NYANRA NJEKAWKULEGE 5

1Dingem karé bè ri’nè Ananias. Ri neen’n nè Saphira. Dingem nè nga ige loo le’n. 2Ananias se neen’n umi tà le de nan’t ɔri tà nar loo le de pa ɓita reei se gute umi non njékawkulege’t ɓai. 3Nè Pierre deje Ananias ede nè: – Ananias ke bain á inye loo ade Sú tà loo ke dè ɓengrei’t ɔge wa? I ede Ndil-Kêmnda tà lanm, tede ɔr’n tà nar loo lei ndêin bè tá i ree’n. 4Kété ke ige loo nè lé ɓai nga, ké tò è nyan kingei bè lé wa? Lo ke i unn ige’n ɓaa nè géa, ké nar’n è lei kade i ra’n nyan ke kêmi ɔje lé wa? Ké bain á aw se tàgir titeke bè dè ɓengrei’t wa? E dooge á ede de tà lanm lé, nè è Nube á ede’n tà lanm. 5Loo ke Ananias oo tàge nè nga bè ɓaa, oso njanm wei. Dooge malang ke tà yo’n oso mbi de’t nga, ɓel unde de ndàt gang de. 6Basa dooge ɔsi nang in-in, unni ninn’n ɓiri se kubu dagr-dagr awi se’n nata dubi nin. 7Kò’n tò ase kàde mute go’t gugu ɓaa, neen Ananias in nata ree kei. E ger nyan ke tee dè ngawn’t nga lé. 8Pierre deje’n ede nè: – Ede’m, nar loo le si ke sei igi nga, ké kɔr’n kuwe á nè ta wa? Saphira ile Pierre dè’t ede nè: –Oiyo koré nar’n kuwe á nè. 9Nè Pierre ede Saphira ede nè: – Ké bain á sei se ngawi umi tà le si nan’t le nan’n Ndil Kuwe-ɓee titeke bè wa? An! njé ke dubi ngawi nga oo ká nja de ke à ɓar tà kei’t nata non. I géa à unni nin kawi sei nata tɔ. 10Ke loon’t nè kuwe, Saphira oso nang njanm nja Pierre’t wei. Basa dooge reei kêm kei ingei ninn’n ɓaa, unni awi nata dubi kɔte ngawn’t. 11Njékebe nange le Nube bere mbak nga ɓel ra de ngain. Dooge malang ke tà nè oso mbi de’t nga géa, ɓel unde de ndàt gang de tɔ. 12Nyankɔbege se nyange ke dum kum oji nan ji njékawkulege’t nyanmi-nyanmi dann kosdooge’t. Njétaakêm-Kristge malang ndii se kêm karé gir pal’t le Salomon. 13Kosdooge piti de ngain. Nè né è bè géa, doo karé dann de’t nanr loo le kur dann njétaakêm-Kristge’t lé. 14Kosdoo-bulege ngain, dingemge se dinyege ke undei kêm de dè Kuwe-ɓee Jésu’t nga kɔr de in dè made’t ke kété kété. 15Gir’n ke nè á, dé koto’n njératurge se tuwe tò de a, se tire tò de bere mbak d’unde’n de nata ɗêng-ɗêng ka-rebege’t. Dé ra titeke bè tede kade loo ke Pierre à dere ɓaa, ndil’n ke ɓer kuwe oso dè doo karé dann njératurge’t nè nga. 16Doobulege in-in se ngann ɓeege ke tooi kɔte ɓee-bò ke Jérusalem reei se njératurge se njé ke ndilge ke majelé rai kum de ndoo. Njératurge ke dé ree se de nga, ratur ɔr dè de’t ndát-ndát. 17E ke nè á maw njékuje nyan-mese se dooge malang ke umi go Saddusienge’t nga, kêmkein rusu kêm de njin-njin ade ɔsi nang in-in 18uwei njékawkulege umi de kêm kei dangai’t le njékonɓeege. 19Nè dann ndɔ ɓaa, Kuwe-ɓee ule doo le’n ke danran ade ree teen tàbit-kei dangai inye wei. E ade njékawkulege undei loo teei kêm kei dangai’t ɓaa, è ede de ede nè: 20– Ɔti awi, i ndai kêm kei le Nube ilei mber tà malang ke ɔje dè ndikumgajer nè nga adi kosdooge. 21Loo ke njékawkulege ooi tà ke doo ke danrán ede de nè nga bè ɓaa, ei ɔti awi kêm kei le Nube se ndɔgé ɓat unni gir ndói dooge nyan. Nè maw njèkuje nyan-mese se njé ke ei se’n reei ɔsi nja njégangtàge le Juipge se ngatɔgege le kosdooge ke Israel malang. Go’t gugu ulei kule kei dangai’t adi dé ree se njékawkulege. 