NYANRA NJEKAWKULEGE 15

1Dooge ke nange in-in kêm ɓeekon ke Judée reei kêm ɓee-bò ke Antioche, ɓeekon ke Syrie. Ei ndói nyan njétaakêm-Kristge edi nè: – Ke nè á adi d’uje tà mɔte si se go gute-ndu le Moise lé ɓaa, Nube à aje sei ndan lé. 2Paul se Barnabas ndigi se de dè tà’t nè nga lé a, naje se de tà ngain a tɔ. Gir’n ke nè á, d’ɔr’n Paul se Barnabas a, se njétaakêm-Kristge ke nange ke rang kade awi kêm ɓee-bò ke Jérusalem ingei njékawkulege se ngatɔgege ɔji se de tà dè tà’t nè nga. 3Njékebe nange le Nube adi de nyan ke ɔje de kaw mba nè nga ji de’t. Paul se Barnabas se njé ke ei se de undei kêm ɓeekonge ke Phénicie se Samarie gangi. Ei ɔri ser tur ke dooge ke ei Juipge lé teli turi hal de undei kêm de dè Kuwe-ɓee’t adi dooge se loo malang. Ser nyan malang ke ei ɔri go nga ade njétaakêm-Kristge ranel ke bò. 4Loo ke Paul se Barnabas se dooge ei se de teei kêm ɓee-bò ke Jérusalem ɓá ɓaa, njékebe nange le Nube a, njékawkulege a, se ngatɔgege a tɔ uwei de mba se maje’n. Paul se Barnabas ɔri ser nyange malang ke Nube ra se adi d’oo. 5Nè Pharisienge ke nange ke teli njétaakêm-Kristge in-in tami edi nè: – Gar-gar è ta le kade j’adi njétaakêm-Kristge ke ei Juipge lé ujei tà mɔte de a, j’unni ndu jéi j’adi an-in dè gute-ndu le Moise nga sêw-sêw a tɔ. 6Njékawkulege se ngatɔgege ɔsi nja nan le teri gir tà nè nga kan-in. 7Loo ke ei naji nan tà kò de heb ɗàk ɓá ɓaa, Pierre in dɔ ede de ede nè: – Ngakonmge, sei geri mbak titeke Nube ɔr’m dann si’t mari bere tede kade m’ile mber Tà ke Maje m’ade dooge ke ei Juipge lé ooi. Titeke bè á à undei kêm de dè Kuwe-ɓee Jésu’t. 8Nube ke njè ger ngarankêm dooge tɔje titeke uwe njé ke ei Juipge lé ke rann’t. Gir’n ke nè á è ade’n de Ndil-Kêmnda titeke ndɔ ke kété ade’n jéi nga tɔ. 9E ɔr ninn jéi se de gai lé, è ɔr se-nyange ke mine ngarankêm de’t takul kêm de ke d’unde dènn’t. 10A ɓaa, ké bain á ilei kate kum Nube’t ɗarinè wa? Nyan ke wɔi ke kà jéige éké jèi j’asi kunni kotoi lé nga, ké bain á unni undei dè njétaakêm-Kristge’t wa? 11Jè geri titeke j’ingei kaje takul kêmnoje le Kuwe-ɓee Jésu tite de bè tɔ. 12Kosdooge malang ke ndii loo kebe nan’t nga teli ndii sibik. Go’t gugu ɓaa, dé bere mbak d’ur mbi de d’oo’n ser nyankɔbege se nyange ke dum kum ke Nube ade Barnabas se Paul ndɔ ke rai dann dooge ke ei Juipge lé. E Barnabas se Paul kuwe á ɔri ser nyange nè adi d’oo. 13Loo ke ei ebi’t tam tà ɓá baa, Jacques unn tà ke le’n tam ede nè: – Ngakonmge, uri mbi si ooi tà le’m ɓita. 14Kété mari kuwe, Nube ɔje le tɔr dooge dann dooge ke ei Juipge lé le kade ei kosdooge le’n ke kinge’n. E tà nè á Simon ɔrgir ɗarinè ade jèi. 15Tàge le njéribe-dè-tàge ke tà Nube’t nga awi nan’t se tà nè tede dé ndang kêm Magtub’t le Nube d’ede nè: 16«Ndɔn’t go nyange’t nè nga ɓaa, m’a m’tel ree le gɔl kei kubu le David ke oso. M’a m’gɔl kumnge ke mbute a, m’a m’gɔl’n yak-yak kunn’n kunde’n dɔ rang gugu. 17Unn gir’n kêm ndɔn’t nè ɓaa, kalè dooge à sangi Kuwe-ɓee, oiyo, titeke bè á dooge malang ke ei Juipge lé ke unni ri’m nga à teli kosdooge le’m. 18Kuwe-ɓee ke njè ra nyange malang nè nga kuwe á tam bè. Nyan ke è ra ɗarinè nga, è nyan ke è ɔji rebe’n kété mari ke desêin.» 