NYANRA NJEKAWKULEGE 20

1Loo ke ká loo tel pan keng ɓaa, Paul ade dé ɓar njétaakêm-Kristge ade reei ingei nin. E ndeje de a, è ra de lapya a tɔ, ɓita è inye de ɔte aw kêm ɓeekon ke Macédoine ɓai. 2E unde kêm ɓeekon nè nga gang ndeje njétaakêm-Kristge se tàge ngain ɓita in aw ɓeekon ke Grèce ndi tutu ase nan mute. 3Loo ke nain ngɔr kade Paul al kêm bato’t le kaw kêm ɓeekon ke Syrie ɓá ɓaa, d’ede’n mêt titeke Juipge ɔri nan tà dènn’t le kumi nin rebe. E ɔse wan tel dè njann’t se rebe ke ɓeekon ke Macédoine. 4Sopater ngonn le Pyrrhus ke ɓee le’n è Bérée dann Paul aw se’n. Aristarque se Secondus ke ɓee le de è Thessalonique a, Gaius doo ke Derbe kêm ɓeekon ke Macédoine a, se Timothée a, Tychique se Trophime ke kêm ɓeekon ke Asie géa danni Paul a tɔ. 5Dé nè nga d’aw kété, dé ngine jè kêm ɓee ke Troas. 6Nè jè ɓaa, gir ndɔge ke ɔje dè ra nan Paque dere pa ɓita j’al bato kêm ɓee ke Philippes. J’aw sár ase ndɔ mi ɓita jè tee ra de’t Troas ɓai. Jè ndi kêm ɓee-bò ke Troas nè nga jè ra ndɔ ji sejimute. 7Ndɔ ke desêin ke njè kutu go ndɔ taa kebe, jè kebe nan le tête nan mapa. Paul ndi dè njann’t le kin kaw barè. E ɔje tà se njékebe nange le Nube sár dann loo bɔp. 8Kêm kei ke dè madege’t dɔ ke jè kebe nan tutu nga, lampege bule ase tà’t ndogói tutu kotong. 9Ngonn basa karé bè ri’n nè Eutique ndi tàkum bolè loo’t ngɔr. Ɓi ase’n nák loo ke Paul ndi ɔje’n se de tà ade kò’n ebe ɗàk. Ɓi ase ngonn basa nè nga nák ade in dè kei ke njekon’t mute ke d’unde dè made’t oso njanm. Dooge reei utei yo’n dɔ kɔnonn. 10Nè Paul rise aw ɗugu nang dènn’t, è unn’n uwe’n jinn’t ede nè: – Adi kêm si tò kekek lé, tede ndil’n nain rann’t laa ɓai. 11Loo ke Paul tel al aw dɔ gugu ɓaa, è tête mapa use. Taɓai è tel ɔje se de tà sár loo din-in dil ɓita unde loo tee aw. 12Nè basa doo nè nga, dé tel dé ree se’n ɓéee kumgajer. Kêm dooge malang oso nang pon. 13Nè jè ɓaa j’al kêm bato’t j’aw kété kêm ɓee ke Assos. Nè loo nè nga gar-gar j’à tel kunn Paul tutu. E ɔje njáng titeke bè tede è unn ndu’n le kaw se rebe-kɔse. 14Loo ke è ree inge jè kêm ɓee-bò ke Assos ɓá ɓaa, j’unn’n kêm bato’t tede le kaw kêm ɓee-bò ke Mitylène. 15J’in loon’t nè j’aw se dann ba-bò kate sár lookar’n ɓaa, j’an dè goré loo ke Chio non jé’t dil. Ndɔ ke njèkon’t joo baa, j’aw kum jé ke Samos. Ndɔ ke njèkon’t mute ɓaa, jè tee kêm ɓee-bò ke Milet. 16Paul ɔje njáng le kunde kêm ɓee-bò ke Ephèse se nja’n dɔ gang m è ndige nda nang tuju ndɔge le’n kêm ɓeekon ke Asie lé. E ute ra’n kalang ké n’a kasekum tee Jérusalem se ndɔ ra nan Pentecote nga lé wa? 17Nè né è bè géa, loo ke Paul tee kêm ɓee ke Milet ɓaa, è ule kule ɓar ngatɔgege le njékebe nange le Nube ke kêm ɓee-bò ke Ephèse. 18Loo ke ei reei ingei nin ɓá ɓaa, è ede de ede nè: – Unn gir kêm ndɔ ke desêin ke m’ile’n nja’m kêm ɓeekon ke Asie nga, sei geri pa njiye’m ke m’njiye’n se si se loo malang. 