NYANRA NJEKAWKULEGE 4

1Loo ke Pierre se Jean ndai à edi kosdooge tà bè-bè ɓai ɓaa, njékuje nyan-mesege se ngar le njéngonm tà kei le Nube se Saddusienge undei loo teei pan. 2Dooge nè nga kêm de on de ngain dè nyan ke Pierre se Jean ndói kosdooge. Pierre se Jean ndói kosdooge edi nè: Jésu nga unde loo tee dann njé ke koo’t ɓá. Takul tɔgmong le’n á dooge à undei loo teei dann njé ke koo’t. 3Ndɔ à il ngɔr. D’uwe Pierre se Jean d’ade dé ngonnm de dangai’t sár barè. 4Nè né è bè géa, dooge ngain ke nange dann njé ke ooi tàge le de kété, teli ei njétaakêm-Kristge. Kɔr de ase aru dɔg loo mi. 5Barè lookar’n, njékɔr non Juipge se ngatɔgege se njékɔrgir gute-nduge kebi nan káng-káng kêm ɓee-bò ke Jérusalem. 6Hanne maw njèkuje nyan-mese, se Caiphe, se Jean, se Alexandre ndii loo kebe nan’t nè nga. Dooge malang ke ei girkoje le maw njékuje nyan-mesege reei loo kebe nan’t nè nga tɔ. 7D’ade Pierre se Jean undei loo teei reei ndai dann de’t. Dé deje de d’ede nè: – Ké bain á i rai nyan nè nga wa? Sei adi nja njèdɔgemete mong ɗaj-ɗaj. Ké tɔgmong le nan éké takul ri nan á sei rai nyan nè nga wa? 8Ndil-Kêmnda taa kêm Pierre pel-pel ɔse’n ade ede de ede nè: – Sei njékɔr non Juipge se ngatɔgege ke Israel, 9jè ra kêm-maje se njèdɔgemete j’ade in njiye ɗaj-ɗaj. Ɓila sei deji jè gir nyan ke jè ra á j’ade nja dingem ke njèdɔgemete tel mong’n ɗaj-ɗaj. 10Maje kade sei a, kosdooge ke Israel malang a tɔ, i geri tà nè maje. Jésu-Krist ke Nazareth nga sei ɓeri kàde kage-ke-dese’t, nè Nube ade unde loo tee dann njé ke koo’t. Takul ri’n á ɓila doo nè nda mong’n ɗaj-ɗaj tàkum si’t malang. 11Jésu nga è è Magtub le Nube ke tò se ninn’n tam tà ɔje’n dè’n ede nè: «E kuberi her ke sei njékunde keige an-in ke nyan lé, nè tel è kuberi her mong dè kum kei.» 12Doo karé ke rang ke kaje à in rann’t goto. Gar-gar ri doo karé ke rang dann dooge ke danrán éké ke dè nang nè ke j’asekum kinge kaje se takul’n goto. 13Loo ke njégangtàge an-in titeke Pierre se Jean ndai kêm de káng tami tà kum ngonn ke dingem ɓaa, tà ige de sêl, tede kété d’an de ke dooge ke raikarè ke geri magtub lé. Dé ger de ke njémade-loo-kawge le Jésu ke kété. 14Loo ke d’an doo ke kété è dɔgemete nda dɔ ngurung kɔte Pierre se Jean ɓaa, d’inge tà karé ke le tel tam lé. 15Njékɔr non Juipge se ngatɔgege ke Israel unni ndu de adi Pierre se Jean undei loo teei nata loo gangtà’t. Taɓai ei kuwe deji nan tà dann de’t edi nè: 16– Ké ri á j’à rai se dooge nè nga wa? Kerɔte kuwe, nyankɔbe ke dé ra nè nga tò nata ndái-ndái ade dooge malang ke ndii kêm ɓee-bò ke Jérusalem geri mbak ɓá. A ɓaa ɗarinè loo naje’n le jéi goto ta. 17Nè né è bè géa, adi jè rai de j’adi ra de tur de ɓita j’ɔgi de tam tà kede dooge se ri doo nyan le doo nè nga njing ɓai. Titeke bè á tà nè à ebe’n ra’n yal’n nan ke kété kété. 18Go’t gugu, dé tel dé ɓar de taɓai d’unn ndu de d’ade de le kade teli teein tà de tami tà éké ndói dooge nyan se ri Jésu nga lé njing ta. 19Nè Pierre se Jean ilei de