NYANRA NJEKAWKULEGE 18

1Go’t gugu ɓaa, Paul in kêm ɓee-bò ke Athènes aw kêm ɓee-bò ke Corinthe. 2Kêm ɓee’t nè nga, Paul inge Juip karé bè ri’n nè Aquilas, ɓee koje’n è Pont. Aquilas se neen’n Priscille in-in kêm ɓeekon ke Italie reei ngɔr ɓai, tede Claude unn ndu’n le kade Juipge malang undei loo teei kɔke kêm ɓee-bò ke Rome. Paul aw ra de’t um se de nan’t bɔk. 3Paul aw inge Aquilas se neen’n ndi se de tede ei kɔde kojo kei kubu madennge. 4Se ndɔ taa kebe karé-karé malang, Paul aw ɔje tà se njé ei Juipge se njé ke ei Juipge lé a tɔ, kêm kei kebe nan’t. E sang le kade kum de gang dè tà’t le Nube. 5Loo ke Silas se Timothée in-in kêm ɓeekon ke Macédoine reei ɓá ɓaa, Paul tel orè kum’n dè kɔrgirtà’t le Nube kuwe deri. E ede Juipge ndàt titeke Jésu nga è Krist kuwe. 6Nè loo ke Juipge utei tà le Paul mbeng a, taji nin a tɔ ɓaa, è yei kubuge le’n yák-yák ede de ede nè: – Maje kade mese si oso dè si sei’t kuwe! Man ɓaa, tà le mese si à uwe dè’m lé. Unn gir ɗarinè, m’a m’tel ra’m ke ra dooge ke geri Nube lé’t ta. 7Paul in loo’t nè aw kêm kei le doo karé bè ke ri’n nè Titus Justus. Doo nè nga è njè kile koje dè Nube’t. Kei le’n tò kɔte nan’t se kei kebe nan. 8Nè né è bè géa, Crispus ngar dè kei kebe nan se njé ke kêm kei le’n bere mbak undei kêm de dè Kuwe-ɓee’t. Dooge ngain ke kêm ɓee-bò ke Corinthe ke uri mbi de ooi tà le Paul nga teli njétaakêm-Kristge ade d’ule de manné njonm. 9Ndɔ karé bè, Kuwe-ɓee ede Paul dann ndɔɔ se nyanpinde ede nè: – I tam tà kumi ke kété-kété m i ɓel lé! 10M’a m’ee der giri, doo karé bè géa à kuwei rai majelé lé, tede m’aw se kosdooge le’m ke bulei ɗik-ɗik kêm ɓee-bò’t nè nga. 11Paul ndi se de kêm ɓee-bò ke Corinthe ɓal karé se nan mute-mute ndó dooge malang tà le Nube. 12Loo ke Gallion ee’n njèkonɓee ke ɓeekon ke Achaie nga, Juipge umi tà le de nan’t karé in-in uwei Paul awi se’n loo gangtà’t edi nè: 13– Doo nè nga sule dooge ade ilei koje dè Nube’t se go rebe ke tò gai se le gute-ndu. 14Loo ke Paul ayé tam tà ɓaa, Gallion ede Juipge ede nè: – Hai! Juipge, ke nè á è tà ke ɔje dè nyanra ke se dè naje’n lé éké nyanra ke majelé ɓá ɓaa, né m’a m’ur mbi’m koo’n tà sêke le si. 15Nè ke nè á è tà ke nange ke ɔje dè naje nan tàge karè éké ɔje dè rige éké ɔje dè gute-ndu le si ɓaa, sei kuwe an-in tà le si. Man m’ndige le k’ee njègangtà de tàge ke titeke bè nga lé. 16Gallion rɔ Juipge kɔke loo gangtà’t. 17Juipge malang uwei Sosthène, ngar dè kei kebe nan, ei tundei nin loo gangtà’t nè nga. Nè usu Gallion nyan karé géa lé. 18Paul tel ndi kêm ɓee-bò ke Corinthe ase tà’t. Go’t gugu, è inye njétaakêm-Kristge, è al kêm bato’t tel aw ɓeekon ke Syrie. Priscille se Aquilas géa awi se’n nan’t tɔ. Paul ade dé ndise dè’n nda kêm ɓee ke Cenchrées tede ndu’n ke ndɔ ke è unn. 19Loo ke ei reei risi nanga kêm ɓee-bò ke Ephèse ɓaa, Paul inye njémade-loo-kawge le’n. E aw kêm kei kebe nan’t ɔje tà se Juipge. 20Ei nè nga deji nin le kade ndi se de mbɔr ɓita, nè è ndige lé. 21E ube de inye de, ede de ede nè: – Ke nè á Nube ndige ɓaa, m’a tel ree ra si’t ɓai. Paul al kêm bato’t aw kêm ɓee-bò ke Ephèse. 22E ree rise nanga kêm ɓee-bò ke Césarée. E aw ra lapya njékebe nange le Nube ke kêm ɓee-bò ke Jérusalem ɓita in aw kêm ɓee-bò ke Antioche ɓai. 23Paul ndi kêm ɓee-bò ke Antioche mbɔr ɓita in aw se loo-loo kêm ɓeekonge ke Galatie se Phrygie, è ule dingem kêm njétaakêm-Kristge’t malang. 24Dingem karé bè è Juip ri’n nè Apollos, ɓee koje’n è Alexandrie, ree kêm ɓee-bò ke Ephèse tɔ. Dingem nè nga è doo ke ger tam tà ngain a, ger magtubge le Nube ngain a tɔ. 25E doo ke dé ndó’n rebe le Kuwe-ɓee d’ade ger maje. E doo ke tàgir le’n ndi kum. Apollos ile mber a, ndó dooge nyan ke ɔje dè Jésu se ngang’n bêrêr-bêrêr. Nè mber kile le Jean ke njèkule dooge manné njonm kuwe karé á ger. 26E unn gir kile mber kêm kei kebe nan’t se kêmnda káng. Nè loo ke Aquilas se Priscille ooi tà le’n bè ɓaa, ei uwei nin ke ra de’t ɔri gir tà le Nube se ngang’n bêrêr-bêrêr adi oo maje dum ke kété. 27Titeke ke Apollos ɔje njáng le kaw kêm ɓeekon ke Achaie nga ɓaa, njétaakêm-Kristge ulei dingem kêmn’t le kade aw. Gir’n ke nè á ei ndangi magtub adi njétaakêm-Kristge ke Achaie le kade uwei Apollos ke ra de’t. Loo ke è tee nú ɓá ɓaa, Nube uwe se’n noje ade tel è kage-gete njétaakêm-Kristge. 28E ɔr lanm tà Juipge’t nata ndái-ndái. E tɔje de se go tà ke tò kêm Magtub’t le Nube tite Jésu è Krist nga kuwe.

will be added

X\