NYANRA NJEKAWKULEGE 19

1Loo ke Apollos nain kêm ɓee-bò ke Corinthe ɓai ɓaa, Paul unde kêm ɓeekon ke kàde mbalge’t se njà’n dɔ gang aw kêm ɓee-bò ke Ephèse. E inge pajage le Jean ke njèkule dooge manné njonm. E deje de ede nè: 2– Loo ke ndɔ ke undei kêm si dè Nube’t nga, ké ingei Ndil-Kêmnda kuwe wa? Pajage le Jean ilei Paul dè’t edi nè: – Tà le ndi tutu le Ndil-Kêmnda nga, ndɔ karé bè géa j’oo lé. 3Paul tel deje de ede nè: – A ɓaa, kule manné njonm le nan á d’ule sei tutu ta wa? Dé nè nga d’ile’n dè’t d’ede nè: – Kule manné njonm le Jean á d’ule jè tutu. 4Nè Paul ede nè: – Kule dooge manné njonm ke ɔje dè tur hal á è nyan ke ndɔ ke Jean ra. E ede kosdooge le kade undei kêm de dè è ke à ree goon’t. E ke à ree go Jean’t nga è Jésu. 5Loo ke d’oo tà nè bè ɓaa, d’ade d’ule manné njonm se ri Kuwe-ɓee Jésu. 6Paul ile ji’n dè de’t ɓaa, Ndil-Kêmnda ree dè de’t. D’unn gir tam tà tam dooge gai-gai a, dé ribe dè tàge ke in tà Nube’t a tɔ. 7Dé malang d’ase dingemge dɔg-gidé-joo. 8Paul aw kêm kei kebe nan’t ede de tà se kêmnda káng. E ɔje se de tà ase nan mute ade kum Juipge gang dè Konɓee’t le Nube. 9Nè njé ke nange ei njékêmnderge se njé kunn mbi dè tàge’t. Ei tami tà ke majelé dè rebe’t le Kuwe-ɓee tàkum doobulege’t. Paul ɔr ra’n ra de’t kɔke ɓaa, è ɔr kum njétaakêm-Kristge gai ɔje de tà se ndɔ karé-karé kêm kei ndó nyan’t le Tiranus. 10E ra titeke bè ase ɓal joo ade dooge malang ke ndii kêm ɓeekon ke Asie, Juipge se njé ke ei Juipge lé ooi tà le Kuwe-ɓee. 11Nube ade Paul ra nyankɔbege ke deri se ji’n. 12Dooge awi sár otoi tà kubuge se kubuge ke kule ra’t reei ɔdi ra Paul ɓita awi ilei dè njératurge’t ɓai. Titeke bè á raturge ɔri dè de’t a, ndilge ke majelé undei loo teei kêm de’t kɔke a tɔ. 13Nè Juipge ke nange ke njé rɔ ndilge ke majelé kêm dooge’t in-in awi se loo-loo ke le de tɔ. Ei kuwe in-in se dè de ɓari ri Kuwe-ɓee Jésu le rɔ’n ndilge ke majelé kêm dooge’t edi nè: – Man m’unn ndu’m m’ade sei se ri Jésu ke Paul ile mber tà le’n. 14Njé ke ji sejimute ke njé ra nyange nè nga ei ngann le Juip karé bè ke ri’n nè Scéva. Scéva nga è maw njèkuje nyan-mese karé dann njékuje nyan-mesege’t. 15Nè ndɔ karé bè, ndil ke majelé ede ngann le scéva ede nè: – Jésu ɓaa, m’ger’n mbak, Paul géa m’ger’n a tɔ. Nè ké sei sei nange wa? 16Doo ke ndil ke majelé tò kêmn’t nga al bal oso se de sandak uwe de gudu de ngoin-ngoin malang a, ade de dò a tɔ. D’unde loo kêm kei nè dé tee d’an-in nan yɔl-yɔl mbur de suturu. 17Dooge malang ke ndii kêm ɓee-bò ke Ephèse, Juipge se njé ke ei Juipge lé geri nyan ke tee nè nga. Ɓel unde de ndàt gang de malang ade ilei riɓar dè ri Kuwe-ɓee Jésu’t. 18Dooge ngain dann njétaakêm-Kristge reei ɔri gir nyanra dege ke majelé ke nata. 19Dooge bule dann njé ra nyan mbelige reei se magtub ra mbelige le de ɓei dè nan’t loo karé rói rák-rák tàkum dooge’t nata ndái-ndái. Dé mbɔje nar magtubge nè nga ɓaa, d’inge asekum nar-nda aru dɔg loo kɔr-mige bè. 20Titeke bè á tà le Kuwe-ɓee ra’n tɔg ke kété-kété a, taa’n loo pel-pel a tɔ, takul tɔgmong le Kuwe-ɓee. 21Loo ke gir nyange nè gang ɓá ɓaa, Paul ɔje kêmn’t le kunde kêm ɓeekon ke Macédoine se Achaie se nja’n dɔ gang tede le kaw kêm ɓee-bò ke Jérusalem. E tam ede nè: – Loo ke m’a m’tee nú ɓaa, gar-gar m’a m’aw kan ɓee-bò ke Rome se kum’m. 22Paul ule njé ra sennge joo, Timothée se Eraste ade awi kêm ɓeekon ke Macédoine; nè è ɓaa tel ndi kêm ɓeekon ke Asie ade kò’n tò mbɔr. 23Kêm ndɔge’t nè nga, tà ke bò asetam oso ade dooge awi de nan’t ngater-ngater ɔje dè tà le Kuwe-ɓee Jésu. 24Kɔde nim ninge karé ri’n nè Démétrius. E leen nar-nda ra’n keige le mage ke dinye ke ri’n nè Artémis. Démétrius inge nyange ndaj-ndaj ade kɔde nim nyange. 