NYANRA NJEKAWKULEGE 17

1Paul se Silas undei kêm ɓee-bò ke Amphipolis se Appolonie gangi reei kêm ɓee-bò ke Thessalonique. Kei kebe nan le Juipge tò kêm ɓee-bò ke Thessalonique. 2Paul aw inge Juipge kêm kei kebe nan’t titeke è ra’n kété-kété. E ndi se de kei kebe nan’t bè-bè ase nja mute, è naje se de tà dè magtubge ke tooi se ninn de. 3E ɔrgir unde non de’t tite ke Krist nga gar-gar nyankêmkon à ra’n a, à unde loo tee dann njé ke koo’t gar-gar a tɔ. Paul ede de ede nè: – Jésu-Krist ke man m’ede sei tà le’n nè nga, è kuwe á è Krist. 4Njé ke nange dann Juipge’t ke kum de gang dè tà’t nè nga teli umi go Paul se Silas bɔk. Kos Grecge ke ilei koje dè Nube’t se dinyege ke njényan-kingege se konmolége ngain géa teli umi go Paul se Silas a tɔ. 5Nè jang ra Juipge ade ɔri dooge ke njékile dɔ se njékêmyêr ke nange umi de go de’t ade sulei dooge. Ei rai titeke bè adi tà oso’n ade dookêmɓeege awi dè nan’t kutri. Go’t gugu, ei in-in awi kêm kei le Jason sangi Paul se Silas tede le kaw se de non kosdooge’t nata. 6Loo ke d’inge de lé ɓaa, d’uwe Jason se njétaakêm-Kristge ke nange. Dé ndɔr de ngander-ngander d’aw se de non njégangtàge ke kêm ɓee-bò’t nè nga. Taɓai dé tam tà se ndu de ke bòi beng d’ede nè: – Dooge ke njé bungul loo dè nang nè bere mbak nga, ɗarinè teei laa tɔ ta. 7Dooge nè malang ei njé kute ndukunnge le César, ngar ke bò nga mbeng. Taɓai dooge nè nga tami edi nè ngar karé ke rang ke ri’n nè Jésu ndi tutu non ɓai. Nè Jason uwe de ke rann’t. 8Loo ke doobulege se njégangtàge ke kêm ɓee-bò’t nè ooi tàge nè nga bè ɓaa, ei awi dè nan’t kutri. 9Nè njégangtàge adi Jason se njétaakêm-Kristge ugei nar ase tà’t ɓita inyei de dɔ ɓai. 10Ke loon’t nè kuwe, njétaakêm-Kristge ulei se Paul se Silas ndɔɔ kêm ɓee-bò ke Bérée. Loo ke Paul se Silas teei nú ɓaa, ei awi kêm kei kebe nan’t le Juipge. 11Juipge ke Bérée nga uwei Paul se Silas ke ra de’t maje dum njé ke kêm ɓee-bò ke Thessalonique. Dé taa Tà ke Maje kalang, nè se ndɔ karé-karé dé nder gir tà ke kêm magtubge’t le Nube le kan, ké tàge ke Paul ede nga è titeke bè kuwe wa? 12Dooge ngain dann de’t teli njétaakêm-Kristge. Dinyege ke ei njényan-kingege se konmolége a, se dingemge ase tà’t teli njétaakêm-Kristge tɔ. 13Nè loo ke Juipge ke Thessalonique ooi tite ke Paul ile mber tà le Nube kêm ɓee ke Bérée tɔ ɓaa, ei reei sulei dooge. Juipge rai titeke bè adi kos dookêmɓeege awi dè nan’t kutri taɓai. 14Ke loon’t nè kuwe, njétaakêm-Kristge ulei se Paul ade aw kum’n se ke tà ba-bò kate’t, nè Silas se Timothée á nain-in kêm ɓee ke Bérée. 15Njé ke danni Paul nga awi se’n sár kêm ɓee-bò ke Athènes ɓita ɔsi teli ɓai. Paul unn ndu’n ade de kade d’aw d’ede Silas se Timothée kade reei kalang ingei nin kêm ɓee-bò ke Athènes. 16Loo ke Paul ndi à ngine Silas se Timothée kêm ɓee-bò ke Athènes nga ɓaa, è an magege taai kêm ɓee-bò nè nga pel-pel. Gir’n ke nè á wong ra’n ade kêm’n aw biriri-biriri. 