NYANRA NJEKAWKULEGE 22

1– Ngakonmge se bɔmge, uri mbi si ooi tà le’m ke m’a m’tam dè ram’t ɗarinè nga. 2Nè loo ke d’oo titeke è ede de tà se tà hébreu ɓaa, ká loo tel pa sibik dum ke kété. Paul ede de ede nè: 3– Man m’ee Juip. D’oje’m kêm ɓee-bò ke Tarse, ɓeekon ke Cilicie, nè koto á d’oto’m kêm ɓee-bò ke Jérusalem nè. M’ndó nyan ra Gamaliel’t ade m’ger’n loo kan dè gute-ndu le kà jéige sêw-sêw. Ra’m olé pêl-pêl dè nyan’t le Nube tite si sei malang ɗarinè tɔ. 4Dooge ke unni rebe le Kuwe-ɓee Jésu nga, m’ra kum de ndoo sár ase yo de. M’ade dé tuwe dingemge a, dinyege a, dé tɔ de se sul d’um de dangai’t. 5Maw njèkuje nyan-mese se ngatɔgege malang d’an nyange ke ndɔ ke m’ra kété nga se kum de. Ei asikum kedi sei tà’n. E dé kuwe á ndɔ ke m’taa magtub ji de’t m’aw’n ra ngakon jéige ke kêm ɓee-bò ke Damas. M’aw le tuwe njétaakêm-Kristge ke ndii nú le tɔ de se sul ree se de Jérusalem kade kure nyan ra de ɔde kum de. 6M’aw sár m’unde dè ɓee-bò ke Damas ngɔr. Kàde nda dann ɓee. Nyan ndogó in danran ndogó gan dè’m wàk. 7Ke loon’t nè kuwe, m’gudu nang bɔlɔk, m’oo ndu Jésu ɓar’m ede nè: «Saul, Saul, ké bain á ɔr’m kororoi bè wa?» M’tel m’deje’n m’ede nè: 8«Ngar ké i nan wa?» E tel ede’m ede nè: «Man m’ee Jésu ke Nazareth ke ɔr’n kororoi nga.» 9Njé ke ei se’m nan’t an-in nyan ke ndogó nè nga njai-njai, nè ei geri ndu njè tam se’m tà nga lé. 10M’tel m’deje m’ede nè: «Kuwe-ɓee, ke ri á i ndige kade m’ra gar-gar wa?» Kuwe-ɓee tel ede’m ede nè: «Ɔse nang in aw Damas ɓaa, d’a d’edi nyange malang ke Nube unn’n ndu’n le kade i ra nga ɓai.» 11Kum’m libe ade m’an loo lé tede nyan ke ndogó ngain nè nga. Njé ke ei se’m nan’t á uwei ji’m ndɔri man awi se’m Damas. 12Dingem karé bè ndi Damas ri’n nè Ananias. E doo ke ile koje dè gute-ndu’t le Moise. Juipge malang ke ndii kêm ɓee-bò ke Damas tami tà le’n maje. 13E ree ram’t ede’m ede nè: «Ngokon’m Saul, maje kade kumi tel an loo.» Ke loon’t nè kuwe, kum’m tel an loo ade m’an’n njai-njai. 14Ananias ede’m ede nè: «Nube le kà jéige ɔri kété mari bere le kade i ger nyan ke kêm’n ndige. E ɔri le kade an njèra nyan se dè naje’n karé bere se kumi a, le kade oo tà tànn’t a tɔ. 15Gar-gar a i njèkɔrgo tà le’n. Nyan ke an se kumi a, oo tà’n se mbi a tɔ nga, ɔrgir ade dooge malang. 