NYANRA NJEKAWKULEGE 26

1Agrippa ede Paul ede nè: – M’inye loo m’adi kade i tam tà dè rai’t. Paul ɔr jikon’n ule dɔ tá tam’n tà dè rann’t ede nè: 2– Ngar Agrippa, ra’m nel’m ngain le kade m’tam tà dè ram’t noin’t ɓila ɔje dè nyange malang ke Juipge ilei tà dèm’t. 3I ger nyan girkà se tà najege le Juipge nga maje dum doo ke rang. Gir’n ke nè á m’deji le kade ile kêmi pon oo’n tà le’m. 4Nyan ra’m ke m’ra Jérusalem se basa’m dann girkoje’t le’m nga, Juipge malang geri. 5Man m’ee Pharisien ke njè ra ngang dum ɔje dè rebe manm Nube le jé jèi. Ke nè á Juipge ndigi ɓaa à edi nin titeke è kum kuwe, tede geri man mari bere. 6Ɗarinè, m’nda loo gangtà’t tede kunde ke m’unde kêm’m dè ndukunn ke Nube unn ade kà jéige kété nga. 7Girkà dooge le jéi ke dɔg-gidé-joo nga undei kêm de tchên titeke Nube à tɔl konn ndukunn le’n nè nga mbas. Gir’n ke nè á ei rai kule adi nin kada a, ndɔɔ a tɔ. Hei! ngar Agrippa, tede kundekêm tchên nè nga á Juipge à ɔdi nan sêke’m. 8Kunde ke Nube à ade dooge à undei loo teei dann njé ke koo’t nga, ké è tede ri á sei Juipge umi kêm si dè’t lé sár wa? 9Kerɔte kuwe, man nga kété m’gir kêm’t le tuju ri Jésu ke Nazareth nè nga gar-gar kɔke. 10E ke nè á è nyanra’m ke ndɔ ke m’ra Jérusalem. E maw njékuje nyan-mesege kuwe á unni ndu de adi man. Titeke bè á ndɔ ke man kuwe m’tuwe njétaakêm-Kristge ngain m’um de dangai’t se loo-loo. Loo ke ndɔ ke d’ade tɔl de géa, m’um se de nan’t bɔk a tɔ. 11Nja bule, m’aw se kêm kei kebe nange karé-karé malang, m’ra se de nyan ke tur. Taɓai m’unde tɔge dè de’t le kade d’inye go ri Jésu. Wong ra’m dè de’t ngain gée ade m’ɔr de kororoi sár m’tee se de heb se dè ɓee, dè ɓee. 12Titeke bè á, ndɔ karé bè kàde nda dann ɓee. M’ndi m’a m’aw ke kêm ɓee-bò ke Damas. E maw njékuje nyan-mesege kuwe á unni ndu de adi m’aw m’ra’n kule. 13Ngar, loo ke m’nain rebe ɓai kuwe, m’an nyan in danrán ndogó gan dè jé se njémade-loo-kawge le’m wàk. Ndogó le nyan nè nga dum le kàde ɓai. 14Jè malang, jè gudu nang bɔlɔk. M’oo ndu doo karé ɓar’m se tà hébreu ede nè: «Saul, Saul, ké tede ri á ɔr’m kororoi bè wa? I ndɔje rai ile rɔ ɔr tite sinde ke dè ngang ke ra ndáng se kuwe’n bè lé.» 15M’tel m’deje’n m’ede nè: «Kuwe-ɓee, ké i nan wa?» Kuwe-ɓee tel ile’m dè’t ede nè: «Man m’ee Jésu ke i ɔr’n kororoi nga. 16Nè ɔse nang in dɔ, i nda dè njai’t. An! gir nyan ke m’tee’n dèi’t pan nga: man m’ɔri ke ngonn njèndi le’m a, ke njèkile mber ɔje dè nyange ke ɓila an se kumi. A i njèkile mber ɔje dè nyange ke ndɔ ke rang m’a m’tɔji ɓai a tɔ. 17Man m’ɔri dann kos Juipge se dann njé ke ei Juipge lé. Ma m’tel kulei ra de’t gugu ɗarinè. 