NYANRA NJEKAWKULEGE 24

1Loo ke ra ndɔ mi ɓaa, Ananias maw njèkuje nyan-mese se ngatɔgege ke nange in-in reei kêm ɓee ke Césarée. Tertullus njègangtà karé ke tà’n nel ngain ree se de tɔ. Dé mbak d’aw dé sêke Paul ra njèkonɓee’t. 2Loo ke dé ɓar Paul d’ade ree ɓaa, Tertullus unn gir kɔr tà kile dènn’t ede nè: – I Félix, njè maje dum, takuli i á jè ndii’n se kêmlom ke deri. Takul kunde tée ra lei á i gɔl’n ɓee ade tee kɔde malang ade kosdooge nè nga. 3I Félix, njè maje dum, jè rai oiyo se ndɔge malang tede nyan-majege malang ke i ra ade jè nga. 4M’ndige le ndɔji se tàge ngain lé. Nè né è bè géa, ile kêmi, ur mbii oo’n tà le’m ndêin ɓita. 5Dingem nè nga, j’an’n tò asenan se yo-kos ke tee kêm ɓee’t bè. E njè tule Juipge nan’t ade tà oso’n se kêm ɓee-ɓee. E á è ngol njé le Jésu ke Nazareth, doo nyan le doo nga. 6Ndɔ ke è sang rebe le kade doo ke è Juip lé aw se’n kêm kei le Nube ke tò se ninn’n á j’uwe’n dè’t. [Jè ndige le gangtà dènn’t se go gute-ndu le jé. 7Nè Lysias, njèkan dè njérɔge ke aru dɔg tee pan, uwe’n wont ɔr’n ji jé’t aw se’n. 8E unn ndu’n ade njé kile tà dènn’t le kade awi sêki nin rai’t.] I kuwe i deje tà doo nè ɓaa, a i ger titeke tàge malang ke jè sêke’n nga è kum kuwe. 9Juipge osoi gir Tertullus’t edi nè tà le’n è kum kuwe. 10Loo ke Félix, njèkonɓee ute dè’n ɗêi ade Paul kade tam tà ɓaa, Paul ede’n ede nè: – M’ger mbak, ase loge bule i njègangtà le girkoje dooge le jéi nga se dè naje’n. Gir’n ke nè á man m’tam’n tà se kêmnda káng dè ram’t noin’t ɓila. 11M’ree Jérusalem le ɗɔi Nube, ɓila ra ndɔ dɔg-gidé-joo ɓai. Ke nè á m’lanm ɓaa, i deje de oo. 12M’nda m’naje tà se doo kêm kei le Nube m’ade d’inge’m dè’t nja karé ndan lé. M’nda m’sule doobulege kêm kei kebe nange’t éké kêm ɓee-bò’t m’ade d’inge’m de’t nja karé ndan lé a tɔ. 13Dooge nè nga asikum kɔri gir nyan ke get ke ilei tà dèm’t nga lé. 14Nè né è bè géa, nyan karé ke m’ger á tò nè: M’ra kule m’ade Nube le kà jéige. E tede kum ke ɓila m’um nan’t bɔk se Jésu nè á dé ngakonm Juipge d’ute’m mbeng. Tàge malang ke kêm magtub gute-ndu’t se tàge ke njéribe-dè-tàge ke tà Nube’t ndangi nga, m’um kêm’m dè’t kuwe. 15Nube à ade njé ra nyan se dè najennge se njé ra nyan majelége à undei loo teei dann njé ke koo’t gar-gar. M’um kêm’m dè tà’t nè nga bɔk-bɔk. Dé njé sêkemge nè nga, d’um kêm de dè tà’t nè tɔ. 16Gir’n ke nè á m’ute’n ra’m kalang m’njiye’n non Nube’t se non dooge se tàgir ke unju nyang-nyang se ndɔge malang. 17Ase loge bule ɓita m’tel m’ree le kuwe noje se kosdooge le’m a, se le kunn nyan-noje kade Nube a tɔ. 18M’ndi m’ade d’a d’ɔr’m gonm kêm kei le Nube. Juipge ke nange in-in ɓeekon ke Asie reei ingei man dè’t. Doobulege gotoi se’m a, tà ɓar jiki ade dooge awi dè nan’t kutri lé a mbak. 19Ke nè á dé Juipge ke ɓeekon ke Asie nè, d’an nyan majelé ke m’ra ɓaa, è dé á né d’a ree sêke’m rai’t. 20Eké è tà le dooge ke ndii nè le kade tami majelé ke m’ra kété ke ndɔ ke m’nda’n non njégantàge’t nga. 21Kêm ndɔ’n nè nga, nyan karé luk-luk ke m’ra ɓaa, è tà ke m’in m’nda’n dɔ dann de’t m’tam se ndu’m ke bòi beng m’ede nè: «E tede tà ke ɔje dè kunde loo tee dann njé ke koo’t á ɓila m’nda’n loo gangtà’t non si’t.» 22D’ede Félix tà ke ɔje dè Jésu-Krist ade ger maje. Gir’n ke nè á è unde’n gangtà le de dɔ ede nè: – Loo ke Lysias, njèkan dè njérɔge ke aru dɔg à ree ɓita m’a tel nder gir tà le si rang koo ɓai. 23Félix unn ndu’n ade njèkan dè njérɔge ke aru karé le kade ngonm Paul se maje’n dangai’t. Taɓai è unn ndu’n ade’n le kade on Paul njanm-njanm lé a, le kade ɔge njé ke le’n le ra se’n dè nyange ke nal’n lé a tɔ. 24Mbɔr go’t gugu baa, Félix se neen’n Drusille reei Césarée. Drusille nga è Juip. E ule kule ɓar Paul ade ree inge’n. E deje’n le kade ede’n tà ke ɔje dè kundekêm dè Jésu-Krist’t. 25Paul unn gir tam tà ede nè: – Nube ndige kade dooge rai nyan se dè naje’n a, kade undei kumkunju dè ra de’t a tɔ, ɔji dè tà ke Nube à gang dè de’t ndɔ ke rang. Ɓel unde Félix ndàt gang’n ade tel ede Paul ede nè: – Ɔte aw ɗarinè ɓanm. Ndɔ ke m’inge kurloo ndêin ɓaa, m’a m’tel ɓari gugu rang ɓai. 26E unde kêm’n tchên ede nè bainléa Paul à ade’n nar ndêin. Gir’n ke nè á è ade dé ɓar’n d’ade ɔje se’n tà dɔ-dɔ. 27Lo joo go’t ɓaa, dé taa konɓee ji Félix’t d’ade Porcius Festus. Félix inye Paul dangai’t tede le taa’n kum Juipge.

will be added

X\