19Gir’n ke nè á man Jacques m’gir kêm’t m’ede nè: Dooge ke ei Juipge lé ke ɔsi wan teli ke ra Nube’t nga, maje tile konn non de’t ndɔje’n de gugu lé ta. 20Nè adi jè ndangi magtub j’adi de le kade d’ɔge ra de dè nyange ke mine ke dé gugu’n magege a, se dè tò se nan ke kaiya’t a, se dè dange ke mbir kɔbe de a, éké dè mese dange’t a tɔ. 21Unn gir kété mari nga, dooge ilei mber gute-ndu le Moise kêm ɓee-bòge karé-karé malang a, dé tute gute-ndu le Moise kêm kei kebe nange’t se ndɔ taa kebege karé-karé malang a tɔ. 22Njékawkulege se ngatɔgege a, se njékebe nange le Nube bere mbak ɔji njáng le kɔr dooge joo dann de’t le kule de kade awi se Paul se Barnabas kêm ɓee-bò ke Antioche, ɓeekon ke Syrie. Dooge ke d’ade awi nan’t se Paul se Barnabas nga è Jude ke dé ɓar’n Barsabbas a, Silas a tɔ. Jude se Silas nga ei ngawtà njétaakêm-Kristge ke ndii kêm ɓee-bò ke Jérusalem. 23Dé ndang magtub d’ade de ji de’t se tàge ke nè d’ede nè: «Jè njékawkulege se ngatɔgege a, se njétaakêm-Kristge a tɔ, jè ndang magtub nè j’ade sei njétaakêm-Kristge ke sei Juipge lé ke i ndii kêm ɓee-bò ke Antioche, ɓeekon ke Syrie se Cilicie. Jè ner sei. 24Jè j’oo titeke njé ke nange in-in dann jé’t awi bunguli sei se tàge ade tàgirge le si aw yo-yo, nè-nè. Dé dooge nè nga, è jè á j’unn ndu jé j’ade de lé. 25Gir’n ke nè á j’um tà le jé nan’t bɔk j’ɔr’n dooge j’ule’n de j’ade awi se Barnabas se Paul nan’t ra si’t. Barnabas se Paul nga ei kotárge le jé, 26ke inyei ra de adi yo tede ri Kuwe-ɓee le jéi Jésu-Krist. 27Jude se Silas ke j’ule de nga ei kuwe à ɔri gir tàge ke jè ndang kêm magtub’t nè kade ooi njai. 28Ndil-Kêmnda ɔr non jé ade j’an titeke è soo’t le kunde nyankoto ke wɔi ke rang dè si’t lé ta. Nè nyange ke j’à j’ede sei nè kuwe á i rai ɓaa, ase bè. 29Maje kade ɔgi ra si dè dange ke dé tɔl dé gugu’n magege se dè mese dange’t a, se dè nyange ke d’uje de ke mese d’ade magege a, se dè dange ke dé mbir kɔbe de a, se dè tò se nan ke kaiya’t a tɔ. Ke nè á an-in go ra si sêw-sêw dè nyange’t nè ɓaa, sei i rai nyanra ke maje. I ndii lapya ta.» 30Go’t gugu d’inye njé ke d’ule de d’ade ɔti awi kêm ɓee-bò ke Antioche, ɓeekon ke Syrie. Loo ke ei awi teei Antioche ɓá ɓaa, ei kebi njétaakêm-Kristge adi de magtub ke dé ndang d’ade de nè nga. 31Loo ke njétaakêm-Kristge tutei magtub nè an-in ɓaa, ei rai ranel tede magtub nè ule dingem kêm de’t. 32Jude se Silas ei njéribe-dè-tàge ke tà Nube’t. Ei géa edi de tàge ngain a, ndeji de a, ulei dingem kêm de’t a tɔ. 33Dé ra ndɔ ase tà’t kêm ɓee ke Antioche, ɓeekon ke Syrie. Go’t gugu ɓita njétaakêm-Kristge inyei de se kêmlom adi dé tel d’aw ra njé ke ulei de’t ɓai. [ 34Nè Silas ɓaa ɔje njáng le tel ndi Antioche.] 35Nè né è bè géa Paul se Barnabas ndii kêm ɓee-bò ke Antioche, ɓeekon ke Syrie. Ei se dooge ke rang bule ndói dooge nyan kum de ke kété-kété a, ilei mber Tà ke Maje le Kuwe-ɓee a tɔ. 36Mbɔr go’t gugu ɓaa, Paul ede Barnabas ede nè: – Ade jè teli j’awi j’ilei kum jéi dè ngakon jéige’t se kêm ɓee-bòge malang ke ndɔ ke j’ilei mber tà le Kuwe-ɓee tutu nga j’an-in ké ndai dé kundekêm dè Nube’t nga ɓai wa? 37Barnabas ndige le kade Jean ke dé ɓar’n Marc aw se de nan’t. 38Kule ke ndɔ ke Jean-Marc aw le ra se Barnabas se Paul kêm ɓee-bò ke Pamphilie nga, è ra ɔrgir son’n lé ɓai kuwe ɓaa, è inye de tà’t ɔte aw loo le’n. Gir’n ke nè á Paul ndige le kade Jean-Marc tel aw’n se de lé ta. 39Wong ra de dè nan’t ade nanan géa unn rebe ke le’n-le’n. Barnabas ɔr Marc ile’n goon’t ali kêm bato’t awi kum de ke ɓee le’n ke Chypre. 40Paul ɔr Silas le kade aw se’n. Nè kété ɓita kade Paul aw nga, njétaakêm-Kristge umi nin ji Kuwe-ɓee’t le kade è der-gir de. 41E aw se loo-loo kêm ɓeekonge ke Syrie se Cilicie ule dingem kêm njékebe nange’t le Nube.

will be added

X\