NYANRA NJEKAWKULEGE 25

1Loo ke d’unde Festus dè kutu-ngar’t ra ndɔ mute ɓaa, è in Césarée aw Jérusalem. 2Maw njékuje nyan-mesege se dooge ke bò le Juipge reei sêki Paul ra Festus’t edi nè: 3– Kɔkrɔ karè, ade dé ree se Paul Jérusalem tá à nel jè ɓai. Dé ra gos titeke bè tede kum’n rebe le tɔl’n. 4Nè Festus ile de dè’t ede nè: – Paul nga, dé ngonm’n dangai’t Césarée nú. Man géa, nain ngɔr ɓaa m’a m’tel kaw gugu nú. 5Maje kade dooge le si ke bò-bò awi se’m nan’t Césarée. Ke nè á doo nè nga ra majelé ɓaa à sêki nin. 6Festus ra se de ndɔ sɔsɔ éké ndɔ dɔg ɓita è tel ree Césarée ɓai. Barè lookar’n, è ndi loo gangtà’t. E unn ndu’n ade dé ree se Paul. 7Loo ke Paul ree tee pan ɓaa, Juipge ke in-in Jérusalem an-in dè’n girm. Ei têti tàge gai-gai ke tooi ɓel undei tànn’t. Nè è tàge ke se dè naje’n lé kuwe malang. 8Paul tam tà dè rann’t ede nè: – Man m’ra nyan karé ke majelé m’al’n tà tà gute-ndu’t le Juipge, éké m’al’n tà tà ngar César’t lé. M’ra nyan karé m’nede’n kei le Nube le jéi nga lé a tɔ. 9Nè Festus ndige le taa kum Juipge. E deje Paul ede nè: – Ké i ndige kaw Jérusalem le kade dé gangtà lei nè nga nonm’t nú wa? 10Nè Paul ilé dè’t ede nè: – Ḿ-m̀, dé ree se’m loo gangtà’t le ngar César. E è á à gangtà dèm’t. Man m’ra majelé karé bè se Juipge lé. I kuwe géa i ger maje. 11Ke nè á m’ra majelé ke asekum kade m’wei’n ɓaa, m’a m’naje’n kade yo lé. Nè ke nè á tàge malang ke d’ile dèm’t nga, è se dè naje’n lé ɓaa, doo karé bè géa asekum kuwe’m kule’m ji de’t lé. Man m’ndige le kade César tá gangtà le’m, ɓeekon ke Rome nú. 12Loo ke Festus ɔje tà se njégangtàge ɓaa, è tel ede Paul ede nè: – I ndige le kade César tá gangtà lei ɓaa, m’a m’ade aw non César’t nga kuwe tɔ. 13Ase ndɔ bule go’t gugu, ngar Agrippa se Bérénice reei Césarée le rai lapya Festus. 14Agrippa se Bérénice rai ndɔge bule kêm ɓee-bò ke Césarée. Festus ɔr tà le Paul unde non ngar Agrippa’t ede nè: – Félix inye dingem karé bè dangai’t laa. 15Loo ke ndɔ ke m’aw Jérusalem nga, maw njékuje nyan-mesege se ngatɔgege le Juipge reei sêki nin ram’t a, deji man le kade m’gangtà dènn’t a tɔ. 16M’tel m’ile de dè’t m’ede nè: Kile doo dangai’t nal kade tam tà dè rann’t tàkum njé sêkennge’t nga, è kule ra girkoje dooge ke Rome lé sár. 17Juipge reei se’m nan’t Césarée nè, ke loon’t nè kuwe, m’unn de m’unde de heb lé. Nè barè lookar’n kuwe, m’aw loo gangtà’t ɓaa m’unn ndu’m m’ade dé ree se doo nè nga. 18Juipge ke njé kile tà dè Paul’t reei. M’gir kêm’t m’ede nè ayé teei se tàge ke majelé-majelé ke sêki nin nga. Nè tà karé bè géa tee tà de’t lé. 19Dé naje se Paul tàge ke nange ke ɔje dè rebe manm Nube le de dé Juipge a, se tà ke ɔje dè doo karé bè ke ri’n nè Jésu. Doo nè nga dé Juipge d’ede nè wei se non’n, nè Paul uwe tà’n mong ede nè Jésu nga ndi kumgajer se non. 20M’ger nyan ke kum ra ɔje dè tà najege ke titeke bè nga lé. Gir’n ke nè á m’deje’n Paul m’ede nè: ké è ndige kaw Jérusalem tá kade dé gangtà le’n nú wa? 21Nè Paul deje le kade ngar ke bò Auguste Césarée tá gangtà le’n. E á man m’unn’n ndu’m le kade dé ngonm’n dangai’t sár kade m’ule’n se’n nú Rome ra César’t. 22Ngar Agrippa ede Festus ede nè: – Doo nè nga, man géa m’ndige koo tà le’n tɔ. Festus ede ngar Agrippa ede nè: – Barè nga kuwe a oo tà le’n karè. 23Barè lookar’n ɓaa, Agrippa se Bérénice njiyei masas reei kei gangtà’t. Njèkan dè njérɔge se dooge ke bò-bò ke kêm ɓee’t reei se de nan’t loo gangtà’t nè tɔ. Festus unn ndu’n ade dé ree se Paul. 24Ke loon’t nè kuwe, Festus unn tà tam ede nè: – Ngar Agrippa se sei malang ke i ndii se jé nan’t nè. Dingem ke an-in nin nè nga, kos Juipge malang reei sêki nin ram’t Jérusalem a, ɓéee nè a tɔ. Ei deji man se ndu de ke bòi edi nè: Doo nyan le doo nè nga ndête kade ndi kumgajer lé. 25Man ɓaa, m’an nyan karé bè ke ndête kade wei’n lé. Nè titeke è kuwe deje le kade ngar Auguste César tá gangtà le’n ɓaa, man m’ɔje le kule se’n kade’n kuwe tɔ. 26Kerɔte kuwe, m’an tà karé ke gete le ndang’n magtub kade kuwe jéi César Auguste ɔje dè doo nè nga lé. Gir’n ke nè á m’ɓar’n m’ade ree nda’n non-in i ngar Agrippa’t se non si sei’t malang. I deje’n tà oo tá bainléa m’a m’inge tà ndang. 27Tede kule se dangai kêm ɓee-bò ke Rom anje ndang tà kɔr’n gir nyan ke d’ile’n tà dènn’t nga, kuju’n goto.

will be added

X\