NYANRA NJEKAWKULEGE 16

1Paul ree tee kêm ɓee-bòge ke Derbe se Lystre. An! njètaakêm-Krist karè bè ri’n nè Timothée ndi kêm ɓee-bò ke Lystre. E ngonn le dinye karé ke è Juip ke njètaakêm-Krist. Nè Timothée nga, bɔ’n è Grec. 2Njétaakêm-Kristge ke ndii kêm ɓeege ke Lystre se Icone nga ɔri go tà le’n maje. 3Paul ndige le kade Timothée aw se’n. E ɔr’n aw se’n uje tà mɔte’n, tede Juipge malang ke ndii kêm ɓeege’t nè nga geri titeke bɔ Timothée è Grec. 4Paul se Silas ɔri gir ndukunnge le njékawkulege se ngatɔgege ke unni kêm ɓee-bò ke Jérusalem. Ei ɔri gir ndukunnge nè nga adi njétaakêm-Kristge se kêm ɓee-bòge malang ke desi tutu le kade an-in dè sêw-sêw. 5Njékebe nange le Nube rai tɔge dè kundekêm’t le de a, kɔr de in dè made’t ke kété-kété se ndɔge malang a tɔ. 6Paul se Silas undei kêm ɓeekonge ke Phrygie se Galatie gangi se nja de dɔ tede Ndil-Kêmnda ɔge de kile mber tà le Nube kêm ɓeekon ke Asie. 7Paul se Silas unni tà rebe undei rang ade reei ngɔr se ɓeekon ke Mysie. Ei nan-in le kawi kêm ɓee ke Bithynie, nè Ndil Jésu inye loo ade de lé kuwe ɓai. 8D’an bè ɓaa, d’unde kêm ɓeekon ke Mysie dé gang dɔ d’aw. Dé rise nang kêm ɓee-bò ke Troas. 9Loo ke dé tò ndɔɔ ɓaa, nyanpinde Paul ade an dingem karé ke ɓeekon ke Macédoine. Doo ke Paul an’n nga, nda se nja’n dɔ. Doo nè nga ra ndoo rann’t ede nè: – Al garang ke kêm ɓeekon ke Macédoine i din jè. 10Go nyanpinde’t nè nga, j’in ke loon’t nè kuwe jè sang le kaw Macédoine. Jè j’an titeke è Nube kuwe á ɓar jè kade j’aw j’ile mber Tà ke Maje j’ade dooge ke kêm ɓeekon ke Macédoine nè nga. 11J’in kêm ɓee-bò ke Troas, j’al kêm bato’t j’aw jáa kum jé ke dè goré loo ke Samothrace. Barè lookar’n ɓaa, jè tee kêm ɓee ke Néapolis. 12J’in loon’t nè j’aw kêm ɓee-bò ke Philippes; è ɓee-bò ke desêin le ɓeekon ke Macédoine. Nè njékonɓeege ke Rome taai ndii dè’t. Jè ndi kêm ɓee-bò’t nè nga ase tà’t. 13J’unde loo jè tee nata kêm ɓee’t se ndɔ taa kebe, j’aw kum jé ke tà ba’t. Jè gir kêm jé’t kété j’ede nè bainléa j’à j’inge loo karé ke deri le kɔje’n tà se Nube tà ba’t nè nga. Nyan ra maje ade j’inge mate dinyege ke ndii à kebi nan loo’t nè nga tɔ. Jè tel jè ndi nang j’ede de tà. 14Dinye karé dann de’t ri’n nè Lydie, è njè ra gate. Dinye nè nga in kêm ɓee le’n ke ri’n nè Thyatire á ree ndi kêm ɓee-bò ke Philippes ige kubuge ke ker perm-perm. Dinye nè è njè ɓel Ndil Nube. Lydie ndi ur mbi’n ke ra jé’t. Gir’n ke nè á Kuwe-ɓee teen’n ngarankêm’n ade ur’n mbi’n ngaw njêt oo’n tàge ke Paul à tam. 15Loo ke d’ule Lydie manné njonm se njékêmkeige le’n ɓá ɓaa, è ɓar jè ede nè: – Ke nè á an-in man ke njètaakêm-Krist kerɔte ɓaa, i reei awi se’m ɓéee i ndii se’m ndêin ɓita. E aw se jé kabr-kabr ade j’aw se’n kêm kei le’n. 16Ndɔ karé bè j’aw ke loo kɔje tà se Nube’t. Ngonn njèndi ke dinye karé in tile kum jé. Ngonn ke dinye nè nga ndil li-ngar tò kêmn’t ade sa inge’n nyan ndaj-ndaj ade kuwenge. 17Ngonn ke dinye nè nga tɔse ngire gande jé se Paul ndêng-ndêng. E ra nyan go jé’t kaláng-kaláng ede nè: – Dooge nè nga ei ɓer kulege le Nube ke njèndi sêm danrán’t. Ei reei ilei mber rebe kaje adi sei. 18E ra titeke bè kum’n ke kété-kété ase ndɔ bule. Wong ra Paul ade tel tur ra’n dè ndil ke majelé’t ke tò kêm ngonn ke dinye’t nè nga, ede’n ede nè: – M’unn ndu’m se ri Jésu-Krist m’adi, unde loo i tee kêm ngonn ke dinye’t nè kɔke. Kêm kàdenn’t nè kuwe, ndil ke majelé nga unde loo tee. 19Nè loo ke kuwe ngonn ke dinye ke sa nè nga an-in titeke dè nyankinge le de à ɔse ngei ɓaa, ei uwei Paul se Silas ndɔri de awi se de ndá-loo’t non njékonɓeege’t. 20Njékonɓeege in-in se de ke kété awi se de ra njékan dè njérɔge edi de edi nè: – Dooge nè nga ei Juipge, nè bunguli loo kêm ɓee-bò’t le jé ngain. 