17E ɔje tà se Juipge se njé ke ei Juipge lé ke ilei koje dè Nube’t kêm kei kebe nan’t. Se ndɔge malang, è ɔje tà se dooge ke inge de ndá-loo’t karè a tɔ. 18Baw nyangerge ke nange ke ei njé ndó nyange le Epicure se Zénon ɔji tà se Paul. Njé ke karége tami edi nè: – Ké tà ri á hel kêm-ngarr nè ndige tam wa? Njé ke rang tami edi nè: – J’an titeke doo nè nga è njè kile mber le Nube ke mbage. Dé tam bè tede Paul ile mber Tà ke maje le Jésu a, se tà kunde loo tee le’n dann njé ke koo’t a tɔ. 19D’uwe Paul d’aw se’n dè mbal ke dé ɓar’n «Aéropage», dé deje’n d’ede nè: – Nyan-ndó ke kige ke i tam tà’n nè nga, ké asekum kɔrgir kade j’oo lé wa? 20Nyange ke i tee se tà’n ade j’oo nè nga, è tà ke gai ke ra jè ɓel. Jè ndige le ger gir tà nè nga njai ɗarinè. 21Dooge ke kêm ɓee-bò ke Athènes se mbage malang ke ndii dann de’t nga, kule ra de ke rang goto. Nè kɔr ser nyange a, kur mbi tchên koo’n ser nyange ke teei a tɔ á è kule ra de se ndɔge malang. 22Paul in nda dɔ dè mbal ke ri’n nè «Aéropage» ede tà ede nè: – Sei dooge ke i ndii kêm ɓee-bò ke Athènes, dann nyange’t malang nga m’an titeke sei sei dooge ke i manmi Nube ngain dum dooge ke rang malang. 23Kerɔte kuwe, loo ke m’a m’dere kêm ɓee-bò’t le si nga, m’ter nyange ke sei i ɗɔyi de nga ɓaa, m’tee dè ɗinger loo nyankuje-mese karé ke dé ndang nyan dè’t d’ede nè: «Nube ke doo ger’n lé.» E Nube ke sei i ɗɔyi nin nal ger’n nè nga kuwe á m’ree le kede sei tà le’n ɗarinè. 24Nube ke njè ra nang se nyange malang ke tooi tutu nga, è kuwe è Kuwe-ɓee ke danrán se nang nè a tɔ. E ndi kêm kei ke tò se ninn’n ke ji doo á ra lé. 25Nube aw ndoo kade ji dooge tá ra nyan ade’n lé, tede nyan karé géa nal’n lé. Nè è ade dooge bere mbak ndikumgajer a, kebe ke taai a, se gute nyange malang ke awi ndoo’n a tɔ. 26Girkoje doo karé bere luk-luk kuwe á Nube unde’n girkoje kosdooge malang ke ndii dè nang nè bere mbak. E ɔje kurloo se ninn loo ndi de ade de a tɔ. 27Nube ra titeke bè le kade dooge sangi nin a, manmi nin mêm-mêm ingei nin a tɔ. E nga ndi heb se doo karé dann jéi’t lé. 28Kerɔte kuwe, «takul’n è á jè ndii’n kumgajer, jè yei’n ra jéi a, jè ndii’n tutu ɓai a tɔ.» Njé nder gir kumkunjuge le si ke nange tami kété edi nè: «Jè géa jè girkà le’n kuwe tɔ.» 29Titeke jè girkà le Nube nga, gar-gar jè gir kêm jé’t j’ede nè: Nube tò asenan se nar-ɔr éké nar-nda éké her ke dé tɔl de se gos ger tɔl nyan a, se go tàgir le dooge nga bè lé. 30Nyanra dooge kêm ndɔge ke kété mari ke geri Nube lé ɓai nga, Nube unn kum’n mbeng dè’t kɔke. Nè ɗarinè è unn ndu’n ade dooge malang se loo malang kade turi hal de. 31E ɔje ndɔ karé ke le gang’n tà se dè naje’n dè dooge malang ke ndii dè nang nè. Nube ɔr doo karé unde’n ke njègangtà ɓá. Doo nè nga, Nube ade unde loo tee dann njé ke koo’t tede kade dooge malang undei kêm de dènn’t. 32Nè loo ke baw nyangerge ooi tà ke ɔje dè kunde loo tee dann njé ke koo’t ɓaa, njé ke karége tulei mbe dè Paul’t. Njé ke rang ke nange tami edi nè: – Ndɔ ke rang ɓita j’à tel koo tà lei ke ɔje dè tà nè ɓai. 33Titeke bè á Paul unde loo tee dann de’t aw. 34Nè né è bè géa, njé ke nange teli osoi girn’t a, undei kêm de dè Nube’t a tɔ. Denys se Damaris dinye karé bè a, se njé ke rang-ge bule teli ei njétaakêm-Kristge dann dooge ke osoi gir Paul’t nga. Denys nga è è ke karé dann balkum dooge ke njé kan dè loo ke dé ɓar’n «Aéropage.»

will be added

X\