-Kristge ke ndii kem̂ ɓee-bò ke Laodicée adi jè. I rai lapya Nympha se njékebe nange le Nube ke kebi nan kem̂ kei le’n adi jè tɔ. 16Loo ke i tutei magtub nè nga dann si’t ɓá ɓaa, ulei adi njé kebe nange le Nube ke kem̂ ɓee-bò ke Laodicée kade tutei tɔ. Sei géa, maje kade i tutei magtub ke in ra njékebe nange’t le Nube ke Laodicée nga an-in tɔ. 17Edi Archippe edi nè: I ndi kum dè kule ke Kuwe-ɓee um jii’t le kade i ra ɔr son’n njêt. 18An-in! lapya ke man Paul kuwe m’ra sei se ji’m á nè: Adi kem̂ si olé dè sulge ke jim’t. Maje kade kem̂noje le Nube nain se si.

will be added

X\