dè’t edi nè: – Ké kile koje dè tà’t le si sei á maje dum kile koje dè tà’t le Nube wa? Sei kuwe i giri maje an-in. 20Nyan ke j’an se kum jé a, j’oo tà’n se mbi jé a tɔ nga, j’asekum kebe ra jé tam tà’n ndan lé. 21Loo ke d’oo tà ke Pierre se Jean tami nè bè ɓaa, dé tel d’ibe de pe^-pe^ ɓita d’inye go de ɓai. Tede d’inge tà ke get le kum’n de dangai’t lé. Dé ra titeke bè tede kile ke kosdooge malang ilei riɓar dè Nube’t ɔje dè njèdɔgemete ke ra’n tel mong ɗaj-ɗaj. 22Njèdɔgemete ke Pierre se Jean rai nyankɔbe aji nin nga, ɓal’n dum dè ɓal kɔr-sɔ. 23Loo ke d’inye Pierre se Jean dɔ ɓá ɓaa, ei teli reei ra njé ke le de’t ɔri sertàge malang ke maw njékuje nyan-mesege se ngatɔgege tami se de adi ooi. 24Loo ke njé ke le de ooi tàge nè nga bè ɓaa, ei undei ndu de nan’t karé edi Nube edi nè: – Hei! Kuwe-ɓee, i ke i ra danran se nang se ba-bò kate se nyange malang ke tooi tutu. 25E i kuwe á ndɔ ke ule tà lei tà ngonn njèndi’t lei, kà jé David, se go Ndil-Kêmnda ade tam ede nè: «Ké è tede ri á dooge ke ei Juipge lé tami tà jiki wa? Ké è tede ri á kosdooge tami tàge ke raikarè bè wa? 26Ngar-ɓeege ke dè nang nè ndii dè nja de’t le kaw rɔi; njékonɓeege géa umi nan’t bɔk le kin-in se Kuwe-ɓee a, se Krist le’n ke è ndum wubu dènn’t nga a tɔ.» 27Kerɔte kuwe, Hérode Antipas se Ponce Pilate umi nan’t bɔk se dooge ke ei Juipge lé se kosdooge ke Israel ke ndii kêm ɓee-bò’t nè nga, le kin-in se ngonn njèndi lei Jésu ke i kuwe i ndum wubu dènn’t unde’n se ninn’n. 28Nyan malang ke i ɔje se go tɔgmong lei a, se kêmndige lei kété mari ke desêin sàk-sàk nga, dé ra d’ade aw loon’t deĵ ɓá ta. 29Kuwe-ɓee, an! kibe ke d’ibe jè pe^-pe^ ɗarinè nga. Ade ɓer-kulege lei ilei mber tà lei se kêmnda káng ke deri. 30Ule jii njúng ade de le kade d’ɔr’n ratur ra dooge’t, le kade dé ra’n nyankɔbge se nyange dum kum takul ri Jésu, ngonn njèndi lei ke ɔr’n unde’n se ninn’n nga. 31Loo ke d’ɔje tà se Nube titeke bè gir gang ɓá ɓaa, loo ke dé kebe nan tutu ule yirk-yirk. Ndil-Kêmnda taa kêm de pel-pel malang ade d’ile mber tà le Nube se kêmnda káng. 32Kosdooge malang ke undei kêm de dè Jésu’t nga, umi kêm nan’t karé a, tooi asinan se doo ke karé a tɔ. Ei malang umi nyange le de nan’t loo karé, m doo karé bè géa dann de’t an nyan le’n ke nyankinge’n ke ɔje dè’n se kar’n lé. 33Njékawkulege ɔri go tà kunde loo tee dann njé ke koo’t le Kuwe-ɓee Jésu adi nunge ngain. Ei malang ndii dann bò kêmnoje’t le Nube bɔndum. 34Doo karé bè ke nyan nal’n goto dann de’t tede njé ke awi se loo ndɔrge se keige le de nga, ei igi ɓaa reei se nar’n, 35umi non njékawkulege’t ade dé kai de karé-karé malang se go nyan ke d’aw ndoo’n. 36Titeke bè á Joseph, ke njékawkulege ilei ri tɔyi’n nè Barnabas aw se loo ndɔr le’n. Barnabas nga tel se tà koje jéi ɓaa, è «Ngonn Njèkule dingem kêm madennge’t.» Joseph nga è girkà le Lévi njèkuje nyan-mese. Ɓee koje’n è Chypre. 37E ige loo ndɔr le’n karé ree se nar’n um non njékawkulege’t bɔk.

will be added

X\