NYANRA NJEKAWKULEGE 6

1Kêm ndɔnge’t nè nga, kɔr njékuwe-gir-Jésuge in dè made’t ke kété kété. Juipge ke tami tà Grec ɓari Juipge ke njéɓeege tede loo ke à noboi nyankuse ɓaa, ei oréi dè njékei-kinge le Juipge ke dè ɓee’t nang se ndɔ de-ndɔ de. 2Njékawkulege ke dɔg-gidé-joo ɓari kos njékuwe-gir-Jésuge edi de edi nè: – Kade j’inyei go tà le Nube le tel k’ee njé nobo nyankusege nga, tuwe jè ɗêw lé karè. 3Gir’n ke nè á, ngakon jége, i sangi dingemge ji sejimute dann si’t ɔri de le kade jè tel se kule nobo nyankuse j’umi ji de’t. Nè maje kade ei dooge ke d’ɔr tà le de maje. Maje kade ei dooge ke Ndil-Kêmnda se kumkunju taai ra de pel-pel a tɔ. 4Nè jè ɓaa, j’à j’aw kum jé ke kété de kɔje tà se Nube’t a, se dè kile mber tà’t le Nube a tɔ. 5Tà nè nga nel njétaakêm-Kristge malang ade ɔri Etienne dingem ke kundekêm le’n ii ngain a, Ndil-Kêmnda taa kêm’n pel-pel. D’ɔr Philippe se Procore se Nicanor se Timon se Parménas se Nicolas dingem ke ɓee le’n è Antioche ke tel ra’n ke Juip nga a tɔ. 6Dé ree se dooge nè nga, d’unde de non njékawkulege’t. Njékawkulege ɔji tà se Nube tede tà le dooge ke d’ɔr de nè ɓita undei ji de dè de’t ɓai. 7Tà le Nube ra tɔge ke kété-kété a, kɔr njékuwe-gir-Jésuge in dè made’t ke kété-kété kêm ɓee-bò ke Jérusalem. Kos njékuje nyan-mesege bule géa, teli undei kêm de Kuwe-ɓee Jésu’t tɔ. 8Etienne è doo ke ndutɔr se tɔgmong le Nube taa ra’n pel-pel. E ra nyange ke dum kum se nyankɔbege ke bò dann kosdooge’t. 9Kêm ndɔn’t nè nga, Juipge ke nange ke kêm ɓee-bò ke Cyrène, Alexandrie se njé ke kêm ɓeekon ke Cilicie a, se Asie a tɔ reei kêm kei kebe nan’t . Kei kebe nan nè nga d’ede nè è kei kebe nan le ɓerge ke teli ndii dè de pal. Juipge nè nga malang in-in naji tà se Etienne. 10Nè ei asikum naji se’n tà dum lé tede è tam tà se go kumkunju ke Ndil-Kêmnda ade’n. 11Loo ke ei an-in bè ɓaa, ei adi dooge ke rang nar le libe’n kum de le kade tami edi nè: – Tà ke majelé ke ndɔ ke Etienne tam ɔje dè njèyo Moise a, se dè Nube a tɔ nga, jè kuwe j’oo se mbi jé. 12Dé tam tà nè nga bè dé sule’n kosdooge se ngatɔgege a, se njéndang magtubge a tɔ. Gir’n ke nè á ei in-in bati Etienne uwei nin, ndɔri nin awi se’n non njégangtàge’t. 13Taɓai d’aw d’ɔr njé tà lanmge dé ree se de d’ade tami edi nè: – Doo nè tam tà ke majelé ɔje’n dè kêm kei ke tò se ninn’n le Nube a, ɔje’n dè gute-ndu le Moise a tɔ. E tam tà ke majelé nè nga kum’n ke kété-kété m ebe ra’n lé ɓai. 14N’ee karé ke n’nda nè kuwe n’tel n’tam ɓai n’ede nè: «Jésu ke Nazareth nga à tête kei le Nube nè kɔke a, à tel tur girkà ke Moise inye ade jèi nga a tɔ.» Jè kuwe j’oo tà nè se mbi jé. 15Kum njégangtàge malang è dè Etienne’t sikm. D’an tàkum’n tò tite tàkum doo ke danrán bè.

will be added

X\