25E ɔse nja njé ra kule leen nyange se kɔde madennge ke rang nan’t ede de ede nè: – Sei geri mbak tite ke nyanbaw le jéi tò ɔje dè kule nè nga. 26Nyan ke Paul ra nga, sei an-in se kum si a, ooi tà’n se mbi si a tɔ. E kêm ɓee-bò ke Ephèse nè á se kar’n lé, nè nain ngɔr kade è ɓeekon ke Asie bere mbak kuwe Paul nè nga um tà kêm doobulege’t ase tà’t ade teli ei lennge. Taɓai è tam titeke magege ke dooge rai de se ji de nga, ei magege lé. 27Tuju ke à oso nga à ɔje dè kule le jéi á se kar’n lé. Nè kei ke bò le mage ke dinye ke ri’n nè Artémis nga géa à tel k’ee nyan ke raikarè. Taɓai riɓar le’n ke oso se loo mbit-mbit ade dooge ke kêm ɓeekon ke Asie se dè nang ndi dooge bere mbak ilei koje dènn’t nga à ɔse ngei ngai a tɔ. 28Loo ke dooge ooi tàge nè nga bè ɓaa, wong rusu kêm de njin-njin ade rai nyan beng-beng edi nè: – Artémis le dooge ke kêm ɓee-bò ke Ephèse nga, è ke bò! 29Dooge malang ke kêm ɓee-bò’t nè awi dè nan’t ngater-ngater, an-in ɗiriri reei loo ra nyan-tɔjege’t. D’uwe njémade-loo-kawge le Paul, Gaius se Aristarque dé ndɔr de ngander-ngander dé ree se de loo ra nyan-tɔjege’t nè nga. Gaius se Aristarque nga, ei dooge ke ɓeekon ke Macédoine. 30Paul ndige kal garang ree dann kosdooge’t nè nga, nè njétaakêm-Kristge á ɔgi nin. 31Dooge ke nange kêm ɓeekon ke Asie ke ei made Paulge ulei rann’t gɔri nin le kade aw loo nyan-tɔjege’t nè nga lé, nè bainléa à inge tuju. 32Dooge rai nyan wuu-wuu táai mbur nan yo ke nè tede dooge ke njékebe nange awi dè nan’t ngater-ngater ade njé ke nange ngain dann de’t geri gir nyan ke kebi nan tede nga lé. 33Juipge ɔsi Alexandre balang-balang ade unde loo tee dann doobulege’t nè nga. Doobulege ileii non de’t kété umi nan goon’t. Alexandre yei ji’n: è ndige tam tà dè rann’t tàkum doobulege’t nè nga. 34Nè loo ke dé ger titeke è Juip ɓaa, dé malang d’unde ndu de nan’t dé ra nyan wuu-wuu ase ngire kàde jooge bè d’ede nè: – Artémis le njé ke kêm ɓee-bò ke Ephèse nga, è ke bò! 35Nè né è bè géa, njèndang magtub le ɓee-bò ke Ephèse ree ngɔr ra doobulege’t ede nè: – Sei dooge ke kêm ɓee ke Ephèse, ké doo ke ra á nal ger titeke ɓee-bò ke Ephèse è njè ngonm kei le Artémis ke dinye ke bò nga wa? Ké nan nal ger titeke ɓee-bò ke Ephèse nè nga è kum gute tà kei le Artémis ke in danrán oso wa? 36Bè ɓaa, loo naje dè nyange nè goto ta. Nè gar-gar ilei kêm si m in-in kalang i rai nyan lé. 37Tede dooge nè ke sei i reei se de nga, ei rai nyan ke tò yêr se mage le jéi ke dinye nè lé a, tajii lé a tɔ. 38Ke nè á Démétrius se njé ra se’n kulege awi se doo karé se tà ɓaa, è tà le kade awi se tà nè loo gangtà’t nata tede njékonɓeege ndii tutu. Maje kade dé sêke nan ra de’t tite kêm de ndige. 39Taɓai ke nè á sei awi se tàge ke rang le nderi gir ɓai ɓaa, d’a gang rebe’n kade sei loo kebe nan’t ke ndukunn ɔje. 40Ke nè á d’ile tà ke ɔje dè sule dooge dè njékonɓeege’t dè jéi’t, ɔje dè gir kebe nan le jéi ke ɓila nè ɓaa, j’asikum kingei tà karé bè le tam kedi de lé. 41Loo ke njèndang magtub nè tam tàge nè bè ɓaa, è inye njékebe nange ade gangi nan kɔke.

will be added

X\