18M’a m’ulei kade i teen kum de ade undei loo teei dann tilkus’t teli reei dann lookar’t. M’a m’ulei ra de’t le kade ɔr de ji tɔgmong’t le Sú le tel ree se de ra Nube’t. Ke nè á d’unde kêm de dèm’t ɓaa, d’a d’inge kêm tin mbit dè kaiyage’t le de a, d’a d’inge loo ndi de dann njé ke ei le Nube’t a tɔ.» 19Unn gir kêm ndɔn’t nè nga, ngar Agrippa, m’altà tà nyanpinde ke in danrán nga lé. 20Nè m’ile mber m’ade dooge ke ndii Damas pa ɓita, go’t gugu m’ile mber m’ade njé ke Jérusalem se Juipge malang a, se njé ke ei Juipge lé a tɔ. M’ede de m’ede nè: I turi hal si, ɔsi wan i teli ke ra Nube’t. I rai nyange ke uwe made nan se tur hal si. 21Gir’n ke nè á, ndɔ ke Juipge uwei man kêm kei’t le Nube sangi le tɔli man ke loon’t nè. 22Nè Nube è der-gir’m sár tee ɓila á m’nda m’a m’ile’n mber m’ade ngann dooge a, se dooge ke tɔgi a tɔ. Nyan ke ndɔ ke njéribe-dè-tàge ke tà Nube’t se Moise tami edi nè à ree gar-gar á m’tam tà’n m m’tam tà ke gai lé. 23Njéribe-dè-tàge ke tà Nube’t se Moise nga, ndɔ ke tami edi nè: Krist nga, nyankêmkon à ra’n, è doo ke desêin sàk-sàk ke unde loo tee dann njé ke koo’t. Gar-gar à ile mber lookar kade kosdooge le jéi se njé ke rang. 24Paul nda à ɔdenan tam tà dè rann’t. Festus ede’n se ndu’n ke bòi ede nè: – Paul, nyanger lei ke ngain ile bile dèi’t. 25Paul ede nè: – Festus ke maje dum! Bile ra’m lé. Nè tà ke m’tam nga è ngarankum tà a, è tà ke se go rebe’n a tɔ. 26Ngar Agrippa nga, d’ede’n tà dè nyange’t nè d’ade oo mbak ɓá ta. Gir’n ke nè á, m’nda m’a m’tam’n tà nonn’t se kêmnda káng. Nyange nè malang nga, karé ke è nal ger goto, tede ei nyange ke teei adi dooge geri se loo malang. 27Ngar Agrippa, tàge ke njéribe-dè-tàge ke tà Nube’t tami nga, ké um kêmi dè’t kuwe wa? Oiyo, m’ger mbak titeke um kêmi dè’t kuwe. 28Nè Agrippa ede Paul ede nè: – Nain ngɔr ɓaa ayé tel’m ke njètaakêm-Krist ta. 29Nè Paul ede nè: – Nain ngɔr éké kò’n tò géa, m’kɔ Nube kade teli ke njètaakêm-Krist tite’m man bè, i se kari bere lé, nè sei malang ke ooi tà le’m ɓila, anje sulge ke dé tɔɔ’m nè kuwe se kar de bere. 30Ngar Agrippa, njèkonɓee Festus se Bérénice a, se njé ndii se de a tɔ, ɔsi nang in-in dɔ wum. 31Loo ke ei ɔri ra de ndai gai ɓá ɓaa, ei edi nan edi nè: – Doo nè nga, ra nyan karé ke ndête kade wei’n éké ndête kile’n dangai’t lé. 32Nè Agrippa ede Festus ede nè: – Ke nè á nè doo nè nga deje le kaw non César’t nú lé ɓaa, né j’à j’inyei nin dɔɔ.

will be added

X\