22Nè loo ke njé ngonm tà kei le Nube reei teei kêm kei dangai’t ɓaa, ei ingei njékawkulege nga lé. Ke loon’t nè kuwe, ei ɔsi wan teli dè nja de’t awi ɔri go nyange malang adi njégangtàge, edi nè: 23– Loo ke j’aw ɓaa, j’inge tàbit kei dangai tò se kutu’n jêke^. Njé ngonm tà kei dangaige géa ndai à ɔdi nan ngonm loo a tɔ. Nè loo ke jè teen tà kei ɓaa, j’inge doo karé géa kêm kei dangai’t lé. 24Loo ke njèkan dè njé ngonm tà kei le Nube se maw njékuje nyan-mesege ooi tà nè nga bè ɓaa, ei teli ndii giw giri tà ɔje dè goto ke njékawkulege gotoi njêl a, se nyan ke ayé tee kutu go goto le de nga ɓai a tɔ. 25Nè doo karé bè ree ede de ede nè: – An-in! dingemge ke umi de kei dangai’t nga ndai à ɔdi nan ndói nyan kosdooge kêm kei le Nube ndai non. 26Ke loon’t nè kuwe, njèkan dè njé ngonm tà keige le Nube aw se dooge le’n uwei njékawkulege teli reei se de jêke^ karè nal ra se de nyan, tede ɓeli edi nè bainléa kosdooge à kin-in tilei de se kuberi her tɔli de. 27Loo ke ei reei se de ɓá ɓaa, ei awi se de non njégangtàge’t. Maw njèkuje nyan-mese deje njékawkulege ede nè: 28– Ké kété j’unn ndu jé le kade i ndói dooge nyan se ri doo nyan le doo nga njing lé wa? An-in! nyan-ndó le si ke sei ndói dooge nga taa kêm ɓee-bò ke Jérusalem pel-pel. Ké sei ndigi kade tà mese doo nyan le doo nga uwe de jé jè ta wa? 29Nè Pierre se njékawkulege madennge ilei de dè’t edi nè: – Gar-gar kile koje dè Nube’t è soo’t dum kile koje dè dooge’t. 30Jésu ke sei adi dé ɓer’n kàde kage’t dé tɔl’n nga, Nube le kà jéige ade unde loo tee dann njé ke koo’t kɔke. 31E nga Nube unn’n unde’n dè jikonn’t ade è njè kunde gir kaje le dooge. Nube ra titeke bè le kade dooge ke kêm ɓeekon ke Israel turi hal de ingei kêm tin mbit dè kaiyage’t le de. 32Jè jè njékɔrgo tà nyange nè nga. Ndil-Kêmnda ke Nube ade njé ke rai nyan ke kêm’n ndige géa, è njèkɔrgo tà nyange nè nga tɔ. 33Loo ke tà nè oso mbi njégangtàge’t ɓaa, wong ra de ngain ade ndigi le kade d’udu kum njékawkulege. 34Nè Pharisien karé bè è njèndó dooge gute-ndu, ri’n nè Gamaliel. E doo ke kosdooge malang ilei koje dènn’t. E ɔse nang in dɔ dann njégangtàge’t. E unn ndun’n le kade d’ade njékawkulege undei loo teei nata ndêin ɓita. 35Loo ke njékawkulege teei nata ɓá ɓaa, Gamaliel ede njégangtà madennge ede nè: – Sei dooge ke Israel, undei kumkunju dè ra si sei’t kuwe ɔje dè nyan ke a i rai se dooge nè nga. 36Adi kêm si olé dè Theudas’t, tede ndɔ ke kété è ɔse nang in tam ede nè: n’ee kuwe n’ee doo ke bò. Gir’n ke nè á dingemge aru sɔ umi nan goon’t mbuu. Nè loo ke dé tɔl’n mbeng kɔke ɓá ɓaa, dooge ke goon’t yali nan karé-karé malang ade nyan le’n ke unde gir nga tel è nyan ke karè. 37Go Theudas’t ɓaa, doo karé ke ɓeekon ke Galilée, ri’n nè Judas ɔse nang in ke le’n tɔ. E ndɔ ke d’a d’unde’n ri dooge kêm magtub’t tede le ger’n kɔr de. Judas nè nga ɔr kosdooge mbuu um de goon’t. Nè loo ke dé tɔl’n mbeng ɓá ɓaa, dooge malang ke umi nan goon’t nga, dé yal de karé-karé malang. 38Ɗarinè man m’ede sei ndàt, i tɔri ji si gir dooge’t nè nga lé, inyei de jêke^. Ke nè á nyan ke ɔji le rai éké nyan ke ndii à rai nè nga in ra dooge’t ɓaa, à unde nang ɓai. 39Nè ke nè á nyan ke ɔji le rai éké ke ndii à rai nè nga in ra Nube’t ɓaa, sei asikum tuju’n ndan lé. An-in! maje nè a kin-in kilei kate kum Nube’t. Njégangtàge malang taai tà le Gamaliel. 40Njégangtàge teli ɓari njékawkulege adi d’unde de se ndêin maru, taɓai ei unni ndu de ade njékawkulege le kade tami tà se ri Jésu nè nga lé njing ɓita inyei de adi awi ɓai. 41Njékawkulege undei loo teei loo gangtà’t se ranel tede Nube an de ke dooge ke asikum kade d’ile rasɔl dè de’t tede ri Kuwe-ɓee Jésu. 42Se ndɔ karé-karé malang, njékawkulege ebi ra de dè ndó nyan dooge éké kile mber Tà ke Maje le Jésu-Krist nga lé. Dé ra titeke bè kêm kei le Nube a, se kêm kei-kei a tɔ.

will be added

X\