NYANRA NJEKAWKULEGE 2

1Loo ke ndɔ Pentecote ase deĵ ɓá ɓaa, njétaakêm-Kristge kebi nan loo karé. 2Ke loon’t nè kuwe ká nyan in danrán ɓar asenan se nel-bò bè ree taa kêm kei ke dé ndi tutu pel-pel. 3Ndon nyange ke taai nan se ndon por bè undei loo teei pitring-pitring kayai nan ndii dè de’t karé karé malang. 4Dé malang, Ndil-Kêmnda taa kêm de pel-pel ade d’unn gir tam tà tam dooge ke rang gai-gai se go tà ke Ndil ade de le kade dé tam. 5Kêm ndɔn’t nè nga, Juipge ke ilei koje dè Nube’t in-in dann dooge ke ei Juipge lé dè nang malang reei ndii kêm ɓee-bò ke Jérusalem. 6Loo ke doobulege ke kebi nan ooi ká nyan ke ɓar nè nga ɓaa, ei an-in nan som-som reei ndai dè nan’t girm. Nanan géa oo tà ke d’ede’n se tà koje’n-koje’n. 7Ndil de tee an-in soin-soin, tà ige de sêl ade d’ede nè: – An-in! dooge nè malang ke ndai à tami tà nè nga, ké ei dooge ke kêm ɓeekon ke Galilée nga lé wa? 8Ké gir’n è bain á jéi j’ooi tà karé-karé malang ke edi jéi se tà koje jéi, koje jéi wa? 9Njé ke nange dann jéi’t in-in kêm ɓeekon ke Parthes se Médie se Elam se njé ke in-in ɓeekon ke Mésopotamie se Judée se Cappadoce se Pont se Asie, 10se ɓeekon ke Phrygie se Pamphylie se Egypte se njé ke in-in kêl ɓeekon ke Libye kɔte Cyrène se njé ke ei mbage ke in-in Rome reei ndii nè a tɔ. 11Jèi ke nange jèi Juipge ke koje ɓee, njé nange ei Juipge telge, njé ke nange in-in kêm ɓee ke Crète se ɓeekon ke Arabie a tɔ. Nè né è bè géa, dooge nè nga ɔri gir nyanrage le Nube ke maje dum adi j’ooi se tà koje jéi, koje jéi. 12Ndil de tee an-in soin-soin malang ade dé tel ndi tchên. Njé ke nange deji nan tà edi nè: – Ké nyan nè nga gir’n è ri wa? 13Nè njé ke nange ke rang tulei mbe dè njétaakêm-Kristge edi nè: – Kɔr yibe nduu rusu kêm de njin-njin. 14Ke loon’t nè kuwe, Pierre ɔse nang in nda dɔ se njékawkulege ke dɔg-gidé-karé. E tam tà se ndu’n ke bòi ede doobulege ede nè: – Sei Juipge se dooge malang ke i reei mba kêm ɓee-bò ke Jérusalem nga, uri mbi si maje ooi tà le’m. 15Dooge nè nga è yibe á ra de titeke sei giri kêm si’t nga lé. Loo ke tò se ndɔgé ɓai nè kuwe yibe à ra doo titeke bain patch wa? 16Nè tà ke ndɔ ke Joel njèribe-dè-tà ke tà Nube’t tam kété nga aw loon’t deĵ. An-in! tàge le’n ke ndɔ ke tam: 17«Nube tam ede nè: ndɔ ke ngeinn’t ɓaa, m’a m’ade Ndil’m à yal nan dè dooge’t malang titeke bè á: ngann sige ke dingem se njé ke dinye à teli k’eei njékɔrgo tàge le’m man Nube; ngann basage le si à an-in nyanpinde ngatɔgege le si à an-in nyan nige a tɔ. 18Kerɔte kuwe, kêm ndɔn’t nè nga, m’a m’ade Ndil’m à yal nan dè ngann njéndige ke dingem se njé ke dinyege tede kade ribei dè tàge le’m. 19M’a m’ade nyange ke dum kum à teei kade danrán’t dɔ a, nyankɔbege à teei dè nang nè á tɔ: mese se ndon por a, se sà por undei loo teei a tɔ. 20Kàde à tel ndul ndin-ndin a, nan à tel mese a tɔ, kété ɓita ndɔ gangtà le Kuwe-ɓee à ree bai. Ndɔ nè nga, è ndɔ ndubra ke bò ngain. 21Nanan ke ɓar ri Kuwe-ɓee kêm ndɔn’t nè ɓaa, d’a d’aje’n.» Pierre tel tam ede nè: 22– Sei dooge ke Israel, i neli mbi si maje ooi tà ke m’a m’ede sei: Jésu ke Nazareth nga sei geri nin ɓá. E doo ke ndɔ ke Nube kuwe ule ji’n njung dènn’t ɔr’n unde’n se ninn’n gai. Nube ade ra nyankɔbege se nyange ke dum kum a, se nyan-tɔjege dann si’t ade i geri ɓá a tɔ. 23Doo nè nga, Nube ule’n ji si’t se go rebe ke ndɔ ɔje se go nyanger le’n kété mari ke desêin. Sei in-in se’n ke kété ulei ji dooge ke ei Juipge lé adi ɓeri nin kàde kage-ke-dese’t tɔli nin. 24Nè Nube ɔr Jésu ke Nazareth dann nyankêmkonge’t le yo ade unde loo tee dann njé ke koo’t. Titeke bè á yo asekum kuwe’n nang gan-gan se go tɔgmong le’n lé. 25Gir’n ke nè á, ndɔ ke David tam tà ɔje’n dè’n ede nè: «M’an Kuwe-ɓee nda nonm’t se ndɔge malang, è nda dè jikonm’t tede kade nyan karé géa à yei’m lé. 26Gir’n ke nè á ɓengre’m ndii’n dann ranel’t a, ndon’m géa ɔse’n pa ranel. Taɓai danra’m à taa kebe se kundekêm tchên a tɔ. 27Oiyo, i a kinye ngarankum ra’m ɓee le yo lé a, doo lei ke tò se ninn’n nga i a kinye’n kade jɔri pɔtɔk be-ɓade’t lé a tɔ. 28I ade m’ger kile rebege ke aw ke loo ndikumgajer’t. I a ade ranel rusu kêm’m ndɔ ke m’a m’nda tà kumi’t nga. 29Pierre tel tam ede nè: – Ngakonmge se kon nannemge, adi m’ede sei tà ke ɔje dè njèyo kà jéi David nga ndàt m’ade ooi. E wei ade ndɔ ke dé dubu’n. Dè ɓade’n tò dann jéi’t laa sár tee kêm ndɔ ke ɓila ɓai. 30Nè David nga kété è njèribe-dè-tà ke tà Nube’t. E ger titeke Nube mann ra’n ade’n kété ede nè: «M’a m’ɔr ngonnkài karé ke kêmi’t dann ngannkàige’t kade ndi kutu-ngar’t lei.» 31E ger kété mari titeke Krist à unde loo tee dann njé ke koo’t. Gir’n ke nè á, è tam’n kété ede nè: «Nube à inye Krist nga ɓee le yo ndan lé a, danran à jɔri pɔtɔk bè-ɓade’t lé a tɔ.» 32Jésu nè ke man m’ede sei tà le’n nga, Nube ade unde loo tee dann njé ke koo’t. Jéi malang j’ooi tà kunde loo tee le’n dann njé ke koo’t nga se mbi jéi. 33Nube unn ndu’n kété mari ede nè n’a n’ule se Ndil-Kêmnda kade dooge. Loo ke è unn Ngonn’n Krist mbeng ade aw ndi dɔ dè jikon’t ɓá ɓaa, è ade’n Ndil-Kêmnda nga. Taɓai Krist in ke kété ule se Ndil-Kêmnda nga ade yal nan dè jéi’t karé-karé malang. E nè nga, è nyan ke sei an-in se kum si a, ooi tà’n se mbi si ɗarinè ɓá ta. 34Kerɔte kuwe, David nga in aw danran lé ɓai, nè né è bè géa, è tam kété ede nè: «Kuwe-ɓee Nube ede Kuwe-ɓee le’m ede nè: I ree i ndi dè jikonm’t, 35sár le kade m’ade njébange lei teli ei nyan-sure-nja kum lei.» 36Pierre ede kosdoo-bulege ede nè: – Maje kade sei kosdooge ke Israel malang, i geri tà nè maje: Jésu nè ke sei ɓeri nin kàde kage-ke-dese’t nga, Nube tel ade è Kuwe-ɓee a, Krist a tɔ. 37Loo ke kosdooge ooi tàge nè bè ɓaa, ɓengre de ayé gang dɔs. Dé deje Pierre se njékawkulege ke rang d’ede nè: – Ngakon jége, ké j’à ra bain ta wa? 38Pierre ede de ede nè: – I turi hal si. Maje kade nanan géa dann si’t ade d’ule’n manné njonm se ri Jésu-Krist. Titeke bè á Nube a ade kêm’n à tin’n mbit dè kaiyage’t le si, le kade ade’n sei Ndil-Kêmnda. 39Ndɔ ke Nube unn ndu’n le kule se Ndil-Kêmnda kade ree taa kêm dooge pel-pel. Ndukunn nè nga ɔje dè si sei se ngann sige. Ndukunn nè nga ɔje dè dooge malang ke ɗarinè ndii ebe se Kuwe-ɓee Nube le jéi. 40Pierre ede de ede nè ndukunn nè nga ɔje dè dooge ke ndɔ ke rang Nube à ɓar de ɓai nga a tɔ. Pierre unn tàge ke rang bule ndeje’n de a, ule’n dingem kêm de’t a tɔ, ede nè: – Dooge ke ɗarinè ndii dè nang nè nga, ei njé ra nyan pás-pàsge. Utei ra si mbeng ra de’t kɔke ɓaa, a aji. 41Njé ke taai tà le Pierre umi dè madege’t ke kété ade d’ule de manné njonm nga, kɔr de in dè made’t ase aru dɔg loo mute kêm ndɔn’t nè. 42Njétaakêm-Kristge malang uri mbi de tchên ooi tàge ke dé ndó de se ndɔ karé-karé. D’um nan’t bɔk tite ngakon nange se kon nannge bè. D’on mur nan’t a, d’ɔje tà se Nube nan’t a tɔ. 43Njékawkulege rai nyange ke dum kum se nyankɔbege ngain. Dooge malang ɓeli ndil de. 44Njétaakêm-Kristge rai ɓee loo karé a, umi nyange le de malang nan’t loo karé a tɔ. 45D’ige looge le de se nyan-majege le de ɓaa, dé kaiya nan nar’n se go nyange ke d’aw ndoo’n. 46D’um kêm de nan’t karé a, dé ree kêm kei le Nube se ndɔ de, ndɔ de a, d’use mapa se nan kêm keige’t le de se ranel a, se kêmnda káng a tɔ. 47Dé pite Nube a, dé taa kum dooge ɗekm a tɔ. Njé ke ingei kaje nga, Kuwe-ɓee ade kɔr de in dè made’t se ndɔge malang dann njékebe nange’t le Nube.

will be added

X\