16Ɗarinè ké a i ngine ri ɓai wa? Ɔse nang in dɔ ade d’ulei manné njonm se ri’n ɓaa a inge kêm tin mbit dè kaiyage’t lei.» 17Go’t gugu m’tel m’ree Jérusalem. Ndɔ karé bè, m’ndi kêm kei le Nube m’a m’ɔje se’n tà ɓaa, nyanpinde tee dèm’t. M’an Kuwe-ɓee tee ke kum’t pan ede’m ede nè: 18«I tee kalang kêm ɓee-bò ke Jérusalem kɔke. Dookêmɓeege à taai tà le’m ke a ede de nga lé.» 19M’tel m’ede’n m’ede nè: «Kuwe-ɓee, dooge geri mbak titeke è man kuwe á m’aw se kêm kei kebe nan, kêm kei kebe nan, m’tuwe njé ke undei kêm de dèi’t. M’unde de se ndêin maru a, m’um de dangai’t a tɔ. 20Njèkɔrgo tà lei Etienne ke ndɔ ke dé tɔl’n d’ade mese’n ule nang nga, man géa m’ee tutu tɔ. M’ndige se njé tɔlnge dè tɔl ke dé tɔln’t. E man kuwe á ndɔ ke m’ee njè ngonm kubuge le njé tɔl Etienne.» 21Kuwe-ɓee tel ede’m ede nè: «Aw, tede è man kuwe á m’a m’ulei heb ke ra dooge ke ei Juipge lé.» 22Juipge uri mbi de ooi tà le Paul sár tee dè tà’t nè ɓaa, ei unni gir tami tà beng-beng edi nè: – Doo ke titeke bè nga, ndête kade ndi kumgajer dè nang nè lé. Adi kum’n udu kɔke. 23D’ur kɔl a, dé tɔr kubuge le de dé tile piring-piring kɔke a, d’ɔi nang dé sanrin ke dɔ-dɔ d’ade kodé age sululu a tɔ. 24Titeke bè á, njèkan dè njérɔge ke aru dɔg unn ndu’n ade njérɔge le’n ede nè: – Awi seyé loo ndi njérɔge’t. I deji n’ee tà se ndêin maru tede kade tà tee tàyé’t. M’ndige le ger gir nyan ke dooge uri kɔl ɔji dèyé nè nga. 25Nè loo ke dé tɔ Paul d’ile’n nang le kunde’n ɓaa, è deje njèkan dè njérɔge ke aru karé ke nda à ra kule kêm ndɔn’t nè ede nè: – Doo ke è ngonn ɓee ke Rome ke dé gangtà dènn’t lé ɓai nga, ké d’unn ndu de kade undei nin se ndêin maru wa? 26Loo ke njèkan dè njérɔge ke aru karé oo tà nè bè ɓaa, è tel aw ra njèkan dè njérɔge ke aru dɔg ede’n ede nè: – Ké a i ra ri se rai ta wa? Doo nè nga è ngonn ɓee ke Rome. 27Njèkan dè njérɔge ke aru dɔg ree ra Paul’t deje’n ede nè: – Ede’m ndàt, ké i ngonn koje bè ke Rome kerɔte wa? Paul ilé dè’t ede nè: – Oiyo, man m’ee ngonn koje ɓee ke Rome kerɔte kuwe. 28Njèkan dè njérɔge ke aru dɔg nga tel ile Paul dè’t ede nè: – Ngonn koje ɓee ke Rome nga, man m’ndogo se nar ngain. Paul ilé dè’t ede nè: – Man m’ee ngonn ɓee ke Rome ke kon’m ɓéee. 29Ke loon’t nè kuwe njé ke d’ayé kunde Paul se ndêin tá le deje’n tà nga, d’in kengeng dènn’t kɔke. Nè loo ke njèkan dè njérɔge ke aru dɔg oo titeke Paul è ngonn ɓee ke Rome ke kon’m ɓéee ɓaa, ɓel unde’n ndàt gang’n tede è ade dé tɔ’n se sul njanm-njanm. 30Njèkan dè njérɔge ke aru dɔg ndige le ger nyan ke gete ke Juipge ilei tà dè Paul’t. Gir’n ke nè á barè lookar’n ɓaa, è ade dé tutu sul ke rann’t ke dé tɔɔ’n kɔke. Taɓai è unn ndu’n ade maw njékuje nyan-mesege se njégangtàge le Juipge malang kebi nan. Go’t gugu, è ade dé ree se Paul d’unde’n nang non de’t.

will be added

X\