NYANRA NJEKAWKULEGE 21

1Nè loo ke j’inye de ɓaa, j’al kêm bato’t j’aw jáa jè sɔbe dè goré loo ke Kos. Ndɔ ke njekon’t joo, jè tee Rhodes. J’in loon’t nè j’aw kêm ɓee ke Patara. 2Loo ke j’inge bato karé ke ayé gang mann kaw ɓeekon ke Phénicie ɓaa, j’al kêmé j’aw. 3Nè loo ke j’an dè goré loo ke Chypre non jé’t dil ɓaa, j’inye’n dè jigel jé’t, j’aw kum jé ke ɓeekon ke Syrie j’aw jè rise nang kêm ɓee-bò ke Tyr. Jè nda nang loo’t nè j’ade d’ɔr nyange ke kêm bato’t nang. 4J’inge njétaakêm-Kristge kêm ɓee-bò ke Tyr. Jè ndi se de ase ndɔ ji sejimute. Ndil-Kêmnda ɔse njétaakêm-Kristge nè nga balang ade edi Paul le kade aw kêm ɓee-bò ke Jérusalem lé. 5Nè loo ke jè ra se de ndɔge nè nga jè tɔl mbas ɓá ɓaa, j’in j’aw. D’in malang se neen dege a, se ngann dege a tɔ, dé dann jé sár d’aw se jé gide ɓee-bò’t nata. J’ɔse keje jé nang tà ba-bò’t j’ɔje tà se Nube. 6Taɓai loo ke jè ra nan lapya gir gang ɓá ɓaa, j’al kêm bato’t. Dooge ke njé dann jège géa teli awi loo le de, le de. 7J’ɔr son kaw mba le jé se rebe ke manné kêm ɓee-bò ke Tyr. J’in Tyr j’aw kêm ɓee-bò ke Ptolémais. Jè ra lapya njétaakêm-Kristge ke tutu, jè ndi se de ndɔ karé ɓita j’in ɓai. 8Loo ke ra ndɔ joo go’t ɓaa, jè tel j’aw kêm ɓee-bò ke Césaree. Go’t gugu ɓaa, j’aw jè ndi kêm kei le Philippe njèkile mber Tà ke Maje. Philippe nga, è è ke karé dann dooge ke ji sejimute’t ke ndɔ ke d’ɔr de ke njékan dè nyange le njékebe nange le Nube. 9Doo nè nga aw se ngannenge ke mande ke anje ger dingem sɔ ndii à ribei dè tà ke tà Nube’t. 10Jè ndi se Philippe ndɔ bule. Njèribe-dè-tà ke tà Nube’t karé bè ri’n nè Agabus in kêm ɓeekon ke Judée ree ra jé’t. 11Agabus unn ndar dɔ dè kubu le Paul tɔ’n nja’n se ji’n ede nè: – Ooi tà ke Ndil-Kêmnda tam: Doo ke ndar dɔ dè kubu le’n tò nè nga, Juipge ke kêm ɓee-bò ke Jérusalem à tɔɔi nin titeke bè le kulei nin ji dooge ke ei Juipge lé. 12Loo ke j’oo tàge nè nga bè ɓaa, jè se njéɓeege jè gɔr Paul le kade aw kêm ɓee-bò ke Jérusalem nga lé. 13Ke loon’t nè kuwe, Paul deje de ede nè: – Ké tede ri á i non-in adi ɓengre’m ayé gang’n dɔs wa? Man m’uwe dè nja ra’m le kade dé tɔɔ’m á go karé lé, nè m’uwe dè nja ra’m le kwei tede ri Kuwe-ɓee Jésu kêm ɓee-bò ke Jérusalem. 14Nè loo ke Paul um tà go jé’t lé ɓaa, jè tel j’ebe’t gɔr’n j’ede nè: – Maje kade Kuwe-ɓee ra nyan ke kêm’n ndige. 15Jè ra ndɔ asetam loo’t nè ɓita j’uwe dè nja ra jé j’in j’aw Jérusalem. 16Njétaakêm-Kristge ke nange ke Césarée danni jè awi se jé kêm kei le doo karé bè ke ri’n nè Mnason le kade jè tò tutu. Mnason nè nga è njètaakêm-Krist ke mari, ɓee koje’n è Chypre. 17Loo ke jè tee Jérusalem ɓá ɓaa, njétaakêm-Kristge uwei jè ke ra de’t se ranel. 18Barè lookar’n ɓaa, Paul aw se jé ra Jacques’t, ngatɔgege malang reei ingei jè rann’t. 19Loo ke Paul ra de lapya ɓá ɓaa, è unn gir kɔr ser nyange karé-karé malang ke Nube ade ra dann dooge ke ei Juipge lé nga ade d’oo. 20Loo ke ngatɔgege ooi tàge nè nga bè ɓaa, ei ulei ndubra dè Nube’t, taɓai edi Paul edi nè: – Ngokon jé an! Juipge aru dɔg loo bule teli ei njétaakêm-Kristge. Nè né è bè géa, ei malang uwei gute-ndu ji de joo. 21Nè d’ede de titeke i ndó Juipge ke ndii dann dooge ke ei Juipge lé le kade tɔri ji de gir gute-ndu’t le Moise. Taɓai d’ede de d’ede nè i ndó Juipge le kade mbati kuje tà mɔte ngann dege a, le kade mbati rai nyangirkàge le jéi a tɔ. 22Ké ri á j’à rai ta wa? Loo naje’n goto, dé malang d’a d’oo titeke i ree laa. 23I ra nyan ke j’à j’edi nè. Dingemge sɔ ke unni ndu de adi Nube le ndisei dè de lé ndii dann jéi’t laa. 24Aw se de ade d’ɔr sei gonm. Uge dè de ade dé ndise dè de kɔke. Titeke bè á dooge malang à geri titeke sertà ke ɓar tchoo ɔje dèi nga, è tà lanm karè. Nè i kuwe géa, an dè gute-ndu Moise sêw-sêw tɔ. 25Njétaakêm-Kristge ke ei Juipge lé nga, è soo’t le kade jè ndangi magtub jè ndeji de le kade ɔgi ra de dè dange ke dé polé’n mage, se dè mese’t a, dè dange ke mbir kɔbe a, se dè tò se nan ke kaiya’t a tɔ. 26Ke loon’t nè kuwe, Paul in se dingemge ke sɔ nè nga aw se de. Barè lookar’n, è ɔr ra’n gonm se de nan’t. Go’t gugu, Paul aw kêm kei le Nube. E ede de ede nè: ndɔ ke bè ɓaa, n’a n’ɔri ra de gonm ndɔ kɔr ra gonm’t. Loo ke gir ndɔ kɔr gonm gang ɗás ɓá ɓaa, d’a d’unn nyan-noje le kade tede le de karé-karé malang. 27Loo ke nain ngɔr kade ndɔ ke ji sejimute ke ɔje dè kɔr ra gonm ase deĵ ɓaa, Juipge ke kêm ɓeekon ke Asie an-in Paul kêm kei’t le Nube. Juipge nè nga sulei doobulege malang adi awi dè nan’t kutri a, adi uwei Paul a tɔ. 28Juipge tami tà beng edi nè: – Sei ngannkà Israel ke dingem, i din-in jè! An-in! doo ke njè kaw se loo-loo ndó dooge nyan le kade utei jéi kosdooge le Nube se gute-ndu’n éké kêm kei le Nube mbeng nga á nda nè. Taɓai dooge ke ei Juipge lé géa ɔr de ree se de kêm kei ke tò se ninn’n le Nube ade telii ke nyan ke mine. 29Ndɔ ke kété d’an Trophime, dingem ke Ephèse se Paul nan’t kêm ɓee-bò’t. Gir’n ke nè á d’ede nè bainléa Paul ade’n aw se’n nan’t kêm kei’t le Nube. 30Doobulege malang ke kêm ɓee-bò’t in-in awi dè nan’t kutri; kosdooge an-in som-som reei ɔsi nja nan. Taɓai ei uwei Paul kêm kei’t le Nube ndɔrii ngander-ngander awi se’n nata ɓá ɓaa, ke loon’t nè kuwe, ei uti tà kei le Nube. 31Dé sang le tɔl Paul, nè tà’n oso mbi njèkan dè njérɔge ke aru dɔg titeke dooge ke kêm ɓee ke Jérusalem bere mbak awi dè nan’t ngater-ngater. 32Ke loon’t nè kuwe, njèkan dè njérɔge ke aru dɔg ɔr njèkan dè njérɔge se njérɔge awi kalang loo ke kosdoo-bulege kebi nan tutu. Nè loo ke d’an njèkan dè njérɔge ke aru dɔg se njérɔge ɓaa, d’ebe ra de dè kunde Paul’t. 33Njèkan dè njérɔge ke aru dɔg age ngɔr ke ra Paul’t ade d’uwe’n. E unn ndu’n ade dé tɔ’n se sul joo ɓita, go’t gugu è deje ede nè: – Ké doo nè nga è nan wa? Ké ra ri wa? 34Nè dé ra nyan wuu-wuu dé taa’n mbur nan ke yo ke nè, dann doobulege’t nè nga. Njèkan dè njérɔge ke aru dɔg nè nga ase ger gir nyan ke gete lé tede doobulege awi dè nan’t kutri. E unn ndu’n ade d’aw se Paul gêrgêr’t loo ndi njérɔge. 35Loo ke Paul ree tee dè ɗinger loo ke tà kei’t ɓaa, njérɔge unni nin dɔ tede doobulege awi se’n kaber-kaber le tɔl’n. 36Kosdooge ngain gée ndolei goo’n edi nè: – Adi kumé udu kɔke. 37Loo ke nain ngɔr kade d’ur se Paul kêm kei loo ndi njérɔge’t ɓaa, è deje njèkan dè njérɔge ke aru dɔg ede nè: – Ké a inye’m kade m’edi tà karé lé wa? Nè è deje Paul ede nè: – Ké i ger tà Grec wa? 38Ké i doo ke Egypte ke ndɔ ke sule dooge ade in-in rai wong nga lé wa? Ké i nga kuwe á ndɔ ke ɔr njé tɔl dooge aru dɔg loo sɔ uru’n walé kêm dile’t nè lé wa? 39Paul tam ede nè: – Man m’ee Juip ke ɓee-bò ke Tarse, ɓeekon ke Cilicie. Man nga m’ee doo ke kêm ɓee-bò ke ri’n ɓar ngain. Kɔkerɔ karè, inye loo ade m’ede kosdooge tà. 40Loo ke njèkan dè njérɔge ke aru dɔg inye loo ade Paul ɓaa, Paul in nda dè ɗinger loo’t, è yei ji’n ade kosdooge le kade ebi’t. Ká loo tel pa sibik. Paul ede dooge tà se tà hébreu ede nè:

will be added

X\