NJE KE COLOSSES 2

1Man m’ndige kade i geri titeke m’ra rɔ ke bò tede le si sei, tede le njé ke ndii kem̂ ɓee-bò ke Laodicée a, tede le njé ke an-in kum’m nja karé lé ɓai a tɔ. 2Man m’ndige kade ɓengre de oso nang pon a, le kade umi nan’t bɔk dè tár nan’t a tɔ. M’ndige kade kumkunju se gos ter nyan ke deri taa ra si pel-pel. Titeke bè á a i geri nyanbaw le Nube ke tò loo ɓɔyɔn’t nga. Nyanbaw le’n ke tò loo ɓɔyɔn’t nè nga è Krist. 3Krist nga nyanbawge le kumkunju se le gos nyanger ke se ri de-ri de ɓɔyɔi ra de rann’t sɔk-sɔk. 4M’tam tàge nè nga titeke bè le kade doo karé bè géa libe kum si se tàge ke nel karè lé. 5Kerɔte kuwe, danra’m ndi ebe se si, nè se tàgir le’m ɓaa m’ee se si nan’t. M’ra ranel tede nyange ke dann si’t aw maje se gonan-gonan a, tede ba ke sei bai nja si nang dè kundekem̂ dè Krist’t a tɔ. 6Titeke sei an-in Jésu-Krist ke Kuwe-ɓee nga ɓaa, i njiyei se go rebe le’n ke è tɔje sei. 7Ulei ngire si nang rann’t janm-janm a, i rɔti ndikumgajer le si dènn’t a tɔ. I ɓeɓerei dè kundekem̂ dè Krist’t titeke dé ndó’n sei kété ɓá. I rai Nube oiyo se ndɔ si, ndɔ si. 8Undei kumkunju dè ra si’t le kade dé sú kum si se tà ndóge ke lanm a, se tà sú ke raikarè se go nyangirkà le dooge ke dè nang nè nga lé a tɔ. Nyan-ndóge nè nga in-in ra Krist’t lé, nè in-in ra dooge ke dè nang nè. 9Nube urkei kem̂ Krist’t a, taa ra’n pel-pel a tɔ. 10Krist è doo dè njékonɓeege se njé tɔgmong-ge malang. Takul’n á sei ingei nyan-nojege adi taa’n ra si pel-pel. 11Takul Krist á d’uje’n tà mɔte si. E ji doo á uje tà mɔte si nga lé, nè è Krist á goré nyan le danra ɔr ra si’t kɔke. 12Dé dubu sei se Krist nan’t ndɔ ke d’ule’n sei manné njonm nga. Nè sei undei loo i teei se’n nan’t dann njé ke koo’t takul kem̂ si ke undei dè tɔgmong’t le Nube ke njè kade è unde loo tee’n dann njé ke koo’t. 13Kété sei weii yo nyanra sige ke go’t lé a, se yo tà mɔte si ke ujei lé nga a tɔ. Nè ɗarinè, Nube ade i teli i ndii kumgajer se Krist. Nube ade kem̂’n tin mbit dè nyanrage malang ke go’t lé le jéi. 14Nube tuju magtub gute-ndu ke njè kile tà dè jéi’t nga ndát-ndát kɔke. Magtub nè ile tà dè jéi’t ɔje dè ndukunnge ke j’asi rai nyan’n tɔli mbas lé. Magtub ke njè kile tà dè jéi’t nga Krist aw se’n ɓer’n kàde kage-ke-dese’t tuju’n kɔke. 15Nube ɔr ngar dè njékonɓeege se njé tɔgmong-ge a tɔ. E unn banga dè de’t tàkum dooge’t nata ndái-ndái. E um de nonn’t tite dangaige bè loo kunn banga’t le Ngonn’n. 16Gir’n ke nè á, maje kade doo karé ile tà dè si’t ɔje dè nyankuse éké nyankain éké dè ra nan’t éké ɔje dè nan ke tee kige éké ɔje dè ndɔ taa kebege lé a tɔ. 17Nyange nè malang nga ei til nyange ke ndii à reei. Nè Krist á è ngarankum nyan ke get. 18Adi dooge ke njé ɗɔyi dooge ke danrán nanri se si nyan ke a an-in ngɔde’n nga taai ji si’t lé. Dooge nè nga ndigi ndɔri sei kaw se si kade ilei koje dè dooge ke danrán’t. Dooge nè nga inyei ra de nyein dann nyanpindege’t le de ti ra de mugug-mugug se ndáng karè se go tàgirge le danra. 19Dé nè nga dé labe ra de parr ra Krist ke è doo dè de nga lé. Nè dè doo á è njè kade danra doo bere mbak nyan ke danra aw ndoo’n. E takul dè doo á ngire-ra doo se dè kur rannge bere mbak umi nan’t bɔk; è Nube á ade danra doo nè ra tɔge ke kété-kété. 20Ke nè á sei weii se Krist nan’t kerɔte ɓaa, sei ɔri ra si kɔke dann nyan-ndóge’t ke ɔje dè dooge ke dè nang nè ɓá. Ké bain taɓai sei i teli i rai ɓer le ndukunnge nè nga titeke ndikumgajer le si tò ɔje dè nang nè ɓai wa? 21«Unn lé» a, «I nan lé» a, «Ɔde ra lé» a tɔ: Eige ke nè á ei ndukunnge nè nga. 22Nyange nè nga malang ei nyange ke à tuji ke nè á dé ra se de kule se go rebe’n lé. Nyange nè nga ei ndukunnge se nyan-ndóge ke in ra dooge’t karè. 23Ɗɔi dooge ke danrán, kɔbe ra kage nga, ei nyange ke an de ɓaa, ei tooi asinan se kumkunju kuwe. Nè né è bè géa, ei nyange ke raikarè m asikum suin tà ngur nyan le danra lé sár.

will be added

X\