19M’ra kule ɓer m’ade Kuwe-ɓee se ngonn koje ke deri se mann non kum’t dann nyange ke nan-in man, se go kɔr ke Juipge ɔri nan tà dèm’t a tɔ. 20Sei geri mbak, man m’ɓɔyɔ se si dè nyan karé bè ke maje tede le si nga lé. M’ebe ra’m kɔrgir tà éké ndó sei nyan nata tàkum dooge’t ndái-ndái éké kêm keige’t nga lé a tɔ. 21M’ile mber m’ade Juipge se njé ke ei Juipge lé le kade ɔsi wan teli ke ra Nube’t a, undei kêm de dè Kuwe-ɓee’t le jéi Jésu nga a tɔ. 22An-in! m’ee dangai le Ndil-Kêmnda. Gar-gar m’a m’aw loo ke è ndige kɔr non’m kaw se’m tutu. Gir’n ke nè á ɗarinè m’ndi m’aw’n ke Jérusalem nal ger nyan ke à tee dèm’t tutu. 23Nè nyan karé ɓaa, Ndil-Kêmnda ede’m ndàt ede nè: Kêm ɓee-bòge karé-karé malang ke m’a m’aw tutu nga, sulge se nyantosowurge tooi nginei man. 24Ndikumgajer le’m dè nang nè nga, m’an ke nyan ke ngain le tɔse kum dè’t lé. Nè kɔr son ngɔde le’m se kule ke Kuwe-ɓee Jésu-Krist um jim’t á ke nyan ke uwe kêm’m. Kule ke Kuwe-ɓee um jim’t nga, è kule kile mber Tà ke Maje ke ɔje dè kêmnoje le Nube. 25An-in! sei malang ke ndɔ ke m’aw m’ile mber Konɓee le Nube dann si’t nga, ɗarinè m’ger titeke a an-in kum’m gugu lé ta. 26Gir’n ke nè á m’ede’n sei ndàt ɓila titeke tà yo doo karé bè géa dann si’t uwe dè’m lé. 27Kerɔte kuwe, m’ɓɔyɔ se si dè nyan karé bè lé, nè nyan malang ke Nube ɔje nga m’ede sei m’ade ooi mbak. 28Undei kumkunju dè ra si’t se dè bate kosge malang ke Ndil-Kêmnda unde sei ke njékan dè dege. Uli njékebe nange le Nube ke è ndogo de se mese’n ke kinge’n. 29Man m’ger mbak, loo ke m’a m’in kaw ɓaa, heng-ge ke tooi ɓel à uri dann si’t le sanrin bate kosge nè nga. 30Man m’ger mbak titeke dooge à in-in dann si sei’t le têti tà tchap-tchap ndɔri njétaakêm-Kristge go de’t. 31Gir’n ke nè á m’ede’n sei kade i ndii kum adi kêm si olé titeke m’ndeje sei karé-karé malang kada a, ndɔɔ a, se mann non kum’t m m’ebe ra’m lé a tɔ. 32Ɗarinè, m’um sei ji Nube’t a, m’um sei dann tà kêmnoje’t le’n a tɔ. Tà kêmnoje le Nube nga asekum ra se sei kade ingei nyange malang ke Nube uwe dè nja unde konn tede le njétaakêm-Kristge malang. 33M’aw ndoo nar-nda éké nar-ɔr éké kubu le doo karé lé. 34Sei kuwe i geri mbak titeke ji’m man kuwe á m’ra’n kule ɓita m’inge’n nyange ke man se njémade-loo-kawge le’m j’aw ndoo de. 35M’ndó sei titeke bè ɔje dè nyan malang, kade ulei ra si ndibe loo ra kule’t gar-gar tede le ra’n se njétɔg gotoge. Adi kêm si olé dè tàge’t ke Kuwe-ɓee Jésu kuwe tam ede nè: «Kunn nyan kade è ranel ngain dum taa nyan.» 36Loo ke Paul tam tàge nè nga bè ɓaa, è ɔse keje’n nang ɔje tà se Nube tede le de malang. 37Dé malang d’um non sut, d’ul nan kɔbe Paul’t a, d’uwe’n kàde de’t sêm a tɔ. 38Tam ke Paul tam ede nè d’a kan kum’n gugu lé ta nga, è tà karé ke ree se kumndoo ade de ngain. Nè né è bè géa, dé dann’n sár d’aw se’n tà bato’t.

will be added

X\