21Tá è ke nè á karé lé, nè dooge nè nga ilei mber nyangirkàge le de adi jè ke kêm ɓeekon ke Rome. Nyangirkàge nè nga ndukunnge le jéi ɔgi jè le taa éké le ra de se ndɔ jé-ndɔ jé. 22Doobulege géa in-in se Paul se Silas ke le de tɔ. Njékan dè njérɔge adi dé tɔr kubuge ra Paul se Silas kɔke ɓita unni ndu de adi d’unde de se ndêin maru. 23Loo ke d’unde de dé gang ra de dàp-dàp ɓá ɓaa, d’aw se de d’um de dangai’t. Njékan dè njérɔge unni ndu de adi njè ngonm tà kei dangai le kade ngonm de tchên. 24Loo ke njèkan dè kei dangai inge ndukunn titeke bè ɓaa, è aw se Paul se Silas um de dangai’t gile kei’t. Go’t gugu, è tile kage nja de’t. 25Dann ndɔɔ bɔp ɓaa, Paul se Silas ɔji tà se Nube’t a, ɔsi pa ulei ndubra dènn’t a tɔ. Dangai made dege uri mbi de ooi ndu de. 26Loo ke tà nain tà dè’t ɓai ɓaa, nang yei ɓuk-ɓuk ade gir kei dangai ule yirk-yirk. Ke loon’t nè kuwe, tàbitkeige bere mbak teein se dè ra de a, kage ke nja dangaige’t malang jɔrè nang yɔgrɔm a tɔ. 27Loo ke njè ngonm tà kei dangai in-in gir ɓi’t ɓaa, è an titeke tà kei dangaige malang tooi wei. E ɔr kuye kaskar le’n lêw le tɔl’n ra’n, tede è gir kêmn’t titeke dangaige teei an-in nan wont ta. 28Nè Paul tam tà se ndu’n ke bòi beng ede nè: – I tɔl rai lé, jè malang jè nda laa ɓai. 29Njè ngonm tà kei dangai deje por aw’n kalang go dangaige’t kei. E ndebe nginn-nginn oso nang non Paul se Silas. 30E tee se de nata ɓaa, è deje de ede nè: – Ngarge le’m, ké ri á m’a m’ra gar-gar le kinge’n kaje wa? 31Paul se Silas ilei nin dè’t edi nè: – Unde kêmi dè Kuwe-ɓee Jésu’t ɓaa, d’a d’aji i se njénojege lei. 32Paul se Silas edi njè ngonm tà kei dangai se njénojege le’n malang tà le Kuwe-ɓee. 33Kêm kàdenn’t dann ndɔɔ bɔp nè kuwe, è ɔr Paul se Silas aw se de togo tà dòge le de. Ke loon’t nè kuwe, d’ule’n è se njénojege le’n malang manné njonm. 34Nè njè ngonm tà dangai ade Paul se Silas awi se’n ɓéee le’n ra de mba. E se njénojege le’n malang rai ranel tede kêm de ke undei dè Nube’t. 35Barè lookar’n se ndɔgé ɓaa, njékonɓeege ulei njékan dè njérɔge adi edi njè ngonm tà kei dangai edi nè: – Inye dooge nè nga dɔ ade awi. 36Njè ngonm tà kei dangai ree ede Paul tà nè nga ede nè: – Njékonɓeege ulei kade m’inye sei dɔ. I teei awi se kêmlom ɗarinè. 37Nè Paul ede njékan dè njérɔge ke d’ule de ede nè: – Jè nga, jè dooge ke ɓeekon ke Rome, nè d’ade i tundei jè i gangi ra jé dàp-dàp se ndêin maru tàkum dooge’t malang anje gangtà dè jé’t. Taɓai d’unn ndu de d’ade umi jè dangai’t. A ɓaa, ké bain á ɗarinè dé ndige kinye jé dɔ se go ngein wa? Ḿ-m̀ è bè lé! Maje kade dé kuwe dé ree se ra de d’inye jè dɔ gar-gar. 38Njékan dè njérɔge teli se tàge nè awi edi njékonɓeege. Loo ke njékonɓeege ooi titeke Paul se Silas ei dooge ke ɓeekon ke Rome ɓaa, ɓel ra de ngain, 39ade reei se ra de deji de kêm tin mbit ɓita adi d’inye de dɔ ɓai. Nè né è bè géa, njékonɓeege deji Paul se Silas kade undei loo teei kêm ɓee-bò le de kɔke awi rang. 40Loo ke Paul se Silas undei loo teei dangai’t ɓaa, ei teli awi kêm kei le Lydie ingei njétaakêm-Kristge ulei dingem kêm de’t pa ɓita in-in awi kété ɓai